ఆరోగ్యం కోసం మార్కెట్లో దొరికే 'ఆర్గానిక్' కూరగాయలు, పప్పులు కొంటున్నారా? అయితే ఒక్క నిమిషం ఆలోచించండి. మీరు కొంటున్నది నిజంగా ఆర్గానికేనా? లేక ఆర్గానిక్ లేబుల్ అంటించిన నకిలీ సరుకా? ఈ అనుమానం ఇప్పుడు వినియోగదారులనే కాదు, నిజాయితీగా సాగు చేస్తున్న రైతులను కూడా పట్టిపీడిస్తోంది. కష్టపడి పండించిన పంటకు సరైన ధర రాక, నకిలీల బెడదతో సతమతమవుతున్న అన్నదాతలకు తెలంగాణ ప్రభుత్వం (Telangana Govt) తీపికబురు చెప్పింది. నకిలీలకు చెక్ పెడుతూ, అసలైన ఆర్గానిక్ రైతులకు లాభం చేకూర్చేలా ఒక ప్రత్యేకమైన 'యాప్' (App)ను తీసుకురాబోతోంది. మంత్రి తుమ్మల నాగేశ్వరరావు తీసుకున్న ఈ నిర్ణయం తెలంగాణ వ్యవసాయ ముఖచిత్రాన్ని ఎలా మార్చబోతోంది?
నకిలీల మాయ.. రైతుల ఆవేదన
తెలంగాణలో ఆర్గానిక్ సాగు క్రమంగా పెరుగుతోంది. ప్రస్తుతం సుమారు 50 వేల ఎకరాల్లో 10 వేల మందికి పైగా రైతులు ఎలాంటి రసాయనాలు, పురుగు మందులు వాడకుండా కేవలం జీవ పదార్థాలతోనే వ్యవసాయం చేస్తున్నారు. వరి, కూరగాయలు, పప్పు ధాన్యాలు, పండ్ల తోటలను సాగు చేస్తున్నారు. అయితే పంట చేతికొచ్చాక అసలు సమస్య మొదలవుతోంది. మార్కెటింగ్ ఎలా చేయాలో తెలియక, దళారులను నమ్ముకుని మోసపోతున్నారు. దీనికి తోడు మార్కెట్లో కొందరు వ్యాపారులు సాధారణ పంటలకే 'ఆర్గానిక్' అని బోర్డు పెట్టి అమ్మేస్తుండటంతో, నిజమైన రైతులకు అన్యాయం జరుగుతోంది. వినియోగదారులు కూడా ఏది ఒరిజినల్, ఏది డూప్లికేట్ అని తెలియక తికమక పడుతున్నారు.
మంత్రికి ఫిర్యాదు.. యాప్ కు శ్రీకారం
ఈ సమస్యపై ఇటీవల కొందరు రైతులు నేరుగా వ్యవసాయ శాఖ మంత్రి తుమ్మల నాగేశ్వరరావును కలిసి తమ గోడు వెళ్లబోసుకున్నారు. నకిలీ ఉత్పత్తుల వల్ల తాము నష్టపోతున్నామని, తమ పంటకు గుర్తింపు దక్కడం లేదని ఆవేదన వ్యక్తం చేశారు. దీనిపై స్పందించిన మంత్రి వెంటనే అధికారులను అప్రమత్తం చేశారు. దీనికోసం ప్రత్యేకంగా ఒక మొబైల్ యాప్ ను రూపొందించాలని ఆదేశించారు. టీఎస్ఎస్వోసీఏ (తెలంగాణ రాష్ట్ర విత్తన, సేంద్రియ ధ్రువీకరణ ప్రాధికార సంస్థ) ఆధ్వర్యంలో ఈ యాప్ రూపుదిద్దుకుంటోంది. త్వరలోనే ఇది రైతులకు అందుబాటులోకి రానుంది. వాస్తవానికి 2015లోనే టీఎస్ఎస్వోసీఏ ఏర్పాటైనా, చాలామంది రైతులు రిజిస్ట్రేషన్ చేసుకోకపోవడం, లైసెన్సుల పట్ల అవగాహన లేకపోవడం వల్ల ఇబ్బందులు తలెత్తుతున్నాయి. ఇప్పుడు ఈ కొత్త యాప్ ద్వారా ఆ సమస్యలన్నింటికీ పరిష్కారం లభించనుంది.
యాప్ లో ఏముంటుంది? ఎలా పనిచేస్తుంది?
ఈ కొత్త యాప్ లో రాష్ట్రంలో ఆర్గానిక్ సాగు చేస్తున్న ప్రతి రైతు సమాచారాన్ని పొందుపరుస్తారు. ఏ రైతు, ఏ గ్రామంలో, ఎన్ని ఎకరాల్లో, ఏ పంట సాగు చేస్తున్నాడనే వివరాలతో పాటు వారి ఫోటోలు, వీడియోలు, మొబైల్ నంబర్లను కూడా ఇందులో ఉంచుతారు. పంట ఎప్పుడు చేతికి వస్తుందో కూడా ముందుగానే అప్డేట్ చేస్తారు. దీనివల్ల వినియోగదారులు లేదా వ్యాపారులు నేరుగా రైతును సంప్రదించే అవకాశం ఉంటుంది. అంతేకాకుండా ఈ యాప్ ను కేంద్ర, రాష్ట్ర ప్రభుత్వాల వ్యవసాయ యాప్ లతో అనుసంధానం చేస్తారు. దీనివల్ల ఎగుమతి సంస్థలు కూడా మన రైతుల ఉత్పత్తులను సులభంగా గుర్తిస్తాయి. ఫలితంగా దళారుల ప్రమేయం లేకుండా రైతుకు గిట్టుబాటు ధర లభిస్తుంది, వినియోగదారుడికి స్వచ్ఛమైన ఆర్గానిక్ ఆహారం దొరుకుతుంది.
నకిలీల ఆట కట్టు.. అసలైన రైతుకు పట్టాభిషేకం!
టెక్నాలజీని వాడుకుంటే వ్యవసాయం కూడా లాభసాటిగా మారుతుందని ఈ నిర్ణయం నిరూపిస్తోంది. ఈ యాప్ వస్తే తెలంగాణలో ఆర్గానిక్ విప్లవం మరింత వేగం పుంజుకోవడం ఖాయం.
