దశాబ్ద కాలంగా రగులుతున్న భద్రాచలం సరిహద్దుల వివాదం మళ్లీ భగ్గుమంది! భద్రాద్రి రామయ్య పాదాల చెంత ఉన్న ఆ ఐదు గ్రామాలు ఏ రాష్ట్రానికి చెందాలన్న ఉత్కంఠ ఇప్పుడు ఢిల్లీ దాకా చేరింది. ఏపీలో ఉన్న ఆ గ్రామాలను తిరిగి తెలంగాణలో కలపాలంటూ ఇప్పుడు మహా సంగ్రామం మొదలైంది.
అమిత్ షాకు తుమ్మల లేఖాస్త్రం.. పార్లమెంట్లోనే తేల్చాలి!
ఖమ్మం జిల్లా భద్రాచలం పట్టణానికి ఆనుకుని ఉండి, రాష్ట్ర విభజన తర్వాత ఆంధ్రప్రదేశ్ పాలనలోకి వెళ్లిన పిచ్చుకలపాడు, పురుషోత్తపట్నం, గుండాల, ఎటపాక, కన్నాయిగూడెం.. ఈ ఐదు గ్రామాలను తక్షణమే తెలంగాణలో విలీనం చేయాలన్న డిమాండ్ ఇప్పుడు తారాస్థాయికి చేరుకుంది. ఈ ఘట్టానికి నాంది పలుకుతూ.. తెలంగాణ రాష్ట్ర వ్యవసాయ శాఖ మంత్రి తుమ్మల నాగేశ్వరరావు ఏకంగా కేంద్ర హోం శాఖ మంత్రి అమిత్ షాకు నేడు ఒక సంచలన లేఖ రాశారు.
భద్రాచలం పట్టణ అభివృద్ధికి, ఇక్కడి పాలనా సౌలభ్యానికి ఈ ఐదు గ్రామాలు ప్రాణప్రదమని ఆయన ఆ లేఖలో కుండబద్దలు కొట్టారు. వీటిని తెలంగాణలో కలపడం ద్వారా మాత్రమే దశాబ్దాలుగా నలిగిపోతున్న స్థానిక గిరిజనుల కష్టాలకు శాశ్వత పరిష్కారం లభిస్తుందని తేల్చి చెప్పారు. ఏమాత్రం ఆలస్యం చేయకుండా ప్రస్తుత పార్లమెంటు సమావేశాల్లోనే ఈ విలీనానికి సంబంధించిన బిల్లును ప్రవేశపెట్టాలని కేంద్ర ప్రభుత్వాన్ని గట్టిగా డిమాండ్ చేశారు.
రాజ్యసభ దద్దరిల్లేలా.. రేణుకా చౌదరి ఫైర్!
సరిగ్గా రెండ్రోజుల క్రితం ఢిల్లీలోని రాజ్యసభలోనూ ఇదే అంశంపై పెద్ద దుమారమే రేగింది. ఏపీ రాజధాని అమరావతి చట్టబద్ధత బిల్లుపై వాడివేడి చర్చ జరుగుతున్న సమయంలో.. తెలంగాణ రాజ్యసభ సభ్యురాలు రేణుకా చౌదరి కేంద్ర ప్రభుత్వంపై నిప్పులు చెరిగారు. తమ బతుకులు తెలంగాణలోనే అని కోరుకున్న అమాయక గిరిజనులను గతంలో బలవంతంగా ఏపీలో కలిపేశారని ఆమె ఆవేదనతో మండిపడ్డారు.
విభజన చట్టంలో ఇచ్చిన హామీలైన రైల్వే కోచ్ ఫ్యాక్టరీ, ఎన్టీపీసీ వంటి కీలక అంశాల్లో కేంద్రం తెలంగాణకు దారుణంగా మొండిచేయి చూపిస్తోందని ధ్వజమెత్తారు. కేవలం తమ రాజకీయ ప్రయోజనాల కోసమే కేంద్రం విభజన చట్టాన్ని వాడుకుంటోందని.. తక్షణమే ఆ ఐదు గ్రామాలను తిరిగి తెలంగాణకు అప్పగించి తీరాలని ఆమె సింహగర్జన చేశారు. ఆ గ్రామాలు భౌగోళికంగా, సామాజికంగా తెలంగాణతోనే విడదీయరాని బంధంతో ముడిపడి ఉన్నాయని ఆమె సభలో బలంగా వినిపించారు.
