భారత్-అమెరికా మధ్య కుదిరిన ఆయిల్ డీల్ ఇప్పుడు ప్రపంచ రాజకీయాల్లో హాట్ టాపిక్గా మారింది. ఇన్నాళ్లు రష్యా నుంచి తక్కువ ధరకు చమురు కొనుగోలు చేస్తూ వచ్చిన భారత్, ఇప్పుడు ఆ నిర్ణయాన్ని మార్చుకోనుందా? అమెరికా ఒత్తిడికి తలొగ్గిందా లేక లాభసాటి ఒప్పందానికి జై కొట్టిందా? ఈ విషయంపై ఢిల్లీ వర్గాలు మౌనంగా ఉన్నప్పటికీ, అమెరికా మాత్రం మైకులు పెట్టి మరీ ప్రపంచానికి చాటిచెబుతోంది. తాజాగా అమెరికా విదేశాంగ మంత్రి మార్కో రూబియో చేసిన వ్యాఖ్యలు రష్యాకు మింగుడుపడటం లేదు. అసలు మ్యూనిక్ సదస్సులో ఏం జరిగింది? ట్రంప్ ఇచ్చిన బంపర్ ఆఫర్ ఏంటి?
అమెరికా విదేశాంగ శాఖ మంత్రి మార్కో రూబియో జర్మనీలోని మ్యూనిక్ సెక్యూరిటీ కాన్ఫరెన్స్లో చేసిన వ్యాఖ్యలు ఇప్పుడు సంచలనం సృష్టిస్తున్నాయి. రష్యా నుంచి చమురు దిగుమతులను నిలిపివేసేందుకు భారత్ సిద్ధంగా ఉందని, ఈ విషయంలో ఢిల్లీ నుంచి తమకు స్పష్టమైన హామీ లభించిందని ఆయన అధికారికంగా ధృవీకరించారు. అంతకుముందే అమెరికా అధ్యక్షుడు డొనాల్డ్ ట్రంప్ కూడా ఇదే విషయాన్ని ప్రస్తావించారు.
రష్యా చమురును ఆపేస్తే, దానికి ప్రతిఫలంగా భారతీయ ఉత్పత్తులపై ఉన్న సుంకాలను భారీగా తగ్గిస్తామని ట్రంప్ మాటిచ్చారు. చెప్పినట్లుగానే భారత వస్తువులపై 50 శాతంగా ఉన్న సుంకాన్ని ఏకంగా 18 శాతానికి తగ్గిస్తూ ఎగ్జిక్యూటివ్ ఆర్డర్పై సంతకం చేశారు. దీంతో భారతీయ ఎగుమతిదారులకు అమెరికా మార్కెట్లో రెడ్ కార్పెట్ పరిచినట్లయింది.
నిజానికి రష్యా-ఉక్రెయిన్ యుద్ధం మొదలైనప్పటి నుంచి భారత్ తన వైఖరిని చాలా స్పష్టంగా చెబుతూ వచ్చింది. తమ దేశ ఇంధన అవసరాలు, ఆర్థిక ప్రయోజనాలే ముఖ్యమని, అందుకే తక్కువ ధరకు దొరికే రష్యా చమురును కొంటున్నామని ప్రపంచ వేదికలపై కుండబద్దలు కొట్టింది. కానీ అమెరికాలో ట్రంప్ తిరిగి అధికారంలోకి వచ్చాక సమీకరణాలు వేగంగా మారిపోయాయి.
వాణిజ్య యుద్ధం కంటే సహకారమే మేలని భావించిన అగ్రరాజ్యం, చమురు దిగుమతులపై భారత్ను ఒప్పించడంలో సఫలమైందని రూబియో మాటల ద్వారా అర్థమవుతోంది. రష్యా ఆయిల్ బంద్ చేసి, అమెరికా మార్కెట్ ఓపెన్ చేసుకోవడం ద్వారా భారత్ ఒక వ్యూహాత్మక అడుగు వేసిందనే వాదన వినిపిస్తోంది.
రష్యా నుంచి చమురు నిలిపివేయడం వల్ల భారత్కు చమురు దిగుమతి ఖర్చులు పెరిగే అవకాశం ఉన్నప్పటికీ, అమెరికా ఇచ్చిన టారిఫ్ మినహాయింపు ఆ నష్టాన్ని భర్తీ చేస్తుందని ఆర్థిక నిపుణులు అంచనా వేస్తున్నారు. ముఖ్యంగా ఐటీ, ఫార్మా, టెక్స్టైల్ రంగాలకు ఈ నిర్ణయం వల్ల భారీ లాభాలు చేకూరనున్నాయి.
అయితే దశాబ్దాల నాటి మిత్రదేశం రష్యాకు భారత్ దూరం అవుతోందా అనే అనుమానాలు కూడా బలపడుతున్నాయి. రష్యా స్థానంలో భారత్ ఇకపై మిడిల్ ఈస్ట్ దేశాలు లేదా అమెరికా నుంచే ఎక్కువ చమురును దిగుమతి చేసుకునే అవకాశం ఉంది. ఇది అంతర్జాతీయ సంబంధాల్లో ఒక కొత్త అధ్యాయానికి తెరలేపింది.
వ్యాపారమే గెలిచింది!
రష్యాతో స్నేహం కంటే.. అమెరికాతో వ్యాపార ఒప్పందానికే భారత్ ఓటు వేసినట్లు కనిపిస్తోంది. ఇది దీర్ఘకాలంలో మన ఎకానమీకి బూస్ట్ ఇస్తుందా లేక ఇంధన కష్టాలు తెస్తుందా అనేది చూడాలి.
