ప్రపంచాన్ని శాసించే చమురు కోసం పశ్చిమాసియా అక్షరాలా అగ్నిగుండంగా మారుతోంది! తుపాకీ గొట్టం కన్నా.. ఇప్పుడు ఇంధన బావులే లక్ష్యంగా అగ్రరాజ్యం అమెరికా, ఇరాన్ల మధ్య సాగుతున్న ఆధిపత్య పోరు తారాస్థాయికి చేరింది. ఒకవేళ మాపై కన్నెర్రజేస్తే.. ప్రతికారం నాలుగు రెట్లు దారుణంగా ఉంటుందంటూ ఇరాన్ చేసిన తాజా హెచ్చరికలు గల్ఫ్ దేశాల గుండెల్లో రైళ్లు పరిగెత్తిస్తున్నాయి.
ఒక్క దెబ్బకు నాలుగు రెట్ల నష్టం.. ఇరాన్ వార్నింగ్!
పశ్చిమాసియాలో నిరవధిక కాల్పుల విరమణ ఒప్పందం, రెండో దశ శాంతి చర్చలు ఎటూ తేలకుండా ప్రతిష్టంభన కొనసాగుతున్న వేళ ఇరాన్ ఒక సంచలన అడుగు వేసింది. తమపై కత్తికట్టిన అమెరికాకు ఎట్టి పరిస్థితుల్లోనూ మద్దతు ఇవ్వొద్దంటూ తన పొరుగు దేశాలకు ఇరాన్ అత్యంత కఠినమైన వార్నింగ్ ఇచ్చింది.
అత్యంత కీలకమైన హర్మూజ్ జలసంధి దిగ్బంధనం, చమురు బావులతో సహా తమ మౌలిక సదుపాయాలను ఎవరైనా లక్ష్యంగా చేసుకుంటే.. టెహ్రాన్ ప్రతిస్పందన నాలుగు రెట్లు భయంకరంగా ఉంటుందని ఇరాన్ ఉపాధ్యక్షుడు ఇస్మాయిల్ సాఘాబ్ ఎస్ఫహానీ తీవ్రస్థాయిలో హెచ్చరించారు.
"ఏ విధమైన యుద్ధ చర్యకైనా మేం కచ్చితంగా ప్రతిస్పందిస్తాం.. ఒకవేళ ఈ దిగ్బంధనం ఫలితంగా మా చమురు బావులు, ఇతర మౌలిక సదుపాయాలు ఏవైనా దెబ్బతింటే.. ఆ దురాక్రమణదారుడికి మద్దతు ఇచ్చే దేశాలకు సైతం అదే రీతిలో నాలుగు రెట్ల నష్టం జరిగేలా మేం చూస్తాం" అని ఆయన ఎక్స్ (ట్విట్టర్) వేదికగా కరాఖండిగా పోస్ట్ పెట్టారు.
"మా లెక్కలు వేరే విధంగా ఉంటాయి.. మాకు చెందిన ఒక చమురు బావి ధ్వంసమైతే, అది శత్రువుల నాలుగు చమురు బావులతో సమానం" అని ఎస్ఫహానీ కుండబద్దలు కొట్టారు. అమెరికా మద్దతుదారులకు ఇరాన్ కలిగించే నష్టం ఏ స్థాయిలో ఉంటుందో ఆయన స్పష్టంగా తేల్చిచెప్పారు. అమెరికాతో యుద్ధం ముగించేందుకు ఇరాన్ ఇప్పటికే మూడు దశల ప్రణాళికను ప్రతిపాదించిన విషయం తెలిసిందే.
ట్రంప్ మైండ్ గేమ్.. పస్తులుంటున్న ఇరాన్ సైన్యం!
ఇరాన్ హెచ్చరికల నేపథ్యంలో అమెరికా అధ్యక్షుడు డొనాల్డ్ ట్రంప్ తనదైన శైలిలో బెదిరింపులకు దిగారు. ఇరాన్పై నిరంతరం ఇదే ఒత్తిడి కొనసాగితే, చమురు నిల్వ కేంద్రాలకు లేదా ట్యాంకర్లకు చమురును తరలించే ఇరాన్ సామర్థ్యానికి తీవ్ర ఆటంకం కలగవచ్చని ఆయన వార్నింగ్ ఇచ్చారు.
గత వారం 'ట్రూత్ సోషల్' వేదికగా ట్రంప్ సంచలన వ్యాఖ్యలు చేశారు. "ఇరాన్ ఆర్థికంగా పూర్తిగా కుప్పకూలుతోంది! హర్మూజ్ జలసంధిని వెంటనే తెరవాలని వారు గట్టిగా కోరుకుంటున్నారు.. నగదు కోసం వాళ్లు ఆకలితో అలమటిస్తున్నారు. ప్రతిరోజూ 500 మిలియన్ డాలర్లు నష్టపోతున్నారు. కనీసం తమకు జీతాలు కూడా అందడం లేదని అక్కడి సైన్యం, పోలీసులు తీవ్రంగా ఫిర్యాదు చేస్తున్నారు" అని ట్రంప్ తన పోస్ట్లో పేర్కొన్నారు.
అనంతరం ఫాక్స్ న్యూస్తో ట్రంప్ మాట్లాడుతూ.. ఇలాంటి కఠినమైన ఆంక్షలు కొనసాగితే కొద్ది రోజుల్లోనే ఇరాన్ చమురు పైప్లైన్లు అత్యంత క్లిష్టమైన స్థితికి చేరుకుంటాయని జోస్యం చెప్పారు. తమ ఒత్తిడి వ్యూహంలో భాగంగా ఇరాన్ ఇంధన మౌలిక సదుపాయాల చుట్టూ పెరిగిన ఉద్రిక్తతలను ట్రంప్ ఈ విధంగా ప్రపంచానికి బయటపెట్టారు.
అయితే ట్రంప్ బెదిరింపులపై ఇరాన్ పార్లమెంట్ స్పీకర్ ఘాలిబాఫ్ అంతే ధీటుగా కౌంటర్ ఇచ్చారు. గణిత సమీకరణం ప్రకారం చూస్తే.. ఇరాన్ సరఫరా కచ్చితంగా అమెరికా డిమాండ్కు సమానంగా ఉంటుందని ఘాలిబాఫ్ లాజికల్గా వివరణ ఇచ్చారు.
ఒకరిది ఆర్థిక దిగ్బంధన వ్యూహం.. మరొకరిది నాలుగు రెట్ల ప్రతీకార దాడి హెచ్చరిక.. ఏది ఏమైనా అగ్రదేశాల మధ్య రగులుతున్న ఈ చమురు మంటలు ఏ క్షణమైనా మూడో ప్రపంచ యుద్ధానికి దారితీసేలా కనిపిస్తున్నాయి. అహంకారం తగ్గే వరకు ఈ ఆధిపత్య పోరుకు ఇప్పట్లో ముగింపు పడేలా లేదు!
Also Read:
Middle East Conflict : అమెరికాకు ఇరాన్ 3 అంచెల వ్యూహంPutin Iran Meeting: మాస్కోలో పుతిన్తో ఇరాన్ మంత్రి సంచలన భేటీ!
Donald Trump : పగతో అడుగుపెట్టారు.. తూటాలతో ఆగిపోయారు!
Washington Shooting : వైట్ హౌస్ కరస్పాండెంట్స్ విందులో కాల్పుల మోత!
Trump Iran Negotiations : పది నిమిషాల్లోనే ఇరాన్ దిగివచ్చిందా?
