ఆ పదవుల కోసం ఎదురుచూస్తున్నారా? లోకేష్ గుడ్ న్యూస్ చెప్పారు. కానీ, ఆ పదవులు దక్కాలంటే ఒక పెద్ద కండిషన్ కూడా పెట్టారు!
తెలుగుదేశం పార్టీకి కార్యకర్తలు చాలా ముఖ్యమని మంత్రి నారా లోకేష్ స్పష్టం చేశారు. "కార్యకర్తకు న్యాయం జరగాల్సిందే. ఆ విషయంలో రాజీ పడేది లేదు. వారిని హ్యాపీగా ఉంచాల్సిందే, రెండో మాట లేదు" అని ఆయన దిశా నిర్దేశం చేశారు.
గుంటూరు జిల్లా మంగళగిరిలోని టీడీపీ కేంద్ర కార్యాలయం ఎన్టీఆర్ భవన్‌లో మంగళవారం (నవంబర్ 11) రాష్ట్ర పార్టీ అధ్యక్షులు పల్లా శ్రీనివాసరావు, జోనల్ కోఆర్డినేటర్లతో నారా లోకేష్ సమావేశం అయ్యారు. ఈ సందర్భంగా ఆయన కీలక వ్యాఖ్యలు చేశారు.
కార్యకర్తే అధినేత.. రాజీ పడేది లేదు!
"టీడీపీకి ఒక విధానం ఉంది, అది అధినాయకత్వం నిర్ణయిస్తుంది, దాన్ని కచ్చితంగా పార్టీ అంతా పాటించాల్సిందే" అని నారా లోకేష్ చెప్పారు. పార్టీకి కార్యకర్తే అధినేత అనే టీడీపీ విధానం పక్కాగా అమలు కావాలని ఆయన కోరారు. ఆ దిశగా ప్రతీ కార్యకర్తకు పార్టీలో ప్రాధాన్యం ఉండేలా చూడాలని జోనల్ కోఆర్డినేటర్లకు తేల్చి చెప్పారు.
అధికారంలో ఉన్నామనే నిర్లక్ష్యం వద్దు
"అధికారంలో ఉన్నామనే నిర్లక్ష్యం పనికి రాదు" అని లోకేష్ హెచ్చరించారు. టీడీపీ ప్రతిపక్షంలో ఉన్నప్పుడు ఏ విధంగా పనిచేశారో, దాని కంటే ఎక్కువ పట్టుదలతో పనిచేసి కార్యకర్తలకు న్యాయం చేయాలని ఆయన కోరారు.
మిత్రపక్షాలతో సమన్వయం.. ఎమ్మెల్యేలకు ఆదేశాలు
తెలుగుదేశం పార్టీలో ప్రతీ స్థాయిలో కోఆర్డినేషన్ అతి ముఖ్యమని నారా లోకేష్ అన్నారు. ఇంచార్జ్ మంత్రులతో సమన్వయం చేసుకుంటూ స్థానిక ఎన్నికల వ్యూహరచన చేయాలని జోనల్ కోఆర్డినేటర్లకు ఆయన స్పష్టమైన ఆదేశాలు ఇచ్చారు.
ముఖ్యంగా, జనసేన, బీజేపీ ఎమ్మెల్యేలు ఉన్న చోట తెలుగుదేశం ఇంఛార్జ్‌ల సమన్వయం ఎంతో కీలకం అని కూడా ఆయన నొక్కి చెప్పారు. ఎమ్మెల్యేలకు, కార్యకర్తలకు సమన్వయం పెంచే బాధ్యత జోనల్ కోఆర్డినేటర్లదేనని తేల్చి చెప్పారు.
నామినేటెడ్ పదవులు.. ఈ నెలాఖరులోగా భర్తీ!
ఎమ్మెల్యేలు తప్పనిసరిగా "ప్రజా వేదికల" పేరిట కార్యక్రమాలు నిర్వహించాలని, ప్రజల నుంచి దరఖాస్తులను తీసుకుని, వారి స్థాయిలోనే సమస్యలను త్వరితగతిన పరిష్కరించాలని లోకేష్ సూచించారు.
ఇక, టీడీపీలో అంతా ఆరాటంగా ఎదురుచూస్తున్న నామినేటెడ్ పదవుల విషయంలో కూడా లోకేష్ ఒక కీలక విషయం వెల్లడించారు. "ఈ నెలాఖరులోగా (నవంబర్) నామినేటెడ్ పదవులు అన్నీ భర్తీ చేస్తాం. పార్టీ కోసం పనిచేసిన అర్హులకు మాత్రమే ఈ పదవులు దక్కుతాయి" అని ఆయన స్పష్టం చేశారు.
మొత్తానికి, ఎప్పటికప్పుడు పార్టీ పరిస్థితి మీద పూర్తి స్థాయిలో సమీక్షిస్తామని, పనిచేసే కార్యకర్తలకు న్యాయం చేయడమే ప్రథమ లక్ష్యమని లోకేష్ పార్టీ నేతలకు ఒక క్లారిటీతో కూడిన సందేశం ఇచ్చారు.
