ఎక్కడో మధ్యప్రాచ్యంలో యుద్ధం జరిగితే, ఇక్కడ ఇండియాలో బతుకుతున్న సామాన్యుడికి ఏంటి సంబంధం అనుకుంటున్నారా? కచ్చితంగా సంబంధం ఉంది! మీరు దుబాయ్ లో ఉద్యోగానికి వెళ్లాలన్నా, బిజినెస్ పని మీద దేశీయంగా ముంబై, ఢిల్లీ వెళ్లాలన్నా ఇప్పుడు విమానాశ్రయాల్లో చుక్కలు కనిపిస్తున్నాయి.
మధ్యప్రాచ్యంలో రగులుతున్న ఉద్రిక్తతల కారణంగా భారత గగనతలంలో తీవ్ర గందరగోళం నెలకొంది. ఆదివారం (మార్చి 1వ తేదీన) ఏకంగా 350కి పైగా విమానాలు రద్దు కావడం ప్రయాణికులను ఆందోళనకు గురిచేస్తోంది. అసలు ఎయిర్ పోర్టుల్లో ఏం జరుగుతోంది? ముందే టికెట్ బుక్ చేసుకున్న వారి పరిస్థితి ఏంటి?
ఢిల్లీ, ముంబై విమానాశ్రయాల్లో కల్లోలం
పౌర విమానయాన మంత్రిత్వ శాఖ (MoCA) తాజా డేటా ప్రకారం.. మిడిల్ ఈస్ట్ గగనతలంలో ఆంక్షల వల్ల మన విమానయాన రంగం తీవ్ర అంతరాయాన్ని ఎదుర్కొంటోంది. ప్రారంభంలో 444 విమానాలు రద్దు అవుతాయని భావించినా, అది 350కి పరిమితం కావడం కాస్త ఊరటనిచ్చే అంశం.
కానీ శనివారం (ఫిబ్రవరి 28న) కూడా 410 దేశీయ విమానాలు రద్దు అయ్యాయి. దేశంలో అత్యంత రద్దీగా ఉండే ఢిల్లీ ఇందిరా గాంధీ ఎయిర్పోర్టులో 100 విమానాలు నిలిచిపోగా, ముంబైలో ఏకంగా 125 విమానాలు రద్దు అయ్యాయి.
దీంతో అన్ని ప్రధాన విమానాశ్రయాలను కేంద్రం అప్రమత్తం చేసింది. ప్రయాణికుల రద్దీని తట్టుకునేందుకు, ఊహించని మళ్లింపులను సజావుగా నిర్వహించేందుకు ఎయిర్ పోర్టుల్లో సీనియర్ అధికారులను ప్రత్యేకంగా నియమించారు.
ఎయిర్ ఇండియా, స్పైస్జెట్ సర్వీసులపై బ్రేక్
ఈ ఎఫెక్ట్ కేవలం డొమెస్టిక్ ఫ్లైట్స్ కే పరిమితం కాలేదు. టాటా గ్రూప్ ఆధ్వర్యంలోని ఎయిర్ ఇండియా (Air India) ఆదివారం అదనంగా మరో 22 అంతర్జాతీయ సర్వీసులను రద్దు చేసింది. దీంతో మధ్యప్రాచ్య సంక్షోభం వల్ల రద్దైన మొత్తం ఇంటర్నేషనల్ ఫ్లైట్స్ సంఖ్య 50కి చేరింది.
మిడిల్ ఈస్ట్ మీదుగా వెళ్లే ఎంపిక చేసిన విమానాలను ఎయిర్ ఇండియా మార్చి 2 వరకు సస్పెండ్ చేసింది. మరోవైపు స్పైస్జెట్ (SpiceJet) కూడా మార్చి 2 వరకు ఇండియా - యూఏఈ (UAE) మధ్య 33 విమానాలను క్యాన్సిల్ చేసింది. ఎమిరేట్స్, లుఫ్తాన్సా విమానాల కార్యకలాపాలపైనా తీవ్ర ప్రభావం పడింది.
టికెట్ బుక్ చేసుకున్న వారికి ఏంటి పరిస్థితి?
ముందస్తుగా టికెట్లు బుక్ చేసుకున్న, అత్యవసర ప్రయాణాలు పెట్టుకున్న సామాన్యులకు ఇప్పుడు పెద్ద టెన్షన్ పట్టుకుంది. అయితే ప్రయాణికుల ఆర్థిక నష్టాన్ని తగ్గించేందుకు ఇండిగో (IndiGo), ఎయిర్ ఇండియా సంస్థలు కీలక ప్రకటన చేశాయి.
మిడిల్ ఈస్ట్ కు వెళ్లేవారికి లేదా అక్కడినుంచి వచ్చే వారికి ఎలాంటి అదనపు ఛార్జీలు లేకుండా టికెట్ రీ-షెడ్యూల్ చేసుకోవడానికి లేదా పూర్తి డబ్బులు వాపసు (Full Refund) పొందేందుకు ఛాన్స్ ఇచ్చాయి. మార్చి 7 వరకు ప్రయాణానికి ఫిబ్రవరి 28లోపు బుక్ చేసుకున్న వారికి ఇండిగో ఈ మినహాయింపు ఇస్తుండగా.. ఎయిర్ ఇండియా మార్చి 5 ప్రయాణాలకు ఈ వెసులుబాటు కల్పించింది.
ప్రయాణాలకు ముందే అప్రమత్తం అవ్వండి!
మధ్యప్రాచ్యంలో యుద్ధ మేఘాలు ఇప్పట్లో చల్లారేలా కనిపించడం లేదు. రాబోయే కొద్ది రోజుల పాటు గల్ఫ్ దేశాలకు, లేదా మిడిల్ ఈస్ట్ మీదుగా యూరప్, అమెరికాలకు ప్రయాణించే ప్లాన్స్ ఉంటే వాయిదా వేసుకోవడం ఉత్తమం. ముఖ్యంగా నాన్-రిఫండబుల్ టికెట్లు బుక్ చేసుకోవద్దు. ఒకవేళ మీ ప్రయాణం తప్పనిసరి అయితే, ఇంటి నుంచి ఎయిర్ పోర్టుకు బయలుదేరే ముందే విమానయాన సంస్థ వెబ్ సైట్ లో మీ ఫ్లైట్ స్టేటస్ ఆన్లైన్లో చెక్ చేసుకోండి. ఉచిత రీ-షెడ్యూలింగ్ ఆప్షన్లను సద్వినియోగం చేసుకుని, ఆర్థిక నష్టం జరగకుండా ప్లాన్ చేసుకోండి.
