సహజీవనం (Live-in relationship) చేస్తున్నారా? లేదా మీ చుట్టుపక్కల ఎవరైనా అలా ఉన్నారా? అయితే పెళ్లికి, సహజీవనానికి మధ్య ఉన్న చట్టపరమైన సన్నని గీతను మీరు కచ్చితంగా తెలుసుకోవాలి. ఒకవేళ బంధం విడిపోతే.. అది నేరం అవుతుందా? అత్యాచారం కింద కేసు పెట్టొచ్చా? సమాజంలో మారుతున్న బంధాలకు అద్దం పడుతూ సుప్రీంకోర్టు సంచలన వ్యాఖ్యలు చేసింది.
బ్రేకప్ నేరం కాదు.. రిస్క్ మీదే!
సహజీవనం నుంచి అకారణంగా బయటకు వెళ్లిపోవడం ఏమాత్రం క్రిమినల్ నేరం కాదని సుప్రీంకోర్టు తేల్చిచెప్పింది. వివాహం చేసుకుంటానని నమ్మించి మోసం చేశాడని, తనపై అత్యాచారానికి పాల్పడ్డాడని ఒక మహిళ దాఖలు చేసిన పిటిషన్ విచారణలో ఈ సంచలన వ్యాఖ్యలు వెలువడ్డాయి.
సుప్రీంకోర్టు న్యాయమూర్తి జస్టిస్ బీబీ నాగరత్న ఈ కేసును లోతుగా విశ్లేషించారు. పరస్పర అంగీకారంతో సాగే సహజీవనానికి, లైంగిక నేరాలకు మధ్య ఉన్న వ్యత్యాసాన్ని ఆమె స్పష్టంగా నొక్కి చెప్పారు. వయోజనులైన ఇద్దరు వ్యక్తులు కలిసి ఉండాలని నిర్ణయించుకున్నప్పుడు, ఆ సంబంధంలో సహజంగానే కొన్ని రిస్క్లు ఉంటాయని జస్టిస్ నాగరత్న గుర్తుచేశారు. గతంలోనూ సహజీవనంపై సుప్రీంకోర్టు ఇలాంటి కీలక తీర్పులే వెలువరించింది.
అంగీకారం ఉన్నప్పుడు రేప్ ఎలా అవుతుంది?
‘‘ఇది పూర్తిగా ఒక సహజీవన సంబంధం. ఆమె వివాహం చేసుకోకుండానే ఆ వ్యక్తితో కలిసి ఉంటూ ఏకంగా ఒక బిడ్డకు జన్మనిచ్చింది.. మరి ఇప్పుడు అత్యాచారం జరిగిందని చెప్పడం ఏంటి?’’ అని జస్టిస్ నాగరత్న సూటిగా ప్రశ్నించారు.
పరస్పర అంగీకారంతో కూడిన బంధంలో లైంగిక వేధింపుల ఆరోపణలు ఎలా చేస్తారని ఆమె పిటిషనర్ను నిలదీశారు. న్యాయస్థానం ఇలాంటి ప్రశ్నలు వేస్తే, ‘బాధితురాలిని అవమానిస్తున్నారు’ అని తమపై విమర్శలు వస్తాయని కూడా ఆమె వ్యాఖ్యానించారు. కానీ, చట్టం ముందు ఆ 'అంగీకారం' స్వభావం కూడా అత్యంత ముఖ్యమని జస్టిస్ నాగరత్న స్పష్టం చేశారు. పరస్పర అంగీకారంతో కూడిన సంబంధం ఉన్నప్పుడు.. అందులో నేరానికి తావు ఎక్కడుంటుందని ఆమె లాజికల్ పాయింట్ లేవనెత్తారు.
విడిపోయిన తర్వాతే వేధింపుల ఫిర్యాదులా?
సహజీవనంలో ఇలాంటి పరిణామాలు సర్వసాధారణమని న్యాయమూర్తి విశ్లేషించారు. ‘‘సంవత్సరాల తరబడి ఇద్దరూ కలిసుంటారు.. కానీ విడిపోయిన తర్వాత అతడు లైంగిక వేధింపులకు పాల్పడ్డాడని మహిళలు ఫిర్యాదు చేస్తుంటారు.. వైవాహిక బంధం లేని సంబంధాలలో ఇటువంటి మార్పులు సాధారణమే’’ అని కుండబద్దలు కొట్టారు.
