క్రీజులోకి వస్తున్నది పదిహేనేళ్ల కుర్రాడు కదా అని లైట్ తీసుకుంటే.. బంతి గ్రౌండ్ లో కంటే గాల్లోనే ఎక్కువ సేపు విహరించింది! బౌలింగ్ వేస్తున్నది ప్రపంచం భయపడే దిగ్గజ బౌలర్లు కదా అని గౌరవమిస్తాడనుకుంటే.. ఏకంగా సిక్సర్ల సునామీతో మైదానాన్ని అగ్నిగుండంగా మార్చేశాడు! ఐపీఎల్ 2026 సీజన్లో ఆకాశమే హద్దుగా చెలరేగుతున్న వండర్ కిడ్ వైభవ్ సూర్యవంశీ మరోసారి విశ్వరూపం చూపించాడు. ఒకవైపు వాన, మరోవైపు కొండంత లక్ష్యం.. డిఫెండింగ్ ఛాంపియన్స్ రాయల్ చాలెంజర్స్ బెంగళూరుపై రాజస్థాన్ రాయల్స్ సృష్టించిన ఈ మహా విధ్వంసానికి గువాహటి స్టేడియం అక్షరాలా దద్దరిల్లిపోయింది.
కోహ్లీ మెరుపులు.. పీకల్లోతు కష్టాల్లో ఆర్సీబీ
వర్షం కారణంగా గంట ఆలస్యంగా ఆరంభమైన ఈ ఉత్కంఠభరిత మ్యాచ్లో.. మొదట బ్యాటింగ్ చేసిన ఆర్సీబీకి ఆరంభంలోనే భారీ షాక్ తగిలింది. పదునైన బంతులతో విరుచుకుపడ్డ జోఫ్రా ఆర్చర్ తన వరుస ఓవర్లలో ఫిల్ సాల్ట్ను, ఆ వెంటనే మూడు బౌండరీలతో జోరు మీద కనిపించిన దేవ్ దత్ పడిక్కల్ (14) ను పెవిలియన్ పంపాడు.
మరోవైపు ఏడు ఫోర్లతో అద్భుతమైన ఫామ్లో కనిపించిన విరాట్ కోహ్లీ (16 బంతుల్లో 32) రవి బిష్ణోయ్ వేసిన ఐదో ఓవర్లో క్లీన్బౌల్డ్ అయ్యాడు. అదే ఊపులో రాజస్థాన్ బౌలర్లు కృనాల్ పాండ్యా (1), జితేష్ శర్మ (5), టిమ్ డేవిడ్ (13) లను వెంటవెంటనే ఔట్ చేయడంతో.. డిఫెండింగ్ ఛాంపియన్స్ 11 ఓవర్లకు 94/6 తో పీకల్లోతు కష్టాల్లో పడిపోయారు.
కెప్టెన్ రజత్ పాటిదార్ వీరోచిత పోరాటం!
జట్టు కుప్పకూలుతున్న సమయంలో కెప్టెన్ రజత్ పాటిదార్ (40 బంతుల్లో 63, 4 ఫోర్లు, 4 సిక్స్లు) బాధ్యతాయుతమైన కెప్టెన్ ఇన్నింగ్స్ ఆడాడు. రొమారియో షెఫర్డ్ (22), మరియు చివర్లో వెంకటేష్ అయ్యర్ (15 బంతుల్లో 29 నాటౌట్, 1 ఫోర్, 2 సిక్స్లు) అండతో పాటిదార్ అద్భుత పోరాటం చేశాడు. ఈ త్రయం ఆఖరి ఓవర్లలో రాజస్థాన్ బౌలర్లపై భీకర ఎదురుదాడికి దిగి స్కోరు బోర్డును పరుగులు పెట్టించారు. వీరి పోరాటంతో ఆర్సీబీ నిర్ణీత ఓవర్లలో 8 వికెట్ల నష్టానికి ఏకంగా 201 పరుగుల భారీ స్కోరు సాధించింది.
హాజిల్వుడ్, భువీలకు చుక్కలు.. కుర్రాడి సునామీ!
లక్ష్య ఛేదనలో ఓపెనర్ యశస్వి జైస్వాల్ (13) త్వరగానే నిష్క్రమించినా.. క్రీజులోకి వచ్చిన బీహార్ కుర్రాడు వైభవ్ సూర్యవంశీ (26 బంతుల్లో 78, 8 ఫోర్లు, 7 సిక్స్లు) ఆర్సీబీ బౌలర్లకు పీడకలగా మారాడు.
