ఆంధ్రప్రదేశ్ రాజకీయ చదరంగంలో రాబోయే 2029 మహా సంగ్రామం ఎలా ఉండబోతోంది? అధికార కూటమి ఇదే బంధాన్ని కొనసాగిస్తుందా.. లేక పగుళ్లు దేలి పసుపు దళం ఒంటరి అవుతుందా? రాజకీయ విశ్లేషణలకు పెట్టింది పేరైన మాజీ ఎంపీ ఉండవల్లి అరుణ్ కుమార్ తాజాగా ఏపీ రాజకీయ ముఖచిత్రంపై సంచలన వ్యాఖ్యలు చేశారు. 2024 ఎన్నికల ఫలితాలను ఏ సంఘటన డిసైడ్ చేసింది? భవిష్యత్తులో పొత్తులు విడిపోతే ఎవరికి లాభం? లోకేష్ సీఎం అభ్యర్థిత్వం, అలాగే దివంగత వైఎస్సార్ హిందూ మత విశ్వాసాలపై ఆయన చేసిన వ్యాఖ్యలు ఇప్పుడు రెండు తెలుగు రాష్ట్రాల్లో పొలిటికల్ హీట్ పెంచుతున్నాయి.
కూటమి విడిపోతే.. జగన్కు వార్ వన్సైడ్!
Undavalli Arun Kumar Sensational Comments On AP Politics And 2029 Elections : ఓ ప్రముఖ యూట్యూబ్ ఛానల్కు ఇచ్చిన ఇంటర్వ్యూలో ఉండవల్లి బాంబు పేల్చారు. ఏపీలో టీడీపీ, బీజేపీ, జనసేన పార్టీలు కలిసికట్టుగా మహా కూటమిలా కొనసాగితే.. 2014 ఎన్నికల మాదిరిగానే 2029 ఎన్నికలు కూడా అత్యంత టఫ్ ఫైట్గా మారుతాయని ఆయన విశ్లేషించారు.
ఎందుకంటే ప్రస్తుతం రాష్ట్రంలో వైఎస్ జగన్ గ్రాఫ్ అమాంతం పెరిగిందని, అధికార ప్రభుత్వంపై తీవ్ర వ్యతిరేకత కూడా మొదలైందని ఆయన కుండబద్దలు కొట్టారు. ఒకవేళ ఏ చిన్న కారణం చేతనైనా 2029 ఎన్నికల్లో కూటమి విడిపోతే మాత్రం.. 2019 ఎన్నికల మాదిరిగా వైఎస్ జగన్కు వార్ వన్ వన్సైడ్ అవుతుందని జోస్యం చెప్పారు.
అంతా మోదీ చేతుల్లోనే.. అవసరాన్ని బట్టే పొత్తులు!
అసలు ఈ కూటమి 2029 వరకు ఉంటుందా లేదా అన్నది నేరుగా ప్రధాని నరేంద్ర మోదీ చేతుల్లోనే ఉంటుందని ఉండవల్లి స్పష్టం చేశారు. కేంద్రంలో ఎలాగైనా తమ ప్రభుత్వాన్ని సుస్థిరంగా ఉంచుకోవాలనే పట్టుదలతో బీజేపీ ఉంటుందని, ఈ విషయంలో ఎవరికీ ఎలాంటి అనుమానం అవసరం లేదన్నారు.
వాళ్ల వెనుక ఒక పక్కా ఎజెండా, క్లియర్ విజన్ ఉంటుందని.. కేవలం అధికారం కోసం వాళ్లు ఏదైనా చేస్తారని చెప్పుకొచ్చారు. ఏపీలో కూటమి కలిసి ఉంటుందా లేదా అన్నది చూడాలని, రాజకీయాల్లో ఎప్పుడు ఏదైనా జరగొచ్చన్నారు. కూటమి పార్టీలు కేవలం తమ రాజకీయ అవసరాన్ని బట్టి మాత్రమే కలుస్తాయని, ఆ అవసరం తీరిపోయి లేదనుకుంటే వెంటనే విడిపోతాయని ఆయన తేల్చి చెప్పారు.