కోర్టు హాల్లో బాధితురాలి తరఫు న్యాయవాది వాదనలు వినిపిస్తూ.. వితంతువు అయిన తన క్లయింట్కు కేవలం 18 ఏళ్ల వయసు ఉన్నప్పుడు నిందితుడు పరిచయమయ్యాడని తెలిపారు. పెళ్లి చేసుకుంటానని మాయమాటలు చెప్పి నమ్మించాడని, కానీ అతడికి అప్పటికే పెళ్లై నలుగురు భార్యలు ఉన్నారన్న నిజం తన క్లయింట్కు తెలియదని న్యాయవాది వాదించారు. ఇంతకు ముందు వేరే మహిళలను కూడా అతడు ఇలాగే మోసం చేశాడని చెప్పారు.
దీనిపై జస్టిస్ నాగరత్న జోక్యం చేసుకుంటూ.. అసలు పెళ్లి చేసుకోకుండానే ఆ వ్యక్తితో కలిసి జీవించాలని, ఒక బిడ్డను కనాలని ఆమె ఎందుకు నిర్ణయించుకున్నారని ప్రశ్నించారు. వేరే వాళ్ల కథలు వద్దని, కేవలం పిటిషనర్ కేసుకు సంబంధించిన అంశాలే ముఖ్యమని న్యాయమూర్తి తేల్చిచెప్పారు.
సంబంధం అక్రమం.. కానీ బిడ్డ కాదు!
సదరు మహిళ పట్ల న్యాయమూర్తి సానుభూతి వ్యక్తం చేస్తూనే, చట్టపరమైన హక్కులను గుర్తుచేశారు. పుట్టిన బిడ్డ పోషణ, నిర్వహణ కోసం ఖర్చులను కోరే పూర్తి హక్కు ఆ తల్లికి ఉందని కోర్టు స్పష్టం చేసింది. కానీ, కేవలం సహజీవనం విచ్ఛిన్నం కావడం అనేది ఎన్నటికీ క్రిమినల్ నేరం కాదని పదేపదే స్పష్టం చేసింది.
‘‘అక్రమ సంబంధాలు ఉండొచ్చు.. కానీ అటువంటి సంబంధం ద్వారా పుట్టిన బిడ్డ ఏనాటికీ అక్రమ సంతానం కాదు’’ అని జస్టిస్ నాగరత్న చారిత్రాత్మక వ్యాఖ్యలు చేశారు. ఒకవేళ చట్టబద్ధమైన వివాహం జరిగి ఉంటే.. ఆ మహిళ హక్కులు మరింత మెరుగ్గా ఉండేవి అని జస్టిస్ నాగరత్న అభిప్రాయపడ్డారు. ఈ వివాదాన్ని మధ్యవర్తిత్వం (Mediation) ద్వారా సామరస్యంగా పరిష్కరించుకోవాలని ఇరుపక్షాలకు సూచించారు.
సహజీవనం అనేది వ్యక్తిగత స్వేచ్ఛే కావచ్చు.. కానీ దానికి వివాహానికి ఉండే చట్టపరమైన కవచం ఉండదన్నది కఠోర వాస్తవం! పెళ్లి చేసుకోకుండా ఇష్టపూర్వకంగా కలిసి ఉండి, ఆ తర్వాత బంధం చెడిపోతే రేప్ కేసులు పెట్టడం చట్టం ముందు నిలబడదని సుప్రీంకోర్టు స్పష్టం చేసింది. బంధం ఏదైనా, అది తెగిపోయినప్పుడు ఎదురయ్యే సామాజిక, చట్టపరమైన రిస్క్లను స్వీకరించడానికి సిద్ధంగా ఉన్నప్పుడే అడుగు ముందుకేయాలి. భావోద్వేగాలు వేరు, చట్టం వేరు అని యువత గ్రహించాల్సిన సమయమిది!
Also Read:
AAP MPs Disqualification: అనర్హత వేటుకు ఆప్ డిమాండ్కేజ్రీవాల్ కొత్త ఇల్లు 'షీష్ మహల్ 2'.. బంగ్లా రగడలో అసలు నిజాలేంటి?
7 దినుసులు కలిస్తేనే కూర.. రాఘవ్ చద్దాపై సీఎం భగవంత్ మాన్ సెటైర్లు!
Saleem Wastik: 31 ఏళ్ల నాటి హత్య కేసులో యూట్యూబర్ అరెస్ట్
కేజ్రీవాల్ బేరం బెడిసికొట్టింది..ఆప్ విలీనం వెనుక అసలు కథ