ముంబైతో మ్యాచ్లో బుమ్రా, బౌల్ట్ వంటి బౌలర్ల భరతం పట్టిన వైభవ్.. భువనేశ్వర్ కుమార్ తొలి ఓవర్లోనే రెండు బౌండరీలతో దంచుడుకు ముహూర్తం పెట్టాడు. ఆ తర్వాత అభినందన్ వేసిన మూడో ఓవర్లో రెండు ఫోర్లు, ఒక కళ్లుచెదిరే సిక్సర్తో స్వాగతం పలికాడు.
ఈ సీజన్లో తన తొలి మ్యాచ్ ఆడుతున్న ఆస్ట్రేలియా అగ్రశ్రేణి పేసర్ జోష్ హాజిల్వుడ్ అయితే ఈ కుర్రాడి దెబ్బకు విలవిలలాడిపోయాడు. హాజిల్వుడ్ ఓవర్లో ఏకంగా హ్యాట్రిక్ ఫోర్లు, ఒక డీప్ స్క్వేర్ లెగ్ మీదుగా భారీ సిక్సర్తో ఏకంగా 19 పరుగులు పిండుకున్నాడు.
అదే ఊపులో భువీ ఓవర్లో రెండు భయంకరమైన సిక్స్లతో కేవలం 15 బంతుల్లోనే ఈ సీజన్లో తన రెండో అర్ధశతకాన్ని పూర్తి చేసుకుని సంచలనం సృష్టించాడు!
జురెల్ జాతర.. ఆరు ఓవర్లకే 97 రన్స్!
వైభవ్ విధ్వంసానికి తోడుగా ధృవ్ జురెల్ (43 బంతుల్లో 81 నాటౌట్, 8 ఫోర్లు, 3 సిక్స్లు) సైతం పూనకం వచ్చినట్లు ఆడాడు. పవర్ ప్లే ఆఖరి ఓవర్ వేసిన అభినందన్ను ఉతికి ఆరేశాడు. ఆ ఓవర్లో 4, 6, 4, 6, 4 బాదడంతో ఆరు ఓవర్లు ముగిసేసరికి రాజస్థాన్ 97/1 తో తిరుగులేని స్థితికి చేరుకుంది.
టిమ్ డేవిడ్ ఓవర్లో రెండు సిక్స్లతో రెచ్చిపోయిన వైభవ్.. కృనాల్ పాండ్యా వేసిన 9వ ఓవర్లో లాంగాన్లో విరాట్ కోహ్లీ చేతికి చిక్కాడు. కేవలం 37 బంతుల్లోనే వీరు నెలకొల్పిన 108 పరుగుల భీకర రెండో వికెట్ భాగస్వామ్యానికి తెరపడింది.
అగ్రస్థానంలో రాయల్స్ దర్బార్!
వైభవ్ ఔటైనా అప్పటికే రాజస్థాన్ విజయం లాంఛనమే అయింది. హెట్మెయర్, కెప్టెన్ రియాన్ పరాగ్ విఫలమైనా ఏమాత్రం బెదరని జురెల్.. స్టార్ ఆల్రౌండర్ రవీంద్ర జడేజా (24 నాటౌట్) అండతో విజయలాంఛనాన్ని పూర్తి చేశాడు.
జడ్డూ, జురెల్ జోడీ ఐదో వికెట్కు అజేయంగా 68 రన్స్ జోడించి రాజస్థాన్కు ఘన విజయాన్ని అందించారు. డిఫెండింగ్ ఛాంపియన్స్పై ఏకంగా 6 వికెట్ల తేడాతో గెలుపొందిన రాజస్థాన్ రాయల్స్.. ఈ సీజన్లో వరుసగా నాలుగో విజయాన్ని తమ ఖాతాలో వేసుకుని పాయింట్ల పట్టికలో అగ్రస్థానాన్ని మరింత పటిష్టం చేసుకుంది.
పిచ్ ఏదైనా, బౌలర్ ఎవరైనా "తగ్గేదే లే" అంటున్న ఈ యువ సంచలనాలు.. ఐపీఎల్ చరిత్రలోనే ఒక సరికొత్త విధ్వంసకర శకానికి నాంది పలికారు అనడంలో ఎలాంటి సందేహం లేదు!
