ఇది మా యుద్ధం కాదు.. మేం రాం!
ఇరాన్తో అమెరికా చేస్తున్న పోరులో తాము ఎట్టి పరిస్థితుల్లోనూ పాల్గొనబోమని కీర్ స్టార్మర్ కుండబద్దలు కొట్టారు. తమకు బ్రిటన్ ప్రజల ప్రయోజనాలే సర్వస్వమని, "ఇది మా యుద్ధం కానే కాదు" అని ఆయన తేల్చి చెప్పారు.
అయితే, ప్రపంచ ఇంధన సరఫరాకు గుండెకాయ లాంటి 'హార్మూజ్ జలసంధి' (Strait of Hormuz) మూసుకుపోవడాన్ని మాత్రం తాము తీవ్రంగా పరిగణిస్తున్నామని, దాన్ని తిరిగి తెరిపించేందుకు దౌత్యపరమైన మార్గాల్లో పూర్తి సహకారం అందిస్తామని ఆయన స్పష్టం చేశారు.
35 దేశాల మహా కూటమి.. దౌత్య అస్త్రం!
హార్మూజ్ సంక్షోభంపై చర్చించేందుకు ఈ వారంలోనే ఒక భారీ అంతర్జాతీయ దౌత్య సమావేశాన్ని నిర్వహిస్తున్నట్లు స్టార్మర్ ప్రకటించారు. ముడి చమురు రవాణాకు అత్యంత కీలకమైన ఈ సముద్ర మార్గంలో భద్రతను తిరిగి కల్పించేందుకు.. ఇప్పటికే యూకేతో పాటు ఏకంగా 35 దేశాలు ఒక చారిత్రక ఉమ్మడి ప్రకటనపై సంతకాలు చేశాయని వెల్లడించారు. ఈ ఒప్పందంపై సంతకం చేసిన వాటిలో బ్రిటన్తో పాటు ఫ్రాన్స్, జర్మనీ, ఇటలీ, జపాన్, నెదర్లాండ్స్ లాంటి అగ్ర దేశాలు ఉన్నాయి.
చిక్కుకున్న నౌకలకు విముక్తి.. మిలిటరీ స్కెచ్!
"నౌకాయాన స్వేచ్ఛను పునరుద్ధరించడం, అక్కడ చిక్కుకుపోయిన నౌకలు, నావికుల ప్రాణాలకు భద్రత కల్పించడం, అత్యవసర వస్తువుల రవాణాను వెంటనే ప్రారంభించడం కోసం తీసుకోగలిగే ప్రతి ఆచరణీయమైన దౌత్య, రాజకీయ చర్యను ఈ సమావేశంలో అంచనా వేస్తాం" అని స్టార్మర్ వివరించారు.
ఈ దౌత్య సమావేశం ముగిసిన తర్వాత, యుద్ధం పూర్తయ్యాక తమ సైనిక సామర్థ్యాలను ఎలా సమీకరించుకోవాలి? జలసంధిని ప్రపంచానికి ఎలా అందుబాటులోకి తీసుకురావాలి? సురక్షితంగా ఎలా మార్చాలి? అన్నదానిపై తమ మిలిటరీ (సైనిక) వ్యూహకర్తలతో ప్రత్యేక సమావేశం ఏర్పాటు చేస్తామని ఆయన పంచుకున్నారు.
ఈ యుద్ధం ఒక తరాన్ని దశాబ్దాల వెనక్కి నెట్టేస్తుందని, సరిగ్గా 1970లలో వచ్చిన భయంకరమైన ఇంధన సంక్షోభం మళ్లీ రిపీట్ కావొచ్చని ఆయన తీవ్ర ఆందోళన వ్యక్తం చేశారు.
ట్రంప్ ఫైర్.. బేస్లు ఇవ్వని బ్రిటన్!
ఇరాన్పై యుద్ధంలో అమెరికాకు అండగా నిలబడని యూరోపియన్ దేశాలపై, ముఖ్యంగా బ్రిటన్, ఫ్రాన్స్లపై డొనాల్డ్ ట్రంప్ నిప్పులు చెరుగుతున్నారు. హార్మూజ్ మూసివేతతో ఇంధనం లేక అల్లాడిపోతున్న బ్రిటన్ లాంటి దేశాలకు ట్రంప్ సోషల్ మీడియా వేదికగా రెండు ఆప్షన్లు ఇచ్చారు.
"ఒకటి.. మా దగ్గర పుష్కలంగా ఉన్న ఇంధనాన్ని కొనుక్కోండి. రెండు.. కాస్త ధైర్యం తెచ్చుకుని వెళ్లి హార్మూజ్ జలసంధిలో మీ చమురు మీరే తెచ్చుకోండి!" అంటూ ఘాటుగా విమర్శించారు.
ఈ సంఘర్షణ కారణంగా అట్లాంటిక్ అవతలి దేశాలతో అమెరికా సంబంధాలు దారుణంగా దెబ్బతింటున్నాయి. దీనికి ఆజ్యం పోసే మరో ఘటన కూడా జరిగింది.
ఇరాన్పై దాడులు చేయడానికి రెండు బ్రిటిష్ సైనిక స్థావరాలను (bases) వాడుకుంటామని అమెరికా అడిగితే.. కీర్ స్టార్మర్ దాన్ని నిర్మొహమాటంగా తిరస్కరించారు.
ఆ తర్వాత కేవలం 'రక్షణాత్మక చర్యలకు' (defensive) మాత్రమే వాటిని వాడుకోవడానికి అయిష్టంగానే అంగీకరించారు. స్టార్మర్ తీసుకున్న ఈ నిర్ణయం డొనాల్డ్ ట్రంప్ను తీవ్ర అసహనానికి, ఆగ్రహానికి గురిచేసింది.
ఒకవైపు ఇరాన్పై విరుచుకుపడుతున్న అమెరికా.. మరోవైపు మిత్రదేశాల మధ్యే రగులుతున్న ఆధిపత్య పోరు. మొత్తానికి, హార్మూజ్ జలసంధిలో రగులుతున్న ఈ నెత్తుటి చమురు మంటలు.. నాటో కూటమినే కాల్చివేసేలా ఉన్నాయి!
Also Read:
ఖర్గ్ దీవిపై ట్రంప్ కన్ను.. ప్రాణాల మీదకు తెచ్చుకుంటున్న అమెరికా!బతికున్నాడా.. చనిపోయాడా? ఇరాన్ సుప్రీం లీడర్ అదృశ్యం వెనుక మిస్టరీ!
తెరవెనుక రహస్య సందేశాలు.. ఇరాన్-అమెరికా వార్లో కొత్త ట్విస్ట్
ఇరాన్ యుద్ధంపై ట్రంప్ సంచలనం: 2 వారాల్లో ముగింపు!
అమెరికాలో ఘోరం: భారతీయుడి అతివేగానికి గర్భిణీ బలి!
