78-Year-Old Delivery Boy: భార్య వైద్యం కోసం 78 ఏళ్ల వయసులో ఫుడ్ డెలివరీ.. సోషల్ మీడియా పవర్ తో రాత్రికి రాత్రే కోటీశ్వరుడయ్యాడు!
సాధారణంగా 60 ఏళ్లు రాగానే రిటైర్మెంట్ తీసుకుని విశ్రాంతి తీసుకుంటారు. కానీ 78 ఏళ్ల వయసులో, చేతికర్ర సాయంతో నడవాల్సిన పరిస్థితుల్లో ఒక వృద్ధుడు ఇంటింటికీ ఫుడ్ డెలివరీ చేస్తే ఎలా ఉంటుంది? వినడానికే చాలా బాధగా ఉంది కదూ. అమెరికాలోని టేనస్సీలో అచ్చం ఇలాంటి ఘటనే జరిగింది. ఉద్యోగం, ఇన్సూరెన్స్ పోయిన తన భార్య వైద్య ఖర్చుల కోసం ఆ వయసులో డెలివరీ బాయ్ గా మారిన రిచర్డ్ పుల్లీ అనే వృద్ధుడి కథ ఇప్పుడు ఇంటర్నెట్ ను కంటతడి పెట్టిస్తోంది. అయితే ఒకే ఒక్క సీసీటీవీ వీడియో, సోషల్ మీడియా పవర్ ఆ వృద్ధుడి జీవితాన్ని రాత్రికి రాత్రే ఎలా మార్చేశాయో తెలిస్తే మీరు కచ్చితంగా ఆశ్చర్యపోతారు.
భార్య కోసం వృద్ధాప్యంలో జీవన పోరాటం
రిచర్డ్ పుల్లీ వయసు 78 ఏళ్లు. ఆయన అప్పటికే తన ఉద్యోగ జీవితం ముగించుకుని రిటైర్మెంట్ తీసుకున్నారు. భార్య బ్రెండాతో కలిసి ప్రశాంతంగా విశ్రాంతి తీసుకోవాల్సిన ఆ వయసులో విధి వారిపై పగబట్టింది. బ్రెండా హఠాత్తుగా తన ఉద్యోగం కోల్పోవడంతో, ఆమెకు వచ్చే హెల్త్ ఇన్సూరెన్స్ కూడా ఆగిపోయింది. అదే సమయంలో ఆమె తీవ్ర అనారోగ్యం పాలు కావడంతో ఇంటి అద్దె, వైద్య ఖర్చులు భరించడం ఆ వృద్ధ దంపతులకు తలకు మించిన భారమైంది. నెలాఖరు వచ్చేసరికి చేతిలో చిల్లిగవ్వ కూడా మిగిలేది కాదని రిచర్డ్ ఆవేదన వ్యక్తం చేశారు. వేరే దారి లేక, ఆ వృద్ధ దంపతులిద్దరూ కలిసి ఫుడ్ డెలివరీ యాప్ లో చేరారు. భార్య బ్రెండా నెమ్మదిగా కారు నడుపుతుంటే, రిచర్డ్ ఆ వయసులో చేత్తో ఆహారాన్ని పట్టుకుని ఇళ్లకు డెలివరీ చేసేవాడు. 56 ఏళ్ల వారి వైవాహిక జీవితంలో కష్టకాలంలో ఒకరికొకరు తోడుగా నిలబడ్డారు.
జీవితాన్ని మార్చేసిన ఆ ఒక్క వీడియో
ఒకరోజు బ్రిటనీ స్మిత్ అనే మహిళ ఇంటికి రిచర్డ్ ఫుడ్ డెలివరీ చేయడానికి వెళ్లినప్పుడు ఈ కథ అనూహ్య మలుపు తిరిగింది. ఒక వృద్ధుడు నెమ్మదిగా, వణుకుతున్న అడుగులతో జాగ్రత్తగా తన తలుపు దగ్గరకు వచ్చి, స్టార్బక్స్ ఆర్డర్ ఇచ్చి వెళ్లడాన్ని ఆమె ఇంటి బయట ఉన్న సీసీటీవీ కెమెరాలో చూసి చలించిపోయింది. ఆ వయసులో ఆయన పడుతున్న కష్టాన్ని చూసి కంటతడి పెట్టిన బ్రిటనీ.. వెంటనే ఆ వీడియోను టిక్టాక్లో షేర్ చేసి, "ఈ వృద్ధుడు ఎవరో తెలిస్తే చెప్పండి" అని నెటిజన్లను కోరింది. ఆ వీడియో గంటల్లోనే వైరల్ కావడంతో, నెటిజన్లు ఆయన రిచర్డ్ పుల్లీ అని, భార్య వైద్యం కోసం పని చేస్తున్నాడని అసలు కథను కనిపెట్టేశారు.
వెల్లువెత్తిన విరాళాలు.. రూ.4 కోట్లు వసూలు
రిచర్డ్ కష్టాన్ని చూసి చలించిపోయిన బ్రిటనీ స్మిత్, ఆ వృద్ధ దంపతులు ఇకపై పని చేయకుండా హాయిగా రిటైర్మెంట్ జీవితం గడిపేలా 'గో ఫండ్ మీ' (GoFundMe) లాంటి ప్లాట్ ఫామ్ ద్వారా ఆన్లైన్ ఫండ్ రైజింగ్ (నిధుల సేకరణ) ప్రారంభించింది. ఈ ప్రచారానికి సోషల్ మీడియాలో అఖండమైన మద్దతు లభించింది. కొన్ని రోజుల్లోనే ప్రపంచవ్యాప్తంగా వేలాది మంది అపరిచితులు విరాళాలు ఇవ్వడంతో, ఆ ఫండ్ ఏకంగా 5 లక్షల డాలర్లు (అంటే మన భారతీయ కరెన్సీలో సుమారు రూ. 4 కోట్లు) దాటిపోయింది. ఆ తర్వాత స్థానిక రెస్టారెంట్లో రిచర్డ్ దంపతులను కలిసిన బ్రిటనీ, వారికి ఆ నిధుల పేజీని చూపించింది. ఏ పరిచయం లేని ఎంతోమంది అపరిచితులు తమ కోసం కోట్ల రూపాయలు విరాళంగా ఇచ్చారని తెలుసుకుని ఆ వృద్ధ దంపతులు భావోద్వేగంతో కన్నీరు పెట్టుకున్నారు.
NEW: Internet users have raised $280,000 for an elderly man who became a DoorDash delivery driver to help pay for his and his wife's bills.
— Collin Rugg (@CollinRugg) March 12, 2026
A Tennessee woman decided to take matters into her own hands when she saw the man delivering her Starbucks.
"I work because I have to. I… pic.twitter.com/qWIXG8ZzSt
సోషల్ మీడియాను కేవలం నెగెటివిటీకి, ట్రోల్స్ కే కాకుండా ఇలా ఒక మంచి పనికి వాడితే ఒక నిరుపేద కుటుంబం జీవితం ఎలా మారుతుందో చెప్పడానికి ఈ ఘటనే బెస్ట్ ఎగ్జాంపుల్. టెక్నాలజీ అనేది కరెక్ట్ గా వాడితే మానవత్వాన్ని బతికించే అద్భుతమైన ఆయుధం. మన చుట్టుపక్కల కూడా ఇలాంటి కష్టాల్లో ఉన్నవారు కనిపిస్తే, మన వంతు సాయం చేయకపోయినా కనీసం ఒక చిన్న వీడియో తీసి సోషల్ మీడియాలో పెట్టినా వాళ్ల తలరాత మారిపోవచ్చు.
