మనం పీల్చే గాలి కోసం, మన భవిష్యత్ తరాల ప్రాణవాయువు కోసం ఏకంగా తన జీవితాన్నే త్యాగం చేసిన ఒక వృద్ధుడి రక్తం రోడ్డు మీద ఏరులై పారుతుంటే.. ఒక సామాన్యుడిగా మన రక్తం మరిగిపోవాలి! కన్నబిడ్డల్లా అరవై ఏళ్లుగా పెంచుకున్న చెట్లను నరుకుతుంటే అడ్డుకున్న పాపానికి.. ఏకంగా ఆ ప్రకృతి ప్రేమికుడి తల పగులగొట్టారు! పచ్చని అడవిని సృష్టించిన చేతులపై కర్రలతో విరుచుకుపడిన ఆ రాక్షస మూక అమానుషం చూస్తే మీ గుండె కన్నీరవుతుంది.
నెత్తురోడిన 60 ఏళ్ల తపస్సు!
సూర్యాపేట జిల్లా మోతె మండలం రాఘవాపురంలో ప్రకృతి మూగబోయింది. ఆ గ్రామంలో తనకు వారసత్వంగా వచ్చిన 70 ఎకరాల భూమిలో గత ఆరు దశాబ్దాలుగా వేలాది మొక్కలను నాటిన ప్రముఖ పర్యావరణవేత్త దుశ్చర్ల సత్యనారాయణ.. అక్కడో ఒక అద్భుతమైన కృత్రిమ అడవిని సృష్టించారు. ఎందరో విద్యార్థులు, పరిశోధకులు పర్యావరణంపై లోతైన అధ్యయనాలు చేయడానికి ఈ అడవినే ఎంచుకుంటారు. అలాంటి పవిత్రమైన ప్రాంగణంలో నెత్తుటి చుక్కలు రాలాయి.
చెట్లు నరుకుతుంటే అడ్డుకున్న పాపానికి..
సత్యనారాయణ ప్రాణంగా పెంచుకుంటున్న ఈ అటవీ ప్రాంతంలోకి సమీప రైతులైన బయ్య గంగయ్య, మల్లయ్య అక్రమంగా ప్రవేశించారు. విచక్షణారహితంగా చెట్లను నరుకుతూ, తమ గొర్రెలను ఆ అడవిలో మేపడం మొదలుపెట్టారు. ఇది గమనించిన సత్యనారాయణ వెంటనే వారిని వారించారు. ఎన్నో ఏళ్లుగా కంటికి రెప్పలా కాపాడుకుంటున్న పర్యావరణాన్ని ఇలా నాశనం చేయవద్దని సున్నితంగా వేడుకున్నారు.
కర్రలతో విరుచుకుపడ్డ రాక్షస మూక!
ప్రకృతిని కాపాడాలన్న ఆ ఒక్క మాటే గంగయ్య, మల్లయ్యల కళ్లు నెత్తికెక్కేలా చేసింది. తీవ్ర ఆగ్రహంతో రగిలిపోయిన వారు.. తమ కుటుంబ సభ్యులైన రోషాలు, సుమలత, యశ్వంత్, అనూషలతో కలిసి ఆ అడవిలోకి రాక్షసుల్లా దూసుకొచ్చారు. అక్కడ ప్రశాంతంగా సేద తీరుతున్న సత్యనారాయణపై ఒక్కసారిగా కర్రలతో విరుచుకుపడ్డారు. వృద్ధుడన్న కనికరం లేకుండా ఇష్టం వచ్చినట్లుగా కొట్టారు. ఆ దెబ్బలకు ఆయన తల పగిలి రక్తం కారుతున్నా సరే ఆ మృగాలు వెనక్కి తగ్గలేదు.
లక్షల జీతం వదిలేసి.. మూగజీవాల కోసం..
