ప్రభుత్వ బడి అనగానే పెచ్చులూడుతున్న గోడలు, విరిగిన బెంచీలు, కనీస వసతులు లేని గదులు.. ఇవే కదా మన కళ్ల ముందు మెదిలే చిత్రాలు! అప్పు చేసైనా సరే తమ పిల్లలను కార్పొరేట్ స్కూళ్లలోనే చదివించాలనేది నేటి తల్లిదండ్రుల ఆరాటం. కానీ, ఆ రాతను, ఆ తలరాతను పూర్తిగా మార్చేసింది నల్గొండలోని ఓ ప్రభుత్వ బడి. ప్రైవేట్ స్కూళ్లను సైతం తలదన్నేలా, అడ్మిషన్ల కోసం తల్లిదండ్రులు తెల్లవారుజాము నుంచే క్యూ లైన్లలో పడిగాపులు కాస్తున్నారంటే.. అక్కడ జరుగుతున్న విద్యా విప్లవం ఎలాంటిదో మీరే ఊహించుకోండి!
క్యూ లైన్లలో తల్లిదండ్రులు.. కార్పొరేట్ దిగదుడుపే!
నల్గొండ పట్టణంలోని బొట్టుగూడ కోమటిరెడ్డి ప్రతీక్ మెమోరియల్ ప్రభుత్వ ఉన్నత పాఠశాల ఇప్పుడు రాష్ట్రవ్యాప్తంగా సంచలనంగా మారింది. ప్రభుత్వ బడిపై ఉన్న పాత అభిప్రాయాలను పూర్తిగా చెరిపివేసిన ఈ బడిలో.. ఒక్క సీటు దొరికితే చాలని తల్లిదండ్రులు ఆరాటపడుతున్నారు. ప్రస్తుతం అడ్మిషన్ల ప్రక్రియ ప్రారంభం కాగా, తమ పిల్లల భవిష్యత్తును తీర్చిదిద్దే ఆ గుడిలో చోటు కోసం తెల్లవారుజాము నుంచే స్కూల్ గేటు ముందు భారీ క్యూ లైన్లలో బారులు తీరారు. ఈ దృశ్యాలు చూస్తుంటే బడా కార్పొరేట్ స్కూళ్లు సైతం దీని ముందు దిగదుడుపే అనిపించక మానదు. ఇక్కడి విద్యా ప్రమాణాలకు ఇంతకు మించిన నిదర్శనం మరొకటి లేదు.
సొంత నిధులతో మంత్రి కోమటిరెడ్డి విద్యా యజ్ఞం
ఇంతటి అద్భుత సృష్టి వెనుక ఒక తండ్రి ప్రేమ, సమాజం పట్ల ఉన్న బాధ్యత దాగి ఉన్నాయి. రాష్ట్ర రోడ్లు, భవనాల శాఖ మంత్రి కోమటిరెడ్డి వెంకటరెడ్డి.. తన ప్రియ కుమారుడి జ్ఞాపకార్థం ఈ పాఠశాలను తన సొంత నిధులతో అత్యంత ఆధునికంగా, ఒక అద్భుత దేవాలయంలా తీర్చిదిద్దారు. కేవలం కాంక్రీటు భవనాలకే పరిమితం కాకుండా, విద్యాబోధనలో మునుపెన్నడూ చూడని విప్లవాత్మక మార్పులు తీసుకొచ్చారు.
ఏఐ టెక్నాలజీ నుంచి డిజిటల్ ల్యాబ్స్ వరకు..
ఈ బడిలో అడుగుపెడితే ఏదో ఇంటర్నేషనల్ స్కూల్లో ఉన్నామనే భావన కలుగుతుంది. విద్యార్థుల కోసం అత్యాధునిక స్మార్ట్ క్లాస్ రూమ్లు, ఆర్టిఫిషియల్ ఇంటెలిజెన్స్ (AI) ఆధారిత బోధనా విధానాలు, హైటెక్ డిజిటల్ ల్యాబ్స్ అందుబాటులోకి తెచ్చారు. ప్రభుత్వ ఉపాధ్యాయుల సుదీర్ఘ అనుభవానికి, నేటి అధునాతన సాంకేతికత తోడవడంతో.. ఇక్కడి విద్యార్థుల భవిష్యత్తుకు ఒక బలమైన, సుస్థిరమైన పునాది పడుతోందని తల్లిదండ్రులు గర్వంగా చెబుతున్నారు.
ఆటల మైదానం.. నాణ్యమైన భోజనం
కేవలం పుస్తకాలకే పరిమితం చేయకుండా, విద్యార్థుల శారీరక, మానసిక దృఢత్వం కోసం విశాలమైన క్రీడా మైదానాన్ని సైతం ఇక్కడ ఏర్పాటు చేశారు. అలాగే, పిల్లల ఆరోగ్యానికి ఎంతో కీలకమైన మధ్యాహ్న భోజనం అత్యంత నాణ్యంగా, పోషక విలువలతో అందిస్తుండటంతో తల్లిదండ్రులు తమ పిల్లలను ఇక్కడ చేర్పించేందుకు పోటాపోటీగా వస్తున్నారు. నల్గొండ జిల్లా నుంచే కాకుండా, చుట్టుపక్కల జిల్లాల నుంచి కూడా దరఖాస్తులు వెల్లువెత్తుండటం ఈ స్కూల్ క్రేజ్కు అద్దం పడుతోంది. క్యూలో నిలబడిన ఓ తండ్రి మురిసిపోతూ.. "ఇది కేవలం ప్రభుత్వ పాఠశాల కాదు, కార్పొరేట్ స్థాయికి దీటైన ఒక మహా విశ్వవిద్యాలయంలా ఉంది" అని తన సంతోషాన్ని వ్యక్తపరిచారు.
సీట్ల కోసం డిమాండ్.. ఒక విద్యా విప్లవం
సీట్లు ఏమో పరిమితం.. డిమాండ్ మాత్రం ఆకాశాన్ని తాకుతోంది. దీంతో పాఠశాల యాజమాన్యానికి ఈ అడ్మిషన్ల నిర్వహణే ఇప్పుడు ఒక పెద్ద సవాలుగా మారింది. మంత్రి కోమటిరెడ్డి వెంకటరెడ్డి దార్శనికత, అధికారుల నిరంతర పర్యవేక్షణ, ఉపాధ్యాయుల అంకితభావం.. ఇవన్నీ కలగలిపి ఈ పాఠశాలను నేడు ఒక కార్పొరేట్ స్కూల్గా నిలబెట్టాయి. ప్రభుత్వ విద్యపై ప్రజల్లో మళ్లీ నమ్మకం పెంచడమే కాకుండా.. విద్యా విప్లవానికి నల్గొండలోని కోమటిరెడ్డి ప్రతీక్ మెమోరియల్ ప్రభుత్వ ఉన్నత పాఠశాల సజీవ సాక్షిగా నిలుస్తోందని విద్యావేత్తలు ప్రశంసిస్తున్నారు.
ప్రభుత్వ పాఠశాలలను తలుచుకుంటే భయపడే రోజుల నుంచి.. పక్కవాడికి కాలర్ ఎగరేసి మరీ "నా బిడ్డ చదువుతుంది సర్కారు బడిలో" అని గర్వంగా చెప్పుకునే రోజులు వచ్చాయనడానికి ఈ నల్గొండ బడే అసలు సిసలైన నిదర్శనం!
