రాష్ట్రం గజగజ వణుకుతోంది! ఉష్ణోగ్రతలు 10 డిగ్రీలకు పడిపోయాయి. కానీ, అసలైన ప్రమాదం చలి కాదు.. ఆరోగ్య శాఖ హెచ్చరిస్తోంది!
రాష్ట్రవ్యాప్తంగా చలి తీవ్రత పెరిగిపోవడంతో ప్రజలు వణికిపోతున్నారు. ముఖ్యంగా ఉత్తర తెలంగాణ జిల్లాల్లో చలి తీవ్రత అధికమైంది. ఏజెన్సీ గ్రామాల్లో కనిష్ఠ ఉష్ణోగ్రతలు నమోదవుతున్నాయి.
10.2°C.. సిర్పూర్లో అత్యల్ప ఉష్ణోగ్రత!
మంగళవారం రాత్రి కుమ్రంభీం-ఆసిఫాబాద్ జిల్లా సిర్పూర్(యూ)లో అత్యంత కనిష్ఠ ఉష్ణోగ్రత 10.2 డిగ్రీలుగా నమోదైనట్టు హైదరాబాద్ వాతావరణ కేంద్రం బుధవారం (నవంబర్ 13) ఒక ప్రకటనలో తెలిపింది. ఉదయం పొగమంచు, చలిగాలులు వీస్తుండగా, రాత్రి సమయంలో చలి తీవ్రత క్రమక్రమంగా పెరుగుతుందని పేర్కొన్నది.
మరో మూడ్రోజులు ఇంతే.. ఈ జిల్లాల్లో డేంజర్!
ఈనెలలో సగటున 13 నుంచి 17 డిగ్రీల మధ్య ఉష్ణోగ్రతలు కొనసాగే అవకాశం ఉన్నదని వాతావరణ శాఖ వెల్లడించింది. రాష్ట్రవ్యాప్తంగా సాధారణం కంటే 4 నుంచి 5 డిగ్రీల మేర ఉష్ణోగ్రతలు పడిపోయాయని, వచ్చే మూడ్రోజులు ఇదే తరహా వాతావరణం ఉంటుందని వివరించింది.
ఆదిలాబాద్, కుమ్రంభీం ఆసిఫాబాద్, నల్లగొండ, భద్రాచలం, రామగుండం, నిజామాబాద్, హైదరాబాద్, రంగారెడ్డి, వరంగల్, ఖమ్మం, యాదాద్రి-భువనగిరి జిల్లాల్లో చలి ఎక్కువగా ఉంటుందని హెచ్చరించింది.
చలి పట్ల అప్రమత్తంగా ఉండాలి: వైద్యారోగ్యశాఖ
రాష్ట్రంలో చలి తీవ్రత పెరిగే అవకాశం ఉండటంతో ప్రజలు అప్రమత్తంగా ఉండాలని వైద్యారోగ్యశాఖ హెచ్చరించింది. ఈ మేరకు డీహెచ్ రవీందర్నాయక్ బుధవారం ఒక ప్రకటన విడుదల చేశారు. రెస్పిరేటరీ ఇన్ఫెక్షన్లు, సీజనల్ ఫ్లూ పెరిగే అవకాశం ఉండటంతో అలర్ట్గా ఉండాలని సూచించారు.
ఆ లక్షణాలుంటే.. నిర్లక్ష్యం వద్దు!
జ్వరం, దగ్గు, గొంతు తడి ఆరిపోవడం, నొప్పులు ఉంటే నిర్లక్ష్యం చేయవద్దని తెలిపారు. గర్భిణులు, ఐదేండ్లలోపు చిన్నారులు, వృద్ధుల్లో సీజనల్ ఫ్లూ లక్షణాలు ఉంటే వెంటనే సమీపంలోని దవాఖానలను సందర్శించాలని కోరారు. అధిక జ్వరం, శ్వాస తీసుకోవడంలో ఇబ్బందులు ఉంటే తక్షణమే దగ్గరలోని ప్రభుత్వాసుపత్రిలో చికిత్స పొందాలని సూచించారు.
చలి తీవ్రత పెరుగుతున్నందున, వాతావరణ శాఖ హెచ్చరికలతో పాటు ఆరోగ్య శాఖ సూచనలను కూడా ప్రజలు తప్పనిసరిగా పాటించాల్సిన అవసరం ఉంది.
