ఎక్కడో ఇరాన్, ఇజ్రాయెల్ బాంబులు వేసుకుంటే మనకేంటి అని లైట్ తీసుకునే పరిస్థితి ఏమాత్రం లేదు. రేపు పొద్దున మీరు బండిలో పెట్రోల్ కొట్టించాలన్నా, వంటగదిలో గ్యాస్ సిలిండర్ మార్చాలన్నా కళ్లు బైర్లు కమ్మే రేట్లు చూడబోతున్నారు. అమెరికా, ఇజ్రాయెల్ దాడులకు కోపంతో రగిలిపోతున్న ఇరాన్.. ప్రపంచ చమురు రవాణాకు గుండెకాయ లాంటి హార్ముజ్ జలసంధిని పూర్తిగా మూసివేసింది. దీని ఎఫెక్ట్ తో గ్లోబల్ మార్కెట్లో క్రూడాయిల్, గ్యాస్ రేట్లు రాకెట్ లా దూసుకుపోతున్నాయి. అసలు ఈ యుద్ధం వల్ల మన దేశం మీద ఎన్ని లక్షల కోట్ల భారం పడబోతోందో, ఒక సామాన్యుడిగా మన నిత్యావసరాల బడ్జెట్ ఎలా తలకిందులు కాబోతోందో ఇప్పుడు తెలుసుకుందాం.
ఒక డాలర్ పెరిగితే.. 13 వేల కోట్ల భారం
మన భారతదేశం ముడి చమురు అవసరాల కోసం ఏకంగా ఎనభై ఎనిమిది శాతం దిగుమతుల పైనే ఆధారపడింది. అమెరికా ఆంక్షల వల్ల రష్యా నుంచి చమురు కొనడం ఆపేసిన మనం, ఇప్పుడు పూర్తిగా పశ్చిమాసియా దేశాల వైపే చూస్తున్నాం. మన దేశం రోజుకు ఐదున్నర మిలియన్ బ్యారెళ్ల చమురు వాడుతుంటే, అందులో దాదాపు రెండు మిలియన్ బ్యారెళ్లు కేవలం ఈ హార్ముజ్ జలసంధి నుంచే మనకు రావాలి.
ఇప్పుడు ఇరాన్ ఆ రూట్ ను మూసేయడంతో బ్రెంట్ క్రూడాయిల్ బ్యారెల్ ధర 82 డాలర్లు దాటిపోయి, గత ఏడాది జనవరి తర్వాత రికార్డు స్థాయికి చేరుకుంది. ఈ పరిస్థితుల్లో క్రూడాయిల్ ధర ఒక్క డాలర్ పెరిగినా సరే, మన భారత ప్రభుత్వంపై ఏడాదికి అక్షరాలా 13 వేల కోట్ల రూపాయల అదనపు భారం పడుతుంది. గత ఏడాది మన దేశం 14.40 లక్షల కోట్ల రూపాయల చమురును దిగుమతి చేసుకుంటే, ఈసారి ఆ బిల్లు ఊహకందనంత స్థాయికి చేరబోతోందని ఆర్థిక నిపుణులు విశ్లేషిస్తున్నారు.
కంటైనర్ల అదనపు బాదుడు.. నిత్యావసరాలకు రెక్కలు
చమురు దెబ్బ ఒకవైపు అయితే, రవాణా ఖర్చుల దెబ్బ సామాన్యుడి నడ్డి విరుస్తోంది. యుద్ధం కారణంగా యూఏఈ, సౌదీ, ఖతార్ లాంటి 13 గల్ఫ్ దేశాలు ఇప్పుడు షిప్పింగ్ పై అత్యవసర సర్ ఛార్జీలు వసూలు చేస్తున్నాయి. దీంతో సముద్ర మార్గంలో వచ్చే ఒక్కో సరుకు రవాణా కంటైనర్ పై ఏకంగా రెండు వేల నుంచి నాలుగు వేల డాలర్ల వరకు అదనపు భారం పడుతోంది.
అంటే మన కరెన్సీలో ఒక్కో కంటైనర్ కు లక్షా ఎనభై వేల నుంచి మూడు లక్షల అరవై వేల రూపాయల వరకు ఎక్స్ట్రా కట్టాల్సి వస్తుంది. ఈ భారాన్ని కంపెనీలు తమ జేబులోంచి భరించవు కాబట్టి, సబ్బులు, పప్పులు, ఎలక్ట్రానిక్స్ లాంటి మనం రోజూ వాడే ప్రతి వస్తువు రేటు అమాంతం పెరిగిపోవడం ఖాయంగా కనిపిస్తోంది.
ఖతార్ వార్నింగ్.. భగ్గుమంటున్న వంట గ్యాస్
పెట్రోల్, నిత్యావసరాలే కాకుండా ఇప్పుడు వంట గ్యాస్ వంతు కూడా వచ్చింది. పశ్చిమాసియాలో ఈ యుద్ధం ఇలాగే కొనసాగితే ఎల్ఎన్జీ (LNG) ఉత్పత్తిని పూర్తిగా నిలిపివేస్తామని ఖతార్ ఎనర్జీ సంస్థ తీవ్ర హెచ్చరికలు జారీ చేసింది. ఈ ఒక్క స్టేట్మెంట్ తో గ్లోబల్ మార్కెట్లో గ్యాస్ ధరలు ఒక్కసారిగా 42 శాతం మేర పెరిగిపోయాయి. ఇదంతా పరోక్షంగా మన దేశంలో ద్రవ్యోల్బణాన్ని పెంచి సామాన్యుడి నెలవారీ బడ్జెట్ ను శాశ్వతంగా దెబ్బతీయబోతోంది.
యుద్ధం రెండు దేశాల మధ్య జరిగినా, ఆర్థిక విధ్వంసం మాత్రం ప్రపంచమంతా పరుచుకుంటుంది అనడానికి ప్రస్తుత గల్ఫ్ సంక్షోభమే అతిపెద్ద ఉదాహరణ. రాబోయే వారాల్లో మన బంకుల్లో పెట్రోల్, డీజిల్, ఇళ్లలో వాడే గ్యాస్ ధరలతో పాటు రవాణా ఖర్చులు పెరిగి ప్రతి వస్తువు రేటు మండిపోవడం తథ్యం. కాబట్టి ఒక సామాన్యుడిగా వ్యక్తిగత వాహనాల వాడకాన్ని తగ్గించి ఇంధనాన్ని పొదుపుగా వాడుకోవడంతో పాటు, రాబోయే ఈ ద్రవ్యోల్బణ తుఫానును ఎదుర్కోవడానికి అనవసర ఖర్చులకు కళ్లెం వేసి ఆర్థికంగా సిద్ధంగా ఉండటమే ఇప్పుడున్న ఏకైక మార్గం.
