రాజకీయాలంటే ఒకప్పుడు తలపండిన నాయకులకే పరిమితం అనే భావన ఉండేది. కానీ ఇప్పుడు ట్రెండ్ మారుతోంది. 'జెన్-జీ' (Gen-Z) జనరేషన్ పాలనా పగ్గాలు చేపడుతోంది. తాజాగా తెలంగాణ మున్సిపల్ ఎన్నికల్లో ఒక ఆసక్తికర రికార్డు నమోదైంది. కేవలం 24 ఏళ్ల వయసులో వికారాబాద్ మున్సిపల్ ఛైర్పర్సన్ పీఠాన్ని అధిష్టించి, రాష్ట్రంలోనే అతి పిన్న వయస్కురాలిగా చరిత్రకెక్కారు గడ్డం అనన్య (Gaddam Ananya).
తెలంగాణ అసెంబ్లీ స్పీకర్ గడ్డం ప్రసాద్ కుమార్ (Gaddam Prasad Kumar) కుమార్తెగా పొలిటికల్ ఎంట్రీ ఇచ్చినా.. ఆమె మాటల్లో పరిణితి, విజన్ చూస్తుంటే మరో బలమైన మహిళా నాయకురాలు తయారవుతున్నట్లు అనిపిస్తోంది. తండ్రి చాటు బిడ్డగా కాకుండా, సొంత ఇమేజ్ కోసం తపిస్తున్న అనన్య.. వికారాబాద్ రాజకీయాలను ఎలా మార్చబోతున్నారు?
లయోలా అకాడమీ నుంచి బ్యాచిలర్ ఆఫ్ ఆర్ట్స్ పూర్తి చేసిన అనన్య.. చదువు పూర్తవ్వగానే ప్రజాక్షేత్రంలోకి దూకారు. వికారాబాద్ మున్సిపాలిటీ పరిధిలోని 17వ వార్డు నుంచి కాంగ్రెస్ తరఫున పోటీ చేసిన ఆమె.. ఏకంగా 1,138 ఓట్ల మెజారిటీతో ప్రత్యర్థులను చిత్తు చేశారు. వార్డు కౌన్సిలర్ గా గెలిచిన వెంటనే.. సోమవారం జరిగిన ఛైర్పర్సన్ ఎన్నికల్లో ఏకగ్రీవంగా ఎన్నికై రికార్డు సృష్టించారు. తండ్రి గడ్డం ప్రసాద్ కుమార్ రాజకీయ అనుభవం, కాంగ్రెస్ పార్టీ క్యాడర్ బలం ఆమె విజయానికి సోపానాలుగా నిలిచాయి.
అయితే, కేవలం వారసత్వంతోనే నెట్టుకురావాలని అనన్య అనుకోవడం లేదు. ఛైర్పర్సన్గా బాధ్యతలు చేపట్టిన తర్వాత ఆమె చేసిన వ్యాఖ్యలే ఇందుకు నిదర్శనం. "తండ్రి రాజకీయ వారసత్వాన్ని అందిపుచ్చుకుంటా.. కానీ నాకంటూ ఒక ప్రత్యేక గుర్తింపు తెచ్చుకుంటా" అని ఆమె స్పష్టం చేశారు. ఇందుకోసం హైదరాబాద్ లోని నివాసాన్ని వదిలేసి, వికారాబాద్ ప్రజలకు నిత్యం అందుబాటులో ఉండేలా ఏర్పాట్లు చేసుకుంటున్నారు. క్షేత్ర స్థాయి నుంచి రాజకీయ ప్రస్థానం మొదలుపెట్టానని, స్వతంత్రంగా నిర్ణయాలు తీసుకుని అభివృద్ధి చేసి చూపిస్తానని అనన్య కాన్ఫిడెంట్ గా చెబుతున్నారు.
ఇక వికారాబాద్ లో అభివృద్ధి జరగలేదన్న విపక్షాల విమర్శలకు అనన్య తనదైన శైలిలో కౌంటర్ ఇచ్చారు. మీ నాన్న ఎమ్మెల్యేగా ఉన్నా సమస్యలు ఎందుకు తీరలేదన్న ప్రశ్నకు.. "గత పదేళ్లుగా పెండింగ్ లో ఉన్న సమస్యలు తీరడానికి సమయం పడుతుంది. రేవంత్ రెడ్డి (Revanth Reddy) నేతృత్వంలోని కాంగ్రెస్ ప్రభుత్వం అధికారంలోకి వచ్చి కేవలం రెండేళ్లు (2026 నాటికి) మాత్రమే అయ్యింది. ఇప్పుడిప్పుడే ఒక్కో సమస్యను పరిష్కరిస్తున్నాం" అని రాజకీయ పరిణితితో సమాధానం ఇచ్చారు. ప్రాథమిక సమస్యల పరిష్కారమే తన తొలి అజెండా అని ఆమె తేల్చిచెప్పారు.
వారసత్వం గెలిపించింది.. పనితనం నిలబెట్టాలి!
24 ఏళ్లకే పదవి రావడం అదృష్టం. కానీ ప్రజల సమస్యలకు వయసుతో పనిలేదు, పరిష్కారం కావాలి. స్పీకర్ కూతురిగా కాకుండా, సమర్థవంతమైన లీడర్ గా అనన్య నిరూపించుకుంటేనే ఆమె రాజకీయ భవిష్యత్తుకు బలమైన పునాది పడుతుంది.
