[FEATURED_IMAGE]
తండ్రి బస్సు డ్రైవర్.. కొడుకు సూపర్ స్టార్
యశ్ అసలు పేరు నవీన్ కుమార్ గౌడ. ఆయన 1986 జనవరి 8న కర్ణాటకలోని హాసన్ జిల్లాలో అరుణ్ కుమార్, పుష్ప దంపతులకు జన్మించారు. అత్యంత సాధారణ మధ్యతరగతి కుటుంబం వారిది. తండ్రి అరుణ్ కుమార్ బెంగళూరు ప్రభుత్వ రవాణా సంస్థలో బస్సు డ్రైవర్గా పనిచేయగా, తల్లి పుష్ప ఇంటి బాధ్యతలు చూసుకుంటూనే కుటుంబ ఆర్థిక అవసరాల కోసం చిన్న కిరాణా దుకాణం నడిపేవారు. కొడుకు దేశవ్యాప్తంగా గుర్తింపు తెచ్చుకుని కోట్లాది రూపాయలు సంపాదిస్తున్నా, తండ్రి అరుణ్ కుమార్ మాత్రం ఎంతో నిరాడంబరంగా తన డ్రైవర్ వృత్తిని కొనసాగించడం ఆ కుటుంబ విలువలకి అద్దం పడుతోంది.
జేబులో మూడు వందలతో మొదలైన ప్రయాణం
చిన్నప్పటి నుంచే నటనపై ఆసక్తి పెంచుకున్న యశ్, సినిమా రంగంలో అదృష్టాన్ని పరీక్షించుకునేందుకు బెంగళూరుకు చేరుకున్నారు. అప్పుడు ఆయన జేబులో ఉన్నది కేవలం 300 రూపాయలు మాత్రమే. ఎలాంటి బ్యాక్గ్రౌండ్ లేకుండా ఎంతో ఆత్మవిశ్వాసంతో ఇండస్ట్రీలో అడుగుపెట్టి, మొదట చిన్న చిన్న పనులు చేస్తూ బుల్లితెరపై అవకాశాలు దక్కించుకున్నారు. 2004లో 'సిల్లీ లల్లి' వంటి టీవీ సీరియల్స్తో కెరీర్ ప్రారంభించారు. ఆ తర్వాత కన్నడ వెండితెరపై అడుగుపెట్టి, తొలి రోజుల్లో లవర్ బాయ్ ఇమేజ్తో యువతకు చేరువయ్యారు.
చాక్లెట్ బాయ్ నుంచి రాకీ భాయ్ దాకా
కెరీర్ తొలినాళ్లలో వచ్చిన రొమాంటిక్ చిత్రాలు, ముఖ్యంగా 'గూగ్లీ' వంటి సినిమాలు యశ్కు కన్నడనాట చాక్లెట్ హీరో ఇమేజ్ను తెచ్చిపెట్టాయి. కన్నడ యువతలో మంచి క్రేజ్ దక్కినా ఆయన అక్కడే ఆగిపోలేదు. ప్రశాంత్ నీల్ దర్శకత్వంలో 2018లో వచ్చిన 'కేజీఎఫ్: చాప్టర్ 1' ఆయన కెరీర్ను పూర్తిగా మలుపు తిప్పింది. రాకీ భాయ్ పాత్రలో ఆయన బాడీ లాంగ్వేజ్, యాక్షన్, డైలాగ్ డెలివరీ, స్వాగ్ దేశవ్యాప్తంగా ప్రేక్షకులను ఉర్రూతలూగించాయి. ఆ తర్వాత వచ్చిన 'కేజీఎఫ్ 2' ఆయనను తిరుగులేని పాన్ ఇండియా స్టార్గా నిలబెట్టింది.
స్టార్డమ్ను పక్కనపెట్టి నాలుగేళ్ల విరామం
సాధారణంగా ఒక భారీ బ్లాక్బస్టర్ వచ్చిన వెంటనే మార్కెట్ను క్యాష్ చేసుకోవడానికి హీరోలు వరుసగా సినిమాలు చేస్తుంటారు. కానీ యశ్ అలా చేయలేదు. రాకీ భాయ్ పాత్ర తాలూకు ఇమేజ్ నుంచి బయటపడటానికి ఏకంగా నాలుగేళ్ల పాటు విరామం తీసుకున్నారు. పాత ఇమేజ్ను పక్కనపెట్టి పూర్తిగా భిన్నమైన ప్రపంచంలోకి అడుగుపెట్టాలనే సాహసోపేతమైన నిర్ణయంతో గీతూ మోహన్ దాస్ దర్శకత్వంలో 'టాక్సిక్' సినిమాను ఎంచుకున్నారు. ప్రతి భారీ విజయం తర్వాత కొత్త రిస్క్ చేయడం యశ్కు మొదటి నుంచీ అలవాటే.
రాయా నుంచి రావణుడి వరకు.. బాక్సాఫీస్ ప్రయోగాలు
రేపు ప్రేక్షకుల ముందుకు రాబోతున్న 'టాక్సిక్' చిత్రంలో యశ్ 'రాయా' అనే పవర్ ఫుల్ డార్క్ గ్యాంగ్స్టర్గా కనిపించనున్నారు. ఈ భారీ ప్రాజెక్టులో నయనతార, కియారా అద్వానీ, రుక్మిణీ వసంత్ నటిస్తున్నారు. ఈ సినిమా అడ్వాన్స్ బుకింగ్స్ చూస్తే ఆయన క్రేజ్ ఏంటో అర్థమవుతోంది. దీంతో పాటు నితేష్ తివారీ దర్శకత్వంలో వస్తున్న ప్రతిష్టాత్మక 'రామాయణం' చిత్రంలో ఆయన రావణుడిగా నటిస్తున్నారు. చాక్లెట్ బాయ్ నుంచి రాకీ భాయ్గా, ఇప్పుడు రాయాగా, భవిష్యత్తులో రావణుడిగా ఆయన చేస్తున్న ఈ ప్రయోగాలు భారతీయ చలనచిత్ర చరిత్రలోనే అత్యంత ప్రత్యేకం.
ఒక బస్సు డ్రైవర్ కొడుకు దేశవ్యాప్తంగా కోట్లాది మంది అభిమానులను సంపాదించుకోవడం వెనుక అంతులేని శ్రమ, అపారమైన ధైర్యం దాగి ఉన్నాయి. తనను తాను ఎప్పటికప్పుడు కొత్తగా ఆవిష్కరించుకుంటూ ముందుకెళ్తున్న యశ్ ప్రయాణం నేటి యువతకు ఒక గొప్ప పాఠం. రాకీ భాయ్తో క్రియేట్ చేసిన సామ్రాజ్యాన్ని రేపు విడుదలవుతున్న 'టాక్సిక్' ఏ స్థాయికి తీసుకువెళ్తుందోనని యావత్ సినీ అభిమానులు ఎంతో ఆసక్తిగా ఎదురుచూస్తున్నారు.
