'ట్రంప్ మమ్మల్ని నట్టేట ముంచాడు'.. నమ్మి రోడ్లెక్కితే వాడుకుని వదిలేశారు! ఇరాన్ ప్రజల ఆక్రోశం
రాజకీయాల్లో మాటలు కోటలు దాటుతాయి.. కానీ చేతలు గడప దాటవు అంటారు. ఇప్పుడు ఇరాన్ ప్రజల పరిస్థితి అలాగే ఉంది. అగ్రరాజ్యాధినేత డొనాల్డ్ ట్రంప్ (Donald Trump) అండ చూసుకుని ఇరాన్ లోని నియంతృత్వ పాలనపై జనం తిరగబడ్డారు. "సాయం వస్తోంది, మేమున్నాం" అని ట్రంప్ ఇచ్చిన భరోసా నమ్మి ప్రాణాలకు తెగించి రోడ్లెక్కితే.. చివరికి ఆయన మాట మార్చడంతో వేలాది మంది బలి అయ్యారు. ఇప్పుడు ఇరాన్ ప్రజలు ట్రంప్ పై తీవ్ర ఆగ్రహం వ్యక్తం చేస్తున్నారు. "ఆయన మమ్మల్ని మోసం చేశాడు, వాడుకుని వదిలేశాడు" అంటూ కన్నీరుమున్నీరవుతున్నారు. అసలు ట్రంప్ ఏం చెప్పారు? చివర్లో ఎలా హ్యాండ్ ఇచ్చారు?
ట్రంప్ ఇచ్చిన 'భరోసా' ఏంటి?
ఇరాన్ లో ఆర్థిక పరిస్థితులు దిగజారడం, ప్రభుత్వ అణచివేతతో డిసెంబర్ చివరిలో నిరసనలు మొదలయ్యాయి. ఆ సమయంలో అమెరికా అధ్యక్షుడు ట్రంప్ సోషల్ మీడియాలో రెచ్చిపోయారు. "ఇరాన్ ప్రజలకు సాయం వస్తోంది", "శాంతియుత నిరసనకారులను ఏమైనా చేస్తే అమెరికా చూస్తూ ఊరుకోదు, మా తుపాకులు రెడీగా ఉన్నాయి (Locked and Loaded)" అంటూ వార్నింగ్స్ ఇచ్చారు. ఈ మాటలను ఇరాన్ ప్రజలు గుడ్డిగా నమ్మారు. అమెరికా తమ కోసం మిలిటరీని పంపుతుందని, ఈ ప్రభుత్వ పీడ విరగడవుతుందని ఆశపడ్డారు.
నమ్మించి గొంతు కోశాడా?
ట్రంప్ మాటలు నమ్మి లక్షలాది మంది వీధుల్లోకి వచ్చి నిరసనలు తెలిపారు. కానీ ఇరాన్ ప్రభుత్వం వారిని ఉక్కుపాదంతో అణచివేసింది. స్నైపర్లతో కాల్పులు జరిపింది, మెషిన్ గన్లతో దాడి చేసింది. దాదాపు 15,000 మంది చనిపోయారని అంచనా.
ట్విస్ట్: ఇంత జరుగుతున్నా అమెరికా నుంచి ఎలాంటి సాయం రాలేదు. పైగా, "ఇరాన్ ప్రభుత్వం ఇకపై చంపడం ఆపేస్తామని నాకు హామీ ఇచ్చింది, మేము మిలిటరీ యాక్షన్ తీసుకోవడం లేదు" అని ట్రంప్ ప్రకటించారు.
షాక్: ఈ ప్రకటనతో నిరసనకారులు షాక్ అయ్యారు. "ట్రంప్ మమ్మల్ని ఎరగా వాడుకున్నారు. ఇరాన్ ప్రభుత్వంతో లోపాయికారీ ఒప్పందం చేసుకుని మమ్మల్ని బలిపశువులను చేశారు" అని ఒక వ్యాపారవేత్త ఆవేదన వ్యక్తం చేశారు.
ప్రజల ఆవేదన
టైమ్ మ్యాగజైన్ కు ఇచ్చిన ఇంటర్వ్యూలో టెహ్రాన్ వాసులు తమ ఆవేదనను వెళ్లగక్కారు.
"15 వేల మంది చావుకు ట్రంప్ దే బాధ్యత. ఆయన రెచ్చగొట్టడం వల్లే జనం రోడ్లెక్కి చనిపోయారు.మాకు ఆశ లేదు.. ఆయన మమ్మల్ని పట్టించుకోడు."
ఎందుకు మొదలయ్యాయి?
ఇరాన్ లో కరెన్సీ (Rial) విలువ పడిపోవడం, ధరల పెరుగుదల, నిరుద్యోగం కారణంగా నిరసనలు మొదలయ్యాయి. ఇవి రానురాను "మాకు ఈ ప్రభుత్వం వద్దు, కొత్త నాయకత్వం కావాలి" అనే స్థాయికి వెళ్లాయి. బహిష్కరణలో ఉన్న ఇరాన్ యువరాజు రెజా పహ్లావీ (Reza Pahlavi) పిలుపుతో లక్షలాది మంది కదిలారు. కానీ అమెరికా వెన్నుపోటుతో ఇప్పుడు ఆ ఉద్యమం నీరుగారిపోయింది.
బాటమ్ లైన్
అంతర్జాతీయ రాజకీయాల్లో ఎమోషన్స్ కు స్థానం లేదు.. అంతా బిజినెస్సే!
విదేశీ నాయకుల మాటలు నమ్మి సొంత ప్రభుత్వంపై పోరాటానికి దిగితే పర్యవసానాలు ఎంత దారుణంగా ఉంటాయో ఇరాన్ ప్రజలకు అర్థమైంది. ట్రంప్ తన రాజకీయ అవసరాల కోసం ఇరాన్ ప్రజల ఆవేశాన్ని వాడుకున్నారా అనే అనుమానాలు బలపడుతున్నాయి.
