మైదానంలో బౌలర్లకు చుక్కలు చూపించిన ఆ యంగ్ ఆల్-రౌండర్.. ఇప్పుడు ఒక మహిళ చేతిలో చిక్కిపోయాడు. అతని కెరీర్, పరువు మొత్తం ప్రమాదంలో పడింది.
ఐపీఎల్ 2025లో ఢిల్లీ క్యాపిటల్స్ (Delhi Capitals) తరఫున అద్భుత ప్రదర్శన చేసిన యువ ఆల్-రౌండర్ విప్రజ్ నిగమ్ (Vipraj Nigam) పెద్ద సమస్యలో చిక్కుకున్నాడు. ఒక మహిళ తనను బ్లాక్మెయిల్ చేస్తోందని, ప్రైవేట్ వీడియోలు వైరల్ చేస్తానని బెదిరిస్తోందని అతను పోలీసులకు ఫిర్యాదు చేశాడు.
ప్రైవేట్ వీడియోలతో బ్లాక్మెయిల్
ఉత్తరప్రదేశ్లోని హైదర్గఢ్ ప్రాంతానికి చెందిన విప్రజ్ నిగమ్, ఆదివారం బారాబంకి పోలీసులకు లిఖితపూర్వక ఫిర్యాదు చేశాడు. తన వ్యక్తిగత జీవితంలో సదరు యువతి జోక్యం చేసుకుంటోందని, అనుచిత డిమాండ్లు చేస్తోందని ఆరోపించాడు. ఆమె డిమాండ్లను అంగీకరించకపోవడంతో ప్రైవేట్ వీడియోలు బయటపెడతానని బెదిరిస్తున్నట్లు ఫిర్యాదులో పేర్కొన్నాడు.
ఇంటర్నేషనల్ నంబర్ల నుంచి బెదిరింపులు
ఆ యువతి నంబర్ను బ్లాక్ చేసిన తర్వాత, విప్రజ్కు, అతని కుటుంబ సభ్యులకు ఇంటర్నేషనల్ నంబర్ల నుంచి కాల్స్, మెసేజ్లు రావడం మొదలైంది. తమ పరువు తీస్తామని, బహిరంగంగా అవమానిస్తామని హెచ్చరిస్తున్నారు. ఇదంతా తన క్రికెట్ కెరీర్ను నాశనం చేయడానికి, మానసికంగా కృంగదీయడానికి జరుగుతున్న కుట్ర అని విప్రజ్ ఆరోపించాడు.
రంగంలోకి సైబర్ సెల్.. దర్యాప్తు ముమ్మరం
సిటీ కొత్వాలి స్టేషన్ ఇన్ఛార్జ్ సుధీర్ కుమార్ సింగ్కు విప్రజ్ మొత్తం వివరాలు అందించాడు. పోలీసులు ఈ ఫిర్యాదును తీవ్రంగా పరిగణించి కేసు నమోదు చేశారు. డిజిటల్ సాక్ష్యాలు, కాల్ వివరాలు, మెసేజ్లను పరిశీలించేందుకు సైబర్ సెల్ను కూడా రంగంలోకి దించారు. ఈ కాల్స్ విదేశీ నంబర్ల నుంచి వస్తుండటంతో, విదేశీ ఏజెన్సీల సహకారం కూడా తీసుకోవలసి రావచ్చని పోలీసులు తెలిపారు.
ఐపీఎల్లో విప్రజ్ ప్రదర్శన
ఉత్తరప్రదేశ్ తరఫున దేశీయ క్రికెట్ ఆడే విప్రజ్ నిగమ్, ఐపీఎల్ 2025 సీజన్లో ఢిల్లీ క్యాపిటల్స్ తరఫున ఆల్-రౌండర్గా మెరిశాడు. ఆడిన 14 మ్యాచ్లలో 179.74 స్ట్రైక్ రేట్తో 142 పరుగులు చేసి, 11 వికెట్లు పడగొట్టాడు. ఇతను 5 ఫస్ట్ క్లాస్, 6 లిస్ట్ ఏ మ్యాచ్లు కూడా ఆడాడు.
దేశీయ క్రికెట్లో, ఐపీఎల్లో మెరుస్తున్న ఈ యువ ఆటగాడి కెరీర్.. ఈ బ్లాక్మెయిలింగ్ ఉదంతం నుంచి ఎలా బయటపడుతుందోనని అతని అభిమానులు ఆందోళన చెందుతున్నారు. పోలీసుల దర్యాప్తులో పూర్తి నిజాలు వెలుగులోకి రావాల్సి ఉంది.
