అమెరికా అధ్యక్ష పీఠంపై కూర్చున్న డొనాల్డ్ ట్రంప్ ఆడే మైండ్ గేమ్స్ ఎలా ఉంటాయో ప్రపంచానికి మరోసారి రుచి చూపించారు. అగ్రరాజ్యం వేసే ఒక్క అడుగు.. ప్రత్యర్థి గుండెల్లో ఎంతటి ప్రకంపనలు సృష్టిస్తుందో చెప్పడానికి ఈ ఘటనే సజీవ సాక్ష్యం! ఇరాన్తో నెలకొన్న భీకర యుద్ధ వాతావరణాన్ని ముగించేందుకు సిద్ధమైన ట్రంప్, తనదైన శైలిలో దౌత్యపరమైన బ్రహ్మాస్త్రాన్ని ప్రయోగించారు. ఆయన తీసుకున్న ఒకే ఒక్క అనూహ్య నిర్ణయం.. కేవలం పదే పది నిమిషాల్లో ఇరాన్ను దిగివచ్చేలా చేసింది. ఇప్పుడు ఈ వార్త అంతర్జాతీయ రాజకీయ యవనికపై పెను సంచలనంగా మారింది.
పది నిమిషాల వ్యవధిలో.. పల్టీ కొట్టిన ఇరాన్!
అసలు ఏం జరిగిందంటే.. ఇరాన్తో యుద్ధానికి ముగింపు పలికే లక్ష్యంతో, పాకిస్థాన్ రాజధాని ఇస్లామాబాద్లో కీలక చర్చలు జరగాల్సి ఉంది. దీనికోసం అమెరికా నుంచి ఒక అత్యున్నత స్థాయి బృందం వెళ్లడానికి సర్వం సిద్ధమైంది. కానీ, ఎవరూ ఊహించని విధంగా ట్రంప్ ఆ పర్యటనను చివరి నిమిషంలో రద్దు చేసి అందరికీ షాకిచ్చారు. అయితే ఈ రద్దు ప్రకటన వెలువడిన సరిగ్గా పది నిమిషాల వ్యవధిలోనే.. ఇరాన్ నుంచి మరింత మెరుగైన, సవరించిన ప్రతిపాదనలతో కూడిన సరికొత్త పత్రం అమెరికాకు చేరడం ప్రపంచాన్ని విస్మయానికి గురిచేసింది.
విమానం ఎక్కే ముందు.. వ్యూహం మార్చిన ట్రంప్!
నిజానికి శనివారం నాడు ట్రంప్ ప్రత్యేక రాయబారి స్టీవ్ విట్కాఫ్, ట్రంప్ అల్లుడు జారెడ్ కుష్నర్ ఇస్లామాబాద్కు పయనం కావాల్సి ఉంది. విమానం ఎక్కడానికి కొద్ది క్షణాల ముందు ఎయిర్ ఫోర్స్ వన్ వద్ద ట్రంప్ విలేకరులతో మాట్లాడుతూ ఈ పర్యటన రద్దు వెనుక ఉన్న అసలు కారణాన్ని కుండబద్దలు కొట్టారు. "ఆ ప్రయాణానికి చాలా సమయం పడుతుంది, ఖర్చు కూడా ఎక్కువే. అన్నింటికీ మించి.. వారు అక్కడ దేశాధినేతతో కాకుండా వేరే వారితో చర్చలు జరుపుతున్నారు. నాకది ఏమాత్రం రుచించలేదు.. అందుకే ఆ పర్యటన వద్దని నేనే స్వయంగా చెప్పాను" అని ట్రంప్ కుండబద్దలు కొట్టారు.
ఆఫర్లు వస్తున్నా.. అణుబాంబు వద్దే అసలు పేచీ!
చర్చల పట్ల అమెరికాకు ఏమాత్రం ఆసక్తి లేదని ట్రంప్ సంకేతాలు ఇవ్వగానే.. ఇరాన్ శివమెత్తినట్లు వేగంగా స్పందించింది. "నేను పర్యటనను రద్దు చేసిన సరిగ్గా 10 నిమిషాల్లోనే మా టేబుల్ మీదకు మరో పేపర్ వచ్చింది. అది మునుపటి కంటే చాలా మెరుగ్గా ఉంది" అని ట్రంప్ సగర్వంగా ప్రకటించారు.
ఇరాన్ ఇప్పుడు ఎన్నో అద్భుతమైన ఆఫర్లను తమ ముందు ఉంచుతోందని, కానీ అవి అమెరికాకు ఇంకా సరిపోవని ఆయన స్పష్టం చేశారు. ఇరాన్ భవిష్యత్తులో ఎట్టి పరిస్థితుల్లోనూ 'అణు ఆయుధాన్ని' తయారు చేయకూడదన్నదే తమ ప్రథమ, ప్రధాన డిమాండ్ అని ట్రంప్ మరోసారి గట్టిగా తేల్చిచెప్పారు.
