నిన్న తగ్గినట్టే తగ్గి.. ఈరోజు మళ్లీ షాక్ ఇచ్చింది బంగారం. ఫిబ్రవరి 10న మార్కెట్ ఓపెన్ అవ్వగానే రేట్లు ఒక్కసారిగా పైకి లేచాయి. తులం బంగారం రేటు చూస్తుంటే సామాన్యుడి గుండె గుభేల్ మంటోంది. అయితే, ఈ ధరల మంట కేవలం కొనేవాడి జేబుకే కాదు.. బంగారాన్ని నమ్ముకున్న స్వర్ణకారుల పొట్ట కూడా కొడుతోంది. రేట్లు పెరిగితే వాళ్లకేంటి నష్టం అనుకుంటున్నారా? అసలు కథ తెలిస్తే కన్నీళ్లు ఆగవు. మెరుస్తున్న బంగారం వెనుక ఉన్న చీకటి కోణం ఇదే!
హైదరాబాద్లో తులం బంగారం @ రూ.1.58 లక్షలు!
అంతర్జాతీయ మార్కెట్లో హెచ్చుతగ్గుల ప్రభావం మన మార్కెట్ మీద గట్టిగా పడింది. ఎంసీఎక్స్ (MCX)లో బంగారం, వెండి ఫ్యూచర్స్ లాభాల్లో ట్రేడ్ అవుతున్నాయి. దీంతో దేశీయంగా రేట్లు పెరిగాయి.
హైదరాబాద్, విజయవాడ: 24 క్యారెట్ల (10 గ్రాములు) ధర రూ.1,57,920 కి చేరగా.. ఆభరణాల తయారీకి వాడే 22 క్యారెట్ల ధర రూ.1,44,750 గా నమోదైంది.
చెన్నైలో దడ: చెన్నైలో అయితే 24 క్యారెట్ల ధర ఏకంగా రూ.1,59,930 పలికింది.
వెండి: కిలో వెండి ధర షాకింగ్ గా రూ.3,00,100 వద్ద ట్రేడ్ అవుతోంది.
బంగారం మెరుస్తోంది.. బతుకు నల్లబడుస్తోంది
ధరలు పెరగడం ఇన్వెస్టర్లకు పండగేమో.. కానీ స్వర్ణకారులకు (Goldsmiths) మాత్రం అది శాపం.
పని దొరకట్లేదు: రేట్లు ఆకాశాన్ని తాకడంతో జనం కొత్త నగలు చేయించుకోవడం మానేశారు. కేవలం పాత బంగారం మార్చుకోవడానికే పరిమితం అవుతున్నారు. దీంతో కొత్త ఆర్డర్లు లేక స్వర్ణకారులు ఖాళీగా కూర్చోవాల్సి వస్తోంది.
వృత్తిని వదిలేస్తున్నారు: ఒకప్పుడు బంగారాన్ని కరిగించి అద్భుతాలు సృష్టించిన చేతులు.. ఇప్పుడు పొట్టకూటి కోసం ఆటో స్టీరింగ్ పడుతున్నాయి. మరికొందరు వాచ్మన్లుగా, గుమాస్తాలుగా మారుతున్నారు. వృత్తిని నమ్ముకుంటే బతుకు బస్టాండ్ అవుతోందని ఆవేదన చెందుతున్నారు. జ్యూయెలరీ షాపులు మూతపడే స్థితికి వచ్చాయి.
కొనేముందు ఒకటికి రెండుసార్లు..
ఈ రేట్లు (ఫిబ్రవరి 10 నాటివి) ఎప్పటికప్పుడు మారుతుంటాయి. ఉదయం ఉన్న రేటు సాయంత్రం ఉండకపోవచ్చు. ఎంసీఎక్స్ మార్కెట్ ను బట్టి నిమిషాల్లో మార్పులు ఉంటాయి. కాబట్టి షాపుకు వెళ్లేముందు లైవ్ రేట్స్ చెక్ చేసుకోండి.
పసిడి ధగధగలు.. పేదోడికి దడదడలు!
ధరలు తగ్గకపోతే.. సామాన్యుడికి బంగారం అందదు, స్వర్ణకారుడికి పని దొరకదు. ఇది ఇద్దరికీ నష్టమే. ప్రభుత్వం స్వర్ణకారుల రక్షణకు చర్యలు తీసుకోకపోతే.. ఈ కళ కనుమరుగయ్యే ప్రమాదం ఉంది.
