క్రికెట్ అంటే మన దేశంలో ఒక మతం.. టీమిండియా మ్యాచ్ ఉందంటే సామాన్యుడికి పండగే! కానీ, ఐసీసీ టీ20 వరల్డ్ కప్ సూపర్-8 దశలో ఇప్పుడు సగటు భారతీయ అభిమాని గుండెల్లో రైళ్లు పరిగెత్తుతున్నాయి. మన సెమీస్ ఆశలు మన చేతుల్లో కాకుండా వేరే జట్ల ప్రదర్శనపై ఆధారపడే దారుణమైన పరిస్థితి వచ్చేసింది.
అహ్మదాబాద్లోని నరేంద్ర మోదీ స్టేడియం వేదికగా నేడు (మధ్యాహ్నం 3 గంటలకు) వెస్టిండీస్-సౌతాఫ్రికా (WI vs SA) జట్ల మధ్య మ్యాచ్ జరగనుంది. అసలు ఈ రెండు జట్లు ఆడుతుంటే మనమెందుకు టెన్షన్ పడాలి? ఈ మ్యాచ్లో ఎవరు గెలిస్తే టీమిండియాకు సెమీస్ వెళ్లే ఛాన్స్ ఉంటుంది? క్రికెట్ అభిమానులను గందరగోళానికి గురిచేస్తున్న నెట్ రన్ రేట్ లెక్కలేంటో క్లియర్గా చూద్దాం.
సౌతాఫ్రికా దెబ్బ.. ప్రమాదంలో సెమీస్ బెర్త్!
సూపర్-8 తొలి మ్యాచ్లో సౌతాఫ్రికా చేతిలో 76 పరుగుల తేడాతో టీమిండియా ఘోర పరాజయం పాలైంది. ఈ ఒక్క ఓటమితో భారత్ నెట్రన్రేట్ (NRR) ఏకంగా –3.800 కి పడిపోయింది.
ఒకవేళ సూపర్-8లో మూడు జట్లు ఆరు పాయింట్లతో సమానంగా నిలిస్తే, నెట్రన్రేట్ ఆధారంగానే సెమీఫైనల్ బెర్త్ ఖరారవుతుంది. సరిగ్గా 2012 టీ20 వరల్డ్కప్లోనూ మనకు ఇలాంటి పరిస్థితే ఎదురైంది. అప్పట్లో భారత్ రెండు మ్యాచ్లు గెలిచినా, తక్కువ నెట్రన్రేట్ కారణంగా టోర్నీ నుంచి అవమానకరంగా నిష్క్రమించింది. ఇప్పుడు ఆ పీడకల మళ్లీ రిపీట్ అయ్యేలా కనిపిస్తోంది.
మనవాళ్లు సేఫ్ అవ్వాలంటే ఏం జరగాలి?
టీమిండియా సెమీస్ బరిలో నిలవాలంటే ఈ రోజు రెండు అద్భుతాలు జరగాలి.
- మొదటిది: మధ్యాహ్నం 3 గంటలకు జరిగే మ్యాచ్లో వెస్టిండీస్పై సౌతాఫ్రికా కచ్చితంగా గెలవాలి.
- రెండోది: రాత్రి 7 గంటలకు జింబాబ్వేతో జరిగే మ్యాచ్లో భారత్ భారీ తేడాతో ఘన విజయం సాధించాలి.
ఈ రెండు జరిగితే సౌతాఫ్రికా నేరుగా సెమీస్కు వెళుతుంది. అప్పుడు మార్చి 1న జరిగే భారత్-వెస్టిండీస్ మ్యాచ్.. 'వర్చువల్ క్వార్టర్ ఫైనల్'గా మారుతుంది. ఆ మ్యాచ్లో ఎవరు గెలిస్తే వాళ్లే దర్జాగా సెమీస్లో అడుగుపెడతారు.
అహ్మదాబాద్ పిచ్ ఎవరికి ప్లస్?
నరేంద్ర మోదీ స్టేడియంలో సౌతాఫ్రికాకు అద్భుతమైన ట్రాక్ రికార్డ్ ఉంది. ఈ వరల్డ్కప్లో సఫారీ జట్టు దాదాపు అన్ని మ్యాచ్లు ఇక్కడే ఆడి, అన్నింటిలోనూ గెలిచింది. మన టీమిండియాను చిత్తు చేసింది కూడా ఇక్కడే. కాబట్టి ప్రొటీస్ (సౌతాఫ్రికా) జట్టుకు ఇది అతిపెద్ద అడ్వాంటేజ్.
మరోవైపు విండీస్ టీమ్ భీకర ఫామ్లో ఉంది. వరుసగా ఐదు విజయాలతో చెలరేగుతోంది. ఇటీవల జింబాబ్వేపై టీ20 వరల్డ్కప్ చరిత్రలోనే రెండో అత్యధిక స్కోరు సాధించి ప్రత్యర్థులకు వణుకు పుట్టిస్తోంది.
హెడ్-టు-హెడ్ రికార్డులు ఇవే!
టీ20ల్లో సౌతాఫ్రికాపై వెస్టిండీస్కు స్వల్ప ఆధిక్యం ఉంది. ఇప్పటివరకు ఈ రెండు జట్లు 29 మ్యాచ్ల్లో తలపడగా.. వెస్టిండీస్ 15, సౌతాఫ్రికా 14 గెలిచాయి.
అయితే, ఐసీసీ వరల్డ్కప్ మ్యాచ్ల విషయానికి వస్తే మాత్రం సౌతాఫ్రికాదే కంప్లీట్ ఆధిపత్యం. వరల్డ్ కప్ వేదికగా జరిగిన ఐదు మ్యాచ్ల్లో నాలుగు సార్లు సఫారీ జట్టే విజయం సాధించింది.
సఫారీలకే ఫుల్ సపోర్ట్!
ఈ రోజు మధ్యాహ్నం టీమిండియా అభిమానులంతా 'సౌతాఫ్రికా' జెండా పట్టుకోవాల్సిందే. అహ్మదాబాద్ పిచ్పై సఫారీ బౌలర్ల పేస్ను విండీస్ పవర్ హిట్టర్లు ఎలా ఎదుర్కొంటారనే దానిపైనే మ్యాచ్ ఫలితం ఆధారపడి ఉంటుంది. రికార్డులు, ప్రస్తుత పిచ్ కండిషన్స్ చూస్తుంటే సౌతాఫ్రికా ఈ మ్యాచ్లో గెలిచి, భారత్కు సెమీస్ దారులు తెరిచే అవకాశాలే ఎక్కువగా కనిపిస్తున్నాయి!