నాయకత్వమే గల్లంతు.. వణికిపోతున్న ఇరాన్!
ప్రస్తుతం ఇరాన్ తీవ్రమైన అంతర్గత విభేదాలతో, భయంతో సతమతమవుతోందని ట్రంప్ విశ్లేషించారు. ఇరాన్ నాయకత్వంలో గందరగోళం నెలకొందని, ఇప్పటికే తాము రెండు స్థాయిల (టూ టైర్స్) నాయకులను ఏరివేశామని ఆయన సంచలన వ్యాఖ్యలు చేశారు. "ఇప్పుడు ఇరాన్లో నాయకత్వం వహించడానికి కూడా ఎవరూ సాహసించడం లేదు.. వారు భయపడుతున్నారు. ఈ యుద్ధంలో మేమే గెలిచాము" అని ట్రంప్ ధీమా వ్యక్తం చేశారు. ఇదే సమయంలో.. ప్రస్తుతం అమలులో ఉన్న కాల్పుల విరమణ పొడిగింపుపై విలేకరులు ప్రశ్నించగా, "నేను దాని గురించి ఇంకా ఆలోచించలేదు" అంటూ తనదైన శైలిలో నిర్లక్ష్యంగా కొట్టిపారేశారు.
హార్మూజ్ జలసంధిపై పీటముడి.. దౌత్యంపై ఇరాన్ సవాల్!
అమెరికా-ఇరాన్ మధ్య తెరవెనుక ఇన్ని నాటకీయ పరిణామాలు జరుగుతున్నా.. రెండు ప్రధాన అంశాలపై ఇంకా ఏకాభిప్రాయం కుదరలేదు. ఇరాన్ అణు నిల్వల వ్యవహారంతో పాటు, ప్రపంచ చమురు సరఫరాను శాసించే అత్యంత కీలకమైన 'స్ట్రెయిట్ ఆఫ్ హార్మూజ్' (Strait of Hormuz) నియంత్రణ విషయంలో ఇరు దేశాల మధ్య ఇంకా ప్రతిష్టంభన కొనసాగుతూనే ఉంది. దీనిపై ఇరాన్ విదేశాంగ మంత్రి అబ్బాస్ అరాగ్చీ స్పందిస్తూ.. యుద్ధాన్ని శాశ్వతంగా ముగించేందుకు తాము ఇప్పటికే ఒక పక్కా కార్యాచరణను పంచుకున్నామని, ఇప్పుడు అమెరికాకు దౌత్యంపై నిజంగా చిత్తశుద్ధి ఉందో లేదో చూడాలంటూ సవాల్ విసిరారు.
యుద్ధమైనా, దౌత్యమైనా.. అన్నీ తన నిబంధనల మేరకే, తన కనుసన్నల్లోనే నడవాలన్న ట్రంప్ మొండితనం ముందు ఇరాన్ ఇప్పుడు ఉక్కిరిబిక్కిరవుతోంది. ఒకే ఒక్క పర్యటన రద్దుతో ప్రత్యర్థి వ్యూహాలను పటాపంచలు చేసిన ట్రంప్ ఎత్తుగడ.. అంతర్జాతీయ రాజకీయాల్లో ఒక పాఠంగా మిగిలిపోతుంది. ఈ మైండ్ గేమ్లో అమెరికా పైచేయి సాధించినా, అణు డీల్ ఫైనల్ అయ్యే వరకు ఇరాన్ వేసే తదుపరి అడుగు ఏమిటన్నది ఇప్పుడు ప్రపంచం ఊపిరి బిగపట్టి చూస్తోంది!
Also Read:
UAE Agentic AI : ప్రభుత్వ పాలనలో యూఏఈ ఏఐ సంచలనంరియల్ లైఫ్ పబ్జీ: ఫోన్లలో కాదు, ఏకంగా షాపింగ్ మాల్స్లో ఆడేస్తున్నారు!
క్షిపణి పడే ముందు రూ.3 కోట్ల బెట్టింగ్.. అమెరికా సైనికుడి మైండ్ బ్లోయింగ్ స్కామ్!
పాకిస్థాన్లో చర్చలు మా తప్పే.. ఏకపక్ష డిమాండ్లపై భగ్గుమన్న ఇరాన్
కభీ ఇండియా ఆకే దేఖో: ట్రంప్కు ఇరాన్ ఇచ్చిన దిమ్మతిరిగే కౌంటర్ ఇదే