అసలు దుశ్చర్ల సత్యనారాయణ కేవలం ఒక పర్యావరణవేత్త మాత్రమే కాదు, ఆయనో గొప్ప సామాజిక ఉద్యమకారుడు. బ్యాంకింగ్ రంగంలో ఉన్నత హోదాల్లో పనిచేసిన ఆయన.. ప్రకృతిపై ఉన్న అపారమైన మక్కువతో లక్షల జీతం వచ్చే ఉద్యోగానికే రాజీనామా చేశారు. ఉమ్మడి నల్లగొండ జిల్లాను పట్టిపీడిస్తున్న భయంకరమైన ఫ్లోరైడ్ సమస్యపై 'జల సాధన' పేరుతో అలుపెరగని పోరాటం చేశారు.
తనకున్న 70 ఎకరాల అడవిలో మూగజీవాలకు ఆవాసంగా మార్చేందుకు.. ఏకంగా ఐదెకరాల్లో ప్రత్యేకంగా వాటికోసమే పంటలు సాగు చేస్తున్నారు. పక్షులు, జంతువుల తాగునీటి కోసం ఏడు చోట్ల నీటి కుంటలు తవ్వించారు. జీవ వైవిధ్యానికి తన వంతుగా జీవం పోస్తున్న ఆ మహానుభావుడిని వెతుక్కుంటూ ఎన్నో జాతీయ, అంతర్జాతీయ అవార్డులు వరించాయి.
ఆసుపత్రిలో వృద్ధుడు.. దర్యాప్తులో పోలీసులు!
రక్తమోడుతూ చెట్టు కింద కూలబడిపోయిన సత్యనారాయణను చూసి చలించిపోయిన స్థానికులు వెంటనే పోలీసులకు సమాచారం ఇచ్చారు. హుటాహుటిన ఘటనా స్థలానికి చేరుకున్న పోలీసులు, ఆయన్ను వెంటనే సూర్యాపేట ఏరియా ఆసుపత్రికి తరలించారు. ప్రస్తుతం ఆయన అక్కడే తీవ్ర గాయాలతో చికిత్స పొందుతున్నారు. తనపై భౌతిక దాడికి పాల్పడిన గంగయ్య, మల్లయ్య సహా ఆరుగురిపై కఠిన చర్యలు తీసుకోవాలని సత్యనారాయణ ఫిర్యాదు చేయగా.. మోతె పోలీసులు కేసు నమోదు చేసి దర్యాప్తు చేస్తున్నారు.
చెట్లను పెంచే వాడిపైనే గొడ్డలి ఎత్తితే.. రేపు ఈ భూమ్మీద ఆక్సిజన్ కోసం కొట్టుకుచచ్చే పరిస్థితి వస్తుంది! ఆరు దశాబ్దాల పాటు తన రక్తాన్ని ధారపోసి పచ్చదనాన్ని పంచుతున్న ఆ ప్రకృతి దేవుడికి రక్షణ కరువైతే, ఇక ఈ సమాజం ఎటుపోతున్నట్లు? ఈ అమానుష దాడికి పాల్పడిన నిందితులను తక్షణమే అరెస్టు చేసి, కఠినంగా శిక్షించకపోతే.. భవిష్యత్తులో పర్యావరణాన్ని రక్షించడానికి ఎవరూ ముందుకు రారని పాలకులకు అర్థం కావాలి!
Also Read:
Secunderabad Railway Station: నవీకరణకు ఆర్టీసీ బ్రేక్!Double Decker Corridor | సిగ్నల్స్ దాటే నరకానికి చెక్: ఎల్బీనగర్లో ఆకాశ మార్గం!
ఆర్టీసీ కార్మికులకు రేవంత్ సర్కార్ భరోసా.. ఆత్మహత్యలు వద్దని సీఎం విజ్ఞప్తి!
Jawaharnagar Dumping Yard: హైదరాబాద్లో మీథేన్ బాంబు
Hyderabad Crime News: ప్రియుడి కోసం కిలో బంగారం చోరీ
