అమెరికా అధ్యక్షుడు డొనాల్డ్ ట్రంప్ చూపు ఇప్పుడు మంచు ఖండం గ్రీన్లాండ్పై పడింది. ఏకంగా ఆ దేశాన్ని అమెరికా మ్యాప్లో కలిపేసి చూపించడం, "నేను కొనేస్తా" అని ప్రకటించడం అంతర్జాతీయంగా కలకలం రేపింది. కానీ, ఇక్కడ ట్రంప్ ఆలోచనకు, గ్రీన్లాండ్ వాస్తవ పరిస్థితులకు అస్సలు పొంతన లేదు. ఎందుకంటే, ప్రపంచంలో ఎక్కడా లేని వింతైన భూ చట్టాలు అక్కడ ఉన్నాయి. మీ దగ్గర ఎన్ని వేల కోట్లు ఉన్నా సరే.. గ్రీన్లాండ్లో మీరు ఒక ఇల్లు కొనగలరేమో కానీ, ఆ ఇల్లు నిలబడిన మట్టిని మాత్రం కొనలేరు. "గ్రీన్లాండ్ అమ్మకానికి లేదు" అని అక్కడి ప్రజలు ఎందుకు రోడ్డెక్కారు? అసలు అక్కడ భూమి ఎవరి సొంతం?
భూమి ప్రజలది.. పెత్తనం ప్రభుత్వానిది!
గ్రీన్లాండ్ (డెన్మార్క్ ఆధీనంలోని స్వయం ప్రతిపత్తి ప్రాంతం)లో భూమి అనేది ఏ ఒక్కరి ఆస్తి కాదు. అది ప్రజలందరి సామూహిక వనరు (Collective Resource).
No Private Land: అక్కడ వ్యక్తిగత భూయాజమాన్య హక్కులు ఉండవు. అంటే మీకు అక్కడ సొంత స్థలం అంటూ ఏదీ ఉండదు.
Only Structure: మీరు లక్షలు పోసి ఇల్లు కట్టుకోవచ్చు, లేదా కొనుగోలు చేయొచ్చు. కానీ మీరు యజమాని అయ్యేది ఆ ఇటుకలకు, గోడలకు మాత్రమే. ఆ కింద ఉన్న భూమి ప్రభుత్వానిదే.
Strict Rules: ఇంటిని విస్తరించాలన్నా, చిన్న వ్యాపారం పెట్టాలన్నా, ఆఖరికి మీ కారు పార్కింగ్ చేసుకోవాలన్నా మున్సిపాలిటీ పర్మిషన్ ఉండాల్సిందే.
ఇల్లు కొనడం అంత ఈజీ కాదు!
ట్రంప్ ఏమో దేశాన్ని కొంటానంటున్నారు కానీ, అక్కడ సామాన్యుడు ఒక ఇల్లు కొనడానికే చుక్కలు కనిపిస్తాయి.
వెయిటింగ్ లిస్ట్: రాజధాని 'నూక్' (Nuuk) వంటి ప్రాంతాల్లో ఇల్లు కావాలంటే ప్రభుత్వానికి దరఖాస్తు చేసుకోవాలి. ఆ అప్లికేషన్ క్లియర్ అయ్యి, మీకు ఇల్లు కేటాయించడానికి దాదాపు 10 నుంచి 12 ఏళ్లు పడుతుంది.
ఫారినర్స్ కండీషన్: విదేశీయులు అక్కడ ఇల్లు కొనాలంటే కనీసం రెండేళ్లు అక్కడ నివసించి ఉండాలి, పన్నులు సక్రమంగా కట్టి ఉండాలి. అప్పుడే దరఖాస్తుకు అర్హత వస్తుంది.
రీసేల్ కష్టాలు: మీరు కొన్న ఇంటిని వేరే వాళ్లకు అమ్మాలంటే మళ్లీ ప్రభుత్వ అనుమతి తప్పనిసరి. ఇష్టారాజ్యంగా అమ్మకాలు సాగవు.
కార్పొరేట్ కన్ను vs కమ్యూనిటీ సెంటిమెంట్
ట్రంప్ ప్రకటన వెనుక భారీ వ్యూహం ఉంది. గ్రీన్లాండ్ను స్వాధీనం చేసుకుంటే, అక్కడి కఠినమైన భూ చట్టాలను మార్చేసి, కార్పొరేట్ కంపెనీలకు రెడ్ కార్పెట్ పరచవచ్చు. రియల్ ఎస్టేట్ వ్యాపారాన్ని విస్తరించవచ్చు. సరిగ్గా దీనికే అక్కడి ప్రజలు భయపడుతున్నారు. తమ పూర్వీకుల నుంచి వస్తున్న 'సామూహిక జీవన విధానాన్ని' (Community Living) వ్యాపారమయం చేస్తారని వారు ఆందోళన చెందుతున్నారు. అందుకే "మా దేశం అమ్మకానికి లేదు" అని గట్టిగా నినదిస్తున్నారు.
ఇది భూపోరాటం కాదు.. అస్తిత్వ పోరాటం!
ట్రంప్ ప్రతిపాదన కేవలం ఒక రియల్ ఎస్టేట్ డీల్ కాదు. అది గ్రీన్లాండ్ ప్రజల సంస్కృతిపై జరుగుతున్న దాడి. డబ్బుతో ఏదైనా కొనొచ్చనే పెట్టుబడిదారీ ఆలోచనకు, మట్టి మా అందరిది అనే గ్రీన్లాండ్ ప్రజల ఆత్మగౌరవానికి మధ్య జరుగుతున్న యుద్ధం ఇది. ప్రస్తుతానికి గ్రీన్లాండ్ ప్రజల సెంటిమెంట్ ముందు డాలర్ల కట్టలు పనిచేయకపోవచ్చు.
