పాస్‌వర్డ్ మర్చిపోయా, గుర్తులేదు.. అంటూ పోలీసులకే సినిమా చూపిస్తున్నాడు ఐబొమ్మ రవి! కానీ సైబర్ క్రైమ్ పోలీసులు వేసిన కొత్త స్కెచ్‌తో ఆ డిజిటల్ దొంగ అడ్డంగా బుక్ అవ్వడం ఖాయంగా కనిపిస్తోంది.
సంచలనం సృష్టించిన 'ఐబొమ్మ' (iBomma) పైరసీ కేసులో ప్రధాన నిందితుడు ఇమ్మడి రవి మూడో రోజు విచారణ కూడా ముగిసింది. శుక్రవారం (నవంబర్ 22) జరిగిన విచారణలో రవి పోలీసులకు ఏమాత్రం సహకరించకపోగా, పొంతన లేని సమాధానాలతో తప్పుదారి పట్టించే ప్రయత్నం చేస్తున్నాడని అధికారులు వెల్లడించారు.
"పాస్‌వర్డ్ మర్చిపోయా".. రవి డ్రామాలు!
పోలీసులు ఐబొమ్మ వెబ్‌సైట్‌కు సంబంధించిన కీలకమైన యూజర్ ఐడీ, పాస్‌వర్డ్‌లు అడిగితే.. "గుర్తు లేవు, మర్చిపోయా" అని రవి దాటవేస్తున్నట్లు తెలిసింది. కావాలనే సమాచారాన్ని దాచిపెడుతున్నాడని గ్రహించిన పోలీసులు, ఇప్పుడు ప్లాన్ బి అమలు చేస్తున్నారు.
పోలీసుల కొత్త వ్యూహం ఇదే:
ఎథికల్ హ్యాకర్ల ఎంట్రీ: రవి నోరు విప్పకపోవడంతో, అతని హార్డ్ డిస్క్‌లు, పెన్ డ్రైవ్‌లను డీకోడ్ చేయడానికి నిపుణులైన ఎథికల్ హ్యాకర్ల (Ethical Hackers) సాయం తీసుకుంటున్నారు.
విదేశాల్లో సర్వర్లు: ఐబొమ్మ మెయిన్ సర్వర్లు ఫ్రాన్స్, నెదర్లాండ్స్ వంటి దేశాల్లో ఉన్నట్లు దర్యాప్తులో తేలింది. దీంతో విచారణ అంతర్జాతీయ స్థాయికి చేరింది.
బ్యాంకులకు లేఖలు: అక్రమ సంపాదనపై రవి మౌనంగా ఉండటంతో, అతని ఖాతాల వివరాలు ఇవ్వాలని సైబర్ క్రైమ్ పోలీసులు పలు బ్యాంకులకు మెయిల్స్ పంపారు.
20 రోజులకు ఒక దేశం.. టూరిజం పేరుతో దందా?
రవి విదేశీ పర్యటనలు కూడా పోలీసులను ఆశ్చర్యానికి గురిచేస్తున్నాయి. దాదాపు ప్రతి 20 రోజులకు ఒకసారి అతను ఒక్కో దేశానికి వెళ్తున్నట్లు రికార్డుల్లో ఉంది. దీనిపై ప్రశ్నిస్తే, "నాకు ట్రావెలింగ్ అంటే ఇష్టం, అందుకే వెళ్లాను" అని రవి బుకాయిస్తున్నాడు.
అయితే, అతను వెళ్లిన దేశాల్లో ఉన్న పైరసీ లింకులు, అంతర్జాతీయ నెట్‌వర్క్‌తో సంబంధాలపై పోలీసులు ఇప్పుడు లోతుగా ఆరా తీస్తున్నారు.