పదేళ్ల కన్నీటి గాథ.. అసలు ఆనాడు ఏం జరిగింది?
భద్రాచలం చుట్టుపక్కల ఉన్న ఈ ఐదు గ్రామాల విలీనం ముచ్చట ఈనాటిది కాదు, పదేళ్లుగా రెండు తెలుగు రాష్ట్రాల మధ్య రగులుతున్న అతిపెద్ద ప్రధాన వివాదం. 2014లో ఉమ్మడి ఆంధ్రప్రదేశ్ విభజన జరిగిన సమయంలో.. పోలవరం ప్రాజెక్టు ముంపు ప్రాంతాల నిర్వహణ మరియు నిర్మాణ సౌలభ్యం కోసం భద్రాచలం రెవెన్యూ డివిజన్లోని ఏడు మండలాలను కేంద్ర ప్రభుత్వం ఏపీకి అప్పగించింది.
సరిగ్గా ఈ ఆపరేషన్లోనే భద్రాచలం పట్టణానికి అత్యంత సమీపంలో, ఆనుకుని ఉన్న గ్రామాలు కూడా ఏపీ పరిధిలోకి వెళ్లిపోయాయి. ప్రస్తుతం రెండు రాష్ట్రాల మధ్య ఉత్కంఠ రేపుతున్న పిచ్చకలపాడు, పురుషోత్తపట్నం, గుండాల, ఎటపాక, కన్నాయిగూడెం గ్రామాలు భద్రాచలానికి గుండెకాయ లాంటివి.
సరిహద్దుల మధ్య నలిగిపోతున్న గిరిజనులు..
ఈ గ్రామాలు భౌగోళికంగా చూస్తే భద్రాచలానికి అక్షరాలా కూతవేటు దూరంలో ఉంటాయి. కానీ, పాలనాపరంగా వాటిపై ఆంధ్రప్రదేశ్ పెత్తనం ఉండటంతో స్థానిక గిరిజనులు అష్టకష్టాలు పడుతున్నారు. ఏ చిన్న ప్రభుత్వ అవసరం వచ్చినా కిలోమీటర్ల కొద్దీ ప్రయాణించి ఏపీ అధికారుల చుట్టూ కాళ్లు అరిగేలా తిరగాల్సి వస్తోంది. మరోవైపు సాక్షాత్తూ ఆ భద్రాద్రి రాముడి ఆలయ విస్తరణకు, పట్టణ బృహత్తర అభివృద్ధికి అవసరమైన కీలకమైన భూమి అంతా ఈ ఐదు గ్రామాల్లోనే ఉండటం తెలంగాణ ప్రభుత్వానికి అతిపెద్ద అవరోధంగా మారింది.
తాజాగా మంత్రి తుమ్మల నాగేశ్వరరావు, ఎంపీ రేణుకా చౌదరి ఈ విలీన అస్త్రాన్ని పదునుపెట్టడంతో రెండు రాష్ట్రాల మధ్య మళ్లీ పొలిటికల్ హీట్ పెరిగింది. పరిపాలనా సౌలభ్యం కోసం, తరతరాలుగా గిరిజనులకు ఉన్న సామాజిక అనుబంధాన్ని దృష్టిలో ఉంచుకుని ఈ గ్రామాలను సొంతగూటికి చేర్చాలని వారు డిమాండ్ చేస్తున్నారు. ఈ చారిత్రక విలీనం జరిగితేనే భద్రాచలం పట్టణం పూర్తిస్థాయిలో, అద్భుతంగా అభివృద్ధి చెందే అవకాశం ఉంటుందని వారు బలంగా వాదిస్తున్నారు. రామ భక్తుల కల, గిరిజనుల ఆశ నెరవేరుతుందో లేదో పార్లమెంట్ వేదికగా తేలాల్సిందే!
Also Read:
HYDRAA Updates : యూఎల్సీ ఖాళీ ప్లాట్ల జోలికి వెళ్లం.. సామాన్యులకు హైడ్రా తీపికబురు!Singareni Workers : సింగరేణిపై ఏసీబీ విచారణా? భట్టి విక్రమార్కపై కవిత ఫైర్!
Fridge Blast: నిర్మల్లో ఫ్రిడ్జ్ పేలి ఇద్దరు మృతి
Greenfield Highway: కొత్త గ్రీన్ఫీల్డ్ హైవేతో ఇక సూపర్ ఫాస్ట్ జర్నీ!
TGSRTC Bus Terminal: గాజులరామారంలో 100 ఎకరాల టెర్మినల్
