మన ఊళ్లో రేషన్ కార్డు కావాలన్నా, పెన్షన్ సమస్య వచ్చినా రోజూ మనం వెళ్లే 'గ్రామ సచివాలయం' పేరు మారిపోయింది. కేవలం ఆఫీసుల బోర్డులు మారడమే కాదు.. పౌరులకు అందే సేవలు, అక్కడ పనిచేసే లక్షలాది ఉద్యోగుల తలరాతలు కూడా మారబోతున్నాయి. అసెంబ్లీ వేదికగా ఈ పేరు మార్పు బిల్లు పాస్ కావడంతో పాటు ఉద్యోగులకు ప్రమోషన్ల పండుగ రాబోతోంది. అసలు కొత్తగా రాబోతున్న ఈ 'స్వర్ణ కార్యాలయాల'తో సామాన్యుడికి ఒరిగేదేంటి? కింది స్థాయి ఉద్యోగులకు దక్కిన లాభాలేంటి?
ఇకపై సచివాలయాలు కాదు.. 'స్వర్ణ కార్యాలయాలు'
ఆంధ్రప్రదేశ్లో గత ప్రభుత్వం తీసుకొచ్చిన గ్రామ, వార్డు సచివాలయాల పేర్లను కూటమి సర్కార్ అధికారికంగా మార్చేసింది. ఇకపై రాష్ట్రవ్యాప్తంగా వీటిని 'గ్రామ, వార్డు స్వర్ణ కార్యాలయాలు' (Swarna Grama, Swarna Ward) గా పిలవాల్సి ఉంటుంది.
దీనికి సంబంధించిన చట్ట సవరణ బిల్లును మంత్రి శ్రీబాల వీరాంజనేయ స్వామి ఏపీ శాసనసభలో ప్రవేశపెట్టగా.. సభ ఏకగ్రీవంగా ఆమోదం తెలిపింది. ఈ ఏడాది జనవరిలో గవర్నర్ జారీ చేసిన ఆర్డినెన్స్.. ఇప్పుడు అసెంబ్లీ సాక్షిగా చట్టరూపం దాల్చింది.
ఉద్యోగులందరికీ ప్రమోషన్ల గుడ్ న్యూస్!
పేర్లు మార్చడంతో పాటు అక్కడ పనిచేస్తున్న సిబ్బందికి సీఎం చంద్రబాబు (CM Chandrababu) భారీ శుభవార్త చెప్పారు. 'స్వర్ణ కార్యాలయాల్లో' పనిచేసే అర్హులైన ఉద్యోగులందరికీ ప్రమోషన్లు (పదోన్నతులు) కల్పిస్తామని ప్రభుత్వం ప్రకటించింది.
గతంలో ఉద్యోగుల విధులు, బాధ్యతలపై ఉన్న గందరగోళానికి చెక్ పెడుతూ.. జిల్లా, మండల, మున్సిపల్ స్థాయిలో కొత్త పర్యవేక్షణ వ్యవస్థను తీసుకొచ్చారు. అవసరాలకు తగ్గట్టుగా వెటర్నరీ, ఉద్యాన, మత్స్య కార్యదర్శుల పోస్టులను జనాభా ప్రాతిపదికన రేషనలైజేషన్ చేశారు.
నెలనెలా రూ.1000.. మెరుగైన సేవలు
స్వర్ణాంధ్ర విజన్ 2047 లక్ష్యంగా ఈ మార్పులు చేసినట్లు మంత్రి స్వామి సభలో వివరించారు. ఇకపై ప్రతి కార్యాలయానికి ఇంటర్నెట్, స్టేషనరీ ఖర్చుల కింద ప్రతి నెలా రూ.1000 చొప్పున ప్రభుత్వం చెల్లించనుంది.
అలాగే, అద్దె భవనాల్లో నడుస్తున్న ఆఫీసులను వెంటనే ప్రభుత్వ భవనాల్లోకి మార్చేందుకు ప్లాన్ చేస్తున్నారు. జనాభా ప్రాతిపదికన ఒకే పట్టణంలో ఉన్న రెండు మూడు కార్యాలయాలను విభజించి, ప్రజలకు మరింత వేగంగా సేవలు అందించబోతున్నారు.
పేరుతో పాటే తీరు మారాలి!
సచివాలయాలను 'స్వర్ణ కార్యాలయాలు'గా మార్చడం, ప్రమోషన్లు ఇవ్వడం ఉద్యోగులకు పెద్ద బూస్ట్. కానీ, సామాన్యుడికి కావాల్సింది మారిన పేర్లు కాదు.. పారదర్శకమైన సేవలు. ప్రజలను ఆఫీసుల చుట్టూ తిప్పించుకోకుండా, అవినీతికి తావులేకుండా ఈ 'స్వర్ణ' సిబ్బంది పనిచేస్తేనే ప్రభుత్వం ఆశించిన 'స్వర్ణాంధ్ర విజన్' నిజమవుతుంది. కొత్తగా తీసుకొచ్చిన పర్యవేక్షణ వ్యవస్థ పక్కాగా పనిచేస్తే పల్లె ప్రజలకు ఇదొక వరం!
