ప్రపంచాన్ని శాసించే అగ్రరాజ్యం.. ఆ దేశాధినేత చుట్టూ పటిష్టమైన రక్షణ వలయం! అయినా సరే సాక్షాత్తూ అమెరికా అధ్యక్షుడికే భద్రత కరువైతే.. ఇక సామాన్యుడి బతుకుకు గ్యారెంటీ ఎక్కడుంటుంది? ప్రపంచ దేశాలను వణికిస్తున్న తుపాకీ సంస్కృతికి మరోసారి అమెరికా రాజధాని వాషింగ్టన్ వేదికైంది. అత్యంత ప్రతిష్ఠాత్మకమైన వైట్ హౌస్ కరస్పాండెంట్స్ అసోసియేషన్ (డబ్ల్యూహెచ్సీఏ) వార్షిక విందులో అకస్మాత్తుగా పేలిన తుపాకీ తూటాలు.. అమెరికా భద్రతా వైఫల్యాన్ని ప్రపంచం ముందు నగ్నంగా నిలబెట్టాయి.
తూటాల మోత.. వణికిపోయిన ఇంద్రభవనం!
శనివారం రాత్రి వందలాది మంది దిగ్గజ జర్నలిస్టులు, హాలీవుడ్ తారలు, రాజకీయ ఉద్ధండులతో ఆ బాంక్వెట్ హాల్ కిక్కిరిసిపోయింది. అధ్యక్షుడు డొనాల్డ్ ట్రంప్ లోపలికి ప్రవేశించి, తన ప్రసంగానికి సిద్ధమవుతున్న ఆ ఉత్కంఠభరిత క్షణాల్లోనే సీన్ ఒక్కసారిగా మారిపోయింది.
హాల్ బయట లేదా అత్యంత సమీపంలో వరుసగా 5 నుంచి 8 రౌండ్ల కాల్పుల శబ్దం దద్దరిల్లింది. ఊహించని ఈ పరిణామంతో భద్రతా బలగాలు, సీక్రెట్ సర్వీస్ ఏజెంట్లు ఒక్కసారిగా ఉలిక్కిపడ్డారు.
టేబుళ్ల కింద తలదాచుకున్న తారలు!
తూటాల మోత వినగానే భద్రతా సిబ్బంది "అందరూ కిందకు వంగండి.. పక్కకు తప్పుకోండి" అంటూ కేకలు వేశారు. ప్రాణభయంతో హాల్లోని అతిథులు తీవ్ర భయాందోళనకు గురయ్యారు.
ఏం జరుగుతుందో అర్థం కాక, ఒకరినొకరు తోసుకుంటూ జర్నలిస్టులు, హాలీవుడ్ సెలబ్రిటీలు చెల్లాచెదురుగా పరుగులు తీశారు. బతుకు జీవుడా అంటూ ప్రాణాలు కాపాడుకునేందుకు ఏకంగా విందు టేబుళ్ల కింద దూరి తలదాచుకున్న దృశ్యాలు పరిస్థితి తీవ్రతకు అద్దం పడుతున్నాయి.
మెరుపు వేగంతో ఏజెంట్లు.. ట్రంప్ సేఫ్!
కాల్పుల శబ్దం వినబడిన మరుక్షణమే సీక్రెట్ సర్వీస్ ఏజెంట్లు మానవ కవచంగా మారారు. స్టేజీపై ఉన్న ట్రంప్, ఫస్ట్ లేడీ మెలానియా, వైస్ ప్రెసిడెంట్ జేడీ వాన్స్ను చుట్టుముట్టి అత్యంత సురక్షిత ప్రాంతానికి తరలించారు.
వెంటనే రంగంలోకి దిగిన నేషనల్ గార్డ్ బలగాలు హోటల్ లోపల మోహరించాయి. క్షణాల్లో హాల్ను ఖాళీ చేయించి, అప్పటికే బయటకు వచ్చిన వారు తిరిగి లోపలికి రాకుండా కట్టుదిట్టమైన భద్రతను ఏర్పాటు చేశాయి.
ఆగంతకుడి అరెస్ట్.. అగ్రరాజ్యంలో ప్రకంపనలు!
ఈ కాల్పుల ఘటనలో ఎవరికీ ఎలాంటి గాయాలు కాలేదని వైట్ హౌస్ వర్గాలు అధికారికంగా ధృవీకరించాయి. ప్రెసిడెంట్ ట్రంప్, క్యాబినెట్ మంత్రులందరూ పూర్తి క్షేమంగా ఉన్నారని ప్రముఖ వార్తా సంస్థ సీఎన్ఎన్ (CNN) స్పష్టం చేసింది.
మరోవైపు ఈ కాల్పులకు తెగబడిన ఒక అనుమానిత షూటర్ను పోలీసులు అదుపులోకి తీసుకున్నట్లు సమాచారం. అయితే, ఆ నిందితుడి పూర్తి వివరాలను అధికారులు ఇంకా గోప్యంగానే ఉంచారు.
గతంలో మీడియాపై తీవ్ర విమర్శలు చేసిన ట్రంప్.. తన పాత వైరాన్ని పక్కనపెట్టి అధ్యక్షుడిగా మళ్లీ బాధ్యతలు చేపట్టాక తొలిసారి ఈ విందులో పాల్గొనడం ఒక ఆసక్తికర పరిణామం. కానీ, ఆయన ప్రసంగానికి ముందే పేలిన ఈ తూటాలు.. అమెరికా భద్రతా వైఫల్యాన్ని, నిఘా లోపాన్ని ప్రశ్నిస్తున్నాయి. ఇలాంటి ఘటనలకు చెక్ పెట్టకపోతే అగ్రరాజ్యం ఇమేజ్కే ఇది అతిపెద్ద మచ్చగా మిగిలిపోక తప్పదు!
Also Read:
Trump Iran Negotiations : పది నిమిషాల్లోనే ఇరాన్ దిగివచ్చిందా?UAE Agentic AI : ప్రభుత్వ పాలనలో యూఏఈ ఏఐ సంచలనం
రియల్ లైఫ్ పబ్జీ: ఫోన్లలో కాదు, ఏకంగా షాపింగ్ మాల్స్లో ఆడేస్తున్నారు!
క్షిపణి పడే ముందు రూ.3 కోట్ల బెట్టింగ్.. అమెరికా సైనికుడి మైండ్ బ్లోయింగ్ స్కామ్!
పాకిస్థాన్లో చర్చలు మా తప్పే.. ఏకపక్ష డిమాండ్లపై భగ్గుమన్న ఇరాన్
