సొంతూళ్లో పనులు దొరక్క, కుటుంబ పోషణ కోసం లక్షలు అప్పుచేసి గల్ఫ్ దేశాలకు వెళ్లిన మనోళ్ల పరిస్థితి ఇప్పుడు అగమ్యగోచరంగా మారింది. సాయంత్రం నాలుగు గంటలు దాటిందంటే చాలు.. బాంబుల మోతలతో పశ్చిమాసియా దద్దరిల్లుతోంది. ఇరాన్, ఇజ్రాయెల్ యుద్ధం ఇప్పుడు ఏకంగా సౌదీ, యూఏఈ లాంటి దేశాలకు పాకడంతో ప్రాణాలు అరచేతిలో పెట్టుకుని మనోళ్లు బంకర్లలో తలదాచుకుంటున్నారు. ఎడారి దేశాల్లో తెలంగాణ నుంచి వెళ్లిన 15 లక్షల మంది బిడ్డలు ఏమైపోతారో అని ఇక్కడ ఊర్లలో తల్లులు, భార్యలు కన్నీరుమున్నీరవుతున్నారు. ఈ టెన్షన్ల మధ్య తెలంగాణ సర్కార్ కీలక నిర్ణయం తీసుకుంది. మీ వాళ్లు గల్ఫ్లో ఉంటే వారి సమాచారం తెలుసుకోవడానికి, వారిని రక్షించడానికి ఢిల్లీలో కంట్రోల్ రూమ్ సహా పలు దేశాల ఎమర్జెన్సీ నంబర్లను అందుబాటులోకి తెచ్చింది. ఆ నంబర్లు ఏంటో ఇప్పుడు తెలుసుకుందాం.
ఎడారి దేశాల్లో 15 లక్షల మంది మనోళ్లే!
కష్టపడితే నాలుగు డబ్బులు ఎక్కువ వస్తాయనే ఆశతో తెలంగాణ నుంచి సుమారు 15 లక్షల మందికి పైగా కార్మికులు గల్ఫ్ దేశాలకు వలస వెళ్లినట్లు ప్రభుత్వ అంచనా. ఇందులో అత్యధికంగా 9 లక్షల మంది ఒక్క ఉత్తర తెలంగాణకు చెందినవారే ఉండటం గమనార్హం. ఉమ్మడి కరీంనగర్, నిజామాబాద్, ఆదిలాబాద్ జిల్లాల నుంచి లక్షలాది మంది సౌదీ అరేబియా, దుబాయ్, ఒమన్, ఖతార్ లాంటి దేశాల్లో కార్మికులుగా పనిచేస్తున్నారు. ఒక్క ఇజ్రాయెల్లోనే నిజామాబాద్ జిల్లా నుంచి 700 మంది పనిచేస్తున్నట్లు సమాచారం.
బంకర్లలో ప్రాణాలు గుప్పెట్లో..
అమెరికా, ఇజ్రాయెల్ దాడులకు కోపంతో రగిలిపోతున్న ఇరాన్.. గల్ఫ్ దేశాలపై డ్రోన్లు, క్షిపణులతో విరుచుకుపడుతోంది. దీంతో అక్కడ కంపెనీలన్నీ మూతపడ్డాయి. గత రెండు రోజులుగా వలస కార్మికులంతా అండర్ గ్రౌండ్ బంకర్లలోనే తలదాచుకుంటున్నారు. రాత్రి అయితే చాలు బాంబుల శబ్దాలతో నిద్రలేని రాత్రులు గడుపుతున్నారు. ఇక్కడ ఉన్న కుటుంబ సభ్యులకు ఫోన్లు చేసి తాము క్షేమంగానే ఉన్నామని చెబుతున్నా, ఆ భయానక వాతావరణం వీడియోల్లో చూసి ఇక్కడి వాళ్లు బిక్కుబిక్కుమంటూ బతుకుతున్నారు.
రంగంలోకి తెలంగాణ సర్కార్.. ఇవే టోల్ ఫ్రీ నంబర్లు!
గల్ఫ్ సంక్షోభంపై సీఎం రేవంత్ రెడ్డి వెంటనే స్పందించి ఢిల్లీలోని తెలంగాణ భవన్లో ఒక ప్రత్యేక కంట్రోల్ రూమ్ను ఏర్పాటు చేశారు. విదేశాంగ శాఖతో, ఆయా దేశాల్లోని భారత ఎంబసీలతో ఎప్పటికప్పుడు మాట్లాడుతూ మన వాళ్ల భద్రతను పర్యవేక్షిస్తున్నారు. అత్యవసరమైతే తప్ప కార్మికులు బంకర్ల నుంచి బయటకు రావొద్దని సర్కార్ సూచించింది. మీ బంధువులు గల్ఫ్లో ఉంటే వారి క్షేమ సమాచారం తెలుసుకోవడానికి లేదా అత్యవసర సాయం కోసం వెంటనే ఈ క్రింది నంబర్లను సంప్రదించండి.
ఢిల్లీ తెలంగాణ భవన్ కంట్రోల్ రూమ్ (24/7): 9871999044, 58322143, 991014749, 9643723157
నిజామాబాద్ కంట్రోల్ రూమ్: 87126 59700, 87126 59821
యూఏఈ (అబుదాబీ): 800-46342, వాట్సాప్: +971543 090571
కువైట్: +96565 501946
బహ్రెయిన్: 00973-39418071
ఒమన్ (మస్కట్): 800 71 234
సౌదీ అరేబియా: 00 966 114 884 697
ఖతార్ (దోహా): 00974 5564 7502
ఇరాన్ (టెహ్రాన్): +9891 281 09115
ఇరాక్ (బాగ్దాద్): +964 771 651 1185
ఈ కష్ట సమయంలో వాట్సాప్, ఫేస్బుక్లలో వచ్చే ఫేక్ వీడియోలను చూసి అనవసరంగా భయపడకండి. గల్ఫ్లో ఉన్న మీ బంధువులతో నిరంతరం టచ్లో ఉండండి. వారికి ధైర్యం చెప్పండి. వాళ్లు కూడా కంపెనీలు చెప్పిన బంకర్లలోనే ఉంటూ, స్థానిక ఇండియన్ ఎంబసీ సూచనలు పాటించేలా చూడండి. కేంద్ర, రాష్ట్ర ప్రభుత్వాలు మన వాళ్ల రక్షణకు కట్టుబడి ఉన్నాయి. ఏ చిన్న ఇబ్బంది ఉన్నా పైన ఇచ్చిన నంబర్లకు వెంటనే ఫోన్ చేసి అధికారుల సాయం పొందండి!
