దాయాదుల పోరులో ఓటమి అంటే కేవలం పాయింట్లు కోల్పోవడం మాత్రమే కాదు.. అది ఆత్మగౌరవంపై పడే దెబ్బ. నిన్న కొలంబో వేదికగా జరిగిన టీ20 వరల్డ్ కప్ మ్యాచ్లో భారత్ చేతిలో పాకిస్తాన్ చిత్తుగా ఓడిపోవడం ఆ జట్టును కోలుకోలేని దెబ్బ తీసింది.
మైదానంలో పరుగుల కోసం ఆపసోపాలు పడిన పాక్ ఆటగాళ్లు, మ్యాచ్ అనంతరం డ్రెస్సింగ్ రూమ్లో ముభావంగా ఉండిపోయారట. స్వయంగా పాక్ హెడ్ కోచ్ మైక్ హెస్సన్ (Mike Hesson) ఈ విషయాన్ని బయటపెట్టారు. అసలు పాక్ శిబిరంలో పరిస్థితి ఏంటి? ఈ ఘోర పరాజయం నుంచి వాళ్ళు కోలుకుని సూపర్-8 రేసులో నిలబడగలరా?
భారత్తో జరిగిన మ్యాచ్లో 61 పరుగుల భారీ తేడాతో ఓటమి పాలవ్వడం పాక్ జట్టును మానసికంగా కుంగదీసింది. మ్యాచ్ అనంతరం కోచ్ మైక్ హెస్సన్ మీడియాతో మాట్లాడుతూ డ్రెస్సింగ్ రూమ్లో వాతావరణం చాలా గంభీరంగా, నిరాశజనకంగా ఉందని అంగీకరించారు.
ఈ మ్యాచ్ పాకిస్థాన్కు, అభిమానులకు ఎంత ముఖ్యమో ఆటగాళ్లకు బాగా తెలుసు. అందుకే ఈ ఓటమి వారిని మానసికంగా బాగా దెబ్బతీసిందని హెస్సన్ ఆవేదన వ్యక్తం చేశారు. టాస్ గెలిచి బౌలింగ్ ఎంచుకోవడం సరైన నిర్ణయమే అని భావించినా, పిచ్ ఆరంభంలో స్పిన్కు సహకరించినా, ఇషాన్ కిషన్ ఆటతో మ్యాచ్ తమ చేజారిపోయిందని ఆయన విశ్లేషించారు.
భారత ఇన్నింగ్స్లో ఇషాన్ కిషన్ (Ishan Kishan) అద్భుత ప్రదర్శన పాక్ బౌలర్ల ఆశలపై నీళ్లు చల్లింది. తొలి ఓవర్లోనే అభిషేక్ శర్మ అవుటైనా, కిషన్ ఒత్తిడికి లోనుకాకుండా 77 పరుగులతో చెలరేగి జట్టును నిలబెట్టాడు. ఆ తర్వాత సూర్యకుమార్ యాదవ్, శివమ్ దూబే తమ వంతు పాత్ర పోషించడంతో భారత్ 175 పరుగుల భారీ స్కోరు సాధించింది.
176 పరుగుల లక్ష్య ఛేదనలో పాకిస్తాన్ బ్యాటింగ్ ఆర్డర్ పేకమేడలా కూలిపోయింది. భారత పేసర్ జస్ప్రీత్ బుమ్రా (Jasprit Bumrah) దెబ్బకు రెండో ఓవర్లోనే సైమ్ అయూబ్, కెప్టెన్ సల్మాన్ అలీ ఆఘా పెవిలియన్ చేరడంతో పాక్ పతనం మొదలైంది. కేవలం 13 పరుగులకే 3 వికెట్లు కోల్పోయిన దశలో, ఉస్మాన్ ఖాన్ 44 పరుగులతో కొంత పోరాటం చేసినా, మిగతా బ్యాటర్లు విఫలమవ్వడంతో 114 పరుగులకే కుప్పకూలింది.
ఈ ఓటమితో వరల్డ్ కప్ చరిత్రలో భారత్పై పాకిస్తాన్ రికార్డు మరింత దిగజారింది. మొత్తం తొమ్మిది మ్యాచ్ల్లో కేవలం ఒక్క విజయం మాత్రమే సాధించి దయనీయ స్థితిలో ఉంది. ప్రస్తుతం భారత్ వరుసగా మూడో గెలుపుతో సూపర్ 8కు అర్హత సాధించగా, పాకిస్తాన్ పరిస్థితి అగమ్యగోచరంగా మారింది.
ఇప్పుడు పాక్ భవితవ్యం నమీబియాతో జరగబోయే చివరి మ్యాచ్పై ఆధారపడి ఉంది. ఆ మ్యాచ్లో గెలిస్తేనే పాక్ సూపర్ 8కి చేరే అవకాశం ఉంటుంది. తాము మళ్లీ నిలదొక్కుకుంటామని, టోర్నీలో బలంగా తిరిగి వస్తామని కోచ్ హెస్సన్ విశ్వాసం వ్యక్తం చేస్తున్నప్పటికీ, ఆటగాళ్ళ మానసిక స్థితి మాత్రం ఆందోళనకరంగానే ఉంది.
పాక్ కు చావో రేవో!
ఇండియా చేతిలో ఓటమి పాక్ ఆత్మవిశ్వాసాన్ని దెబ్బతీసింది. ఇప్పుడు నమీబియా లాంటి చిన్న జట్టుతో గెలిచి పరువు కాపాడుకుంటారా లేక ఇంటి బాట పడతారా అన్నది చూడాలి.