రాజమండ్రి జైలులోనే రాసిన 2024 తీర్పు
గత 2024 ఎన్నికల ఫలితాలపై ఉండవల్లి ఆసక్తికర విశ్లేషణ చేశారు. పవన్ కళ్యాణ్, చంద్రబాబు నాయుడు ఎప్పుడైతే చేతులు కలిపారో ఆ క్షణమే ఎన్నికల వార్ వన్ సైడ్ అయిపోయిందన్నారు. గత వైసీపీ ప్రభుత్వం పవన్ను, చంద్రబాబును నానా ఇబ్బందులు పెట్టిందని.. ఆ కసితోనే అప్పుడే జగన్ను ఓడించాలని వాళ్లు బలంగా నిర్ణయించుకున్నారని తెలిపారు. చంద్రబాబు అరెస్ట్ అయ్యాక, రాజమండ్రి సెంట్రల్ జైలులో పవన్ కళ్యాణ్ ఆయనను కలిసిన రోజే.. 2024 ఎన్నికల్లో గెలుపు ఎవరిదో డిసైడ్ అయిపోయిందని ఆయన చెప్పుకొచ్చారు.
కాపు ఓట్ల చీలిక.. జగన్పై ప్రచారం
చంద్రబాబు నాయుడు తర్వాత నారా లోకేష్ తదుపరి ముఖ్యమంత్రి అవుతారని గనక ప్రచారం మొదలైతే.. కచ్చితంగా కాపుల ఓట్లలో భారీ చీలిక వస్తుందని ఉండవల్లి సంచలన జోస్యం చెప్పారు. గత ఎన్నికల సమయంలో వైఎస్ జగన్ కమ్మవారికి, అలాగే కాపులకు బద్ధ వ్యతిరేకి అని ప్రజల్లో చాలా బలంగా ప్రచారం చేయగలిగారని ఆయన గుర్తు చేశారు.
రాజధాని రచ్చ.. మతాల కుంపటి
రాజధాని వివాదంపై స్పందిస్తూ.. అసలు భారత రాజ్యాంగంలో 'రాజధాని' అనే పేరే ఎక్కడా లేదన్నారు. 2014 ఎన్నికల తర్వాత చంద్రబాబు అమరావతిని రాజధానిగా నిర్ణయించిన సమయంలోనే.. వైఎస్సార్సీపీ అసెంబ్లీ వేదికగా వారి నిర్ణయాన్ని గట్టిగా చెప్పాల్సిందన్నారు.
ఆ తర్వాత వారు మూడు రాజధానుల పేరుతో కొత్త ప్రతిపాదనను తెరపైకి తీసుకొచ్చిన విషయాన్ని ఆయన గుర్తు చేశారు. రాజధాని విషయంలో ఎవరి ఎజెండా వారికి పక్కాగా ఉందన్నారు. ప్రస్తుతం రాష్ట్రంలో మతపరమైన అంశాలపై అనవసర వివాదాలు నడుస్తున్నాయని ఆవేదన వ్యక్తం చేశారు. గతంలో ఇలా మతాల గురించి పెద్దగా ఎప్పుడూ చర్చ లేదని.. 2014 తర్వాతే రాష్ట్రంలో వాతావరణం మొత్తం మారిపోయిందని ఆయన స్పష్టం చేశారు.
వైఎస్సార్ క్రిస్టియన్ అయినా.. అన్నవరంలో ఆ గంటన్నర!
ఇటీవల తిరుమల విషయంలో వైఎస్ రాజశేఖరరెడ్డిపై వస్తున్న విమర్శలపై ఉండవల్లి అరుణ్ కుమార్ ఘాటుగా స్పందించారు. వైఎస్ రాజశేఖరరెడ్డి సర్టిఫికెట్లో క్రిస్టియన్ అని ఉండొచ్చు.. కానీ ఆయన తన నిజ జీవితంలో హిందూమతాన్ని కూడా అంతే భక్తితో ఆచరించారని కుండబద్దలు కొట్టారు. వైఎస్ ఎంపీగా ఉన్న సమయంలో అన్నవరం వెళ్లినప్పుడు జరిగిన ఒక సంఘటనను ఈ సందర్భంగా గుర్తు చేశారు. రాజశేఖర్ రెడ్డి, తాను, జక్కంపూడి రామ్మోహన్రావు కలిసి ఒకసారి అన్నవరం వెళ్లామన్నారు.
అక్కడ వైఎస్సార్ ఏకంగా గంటన్నర పాటు అత్యంత భక్తిశ్రద్ధలతో సత్యనారాయణ వ్రతంలో కూర్చున్నారని ఆయన వివరించారు. మోకాళ్ల నొప్పుల కారణంగా తాను అంతసేపు కూర్చోలేకపోయానని.. ఆ సమయంలో అడిగితే.. తాను చాలాసార్లు సత్యనారాయణ వ్రతం చేశానని రాజశేఖర్ రెడ్డి స్వయంగా తనతో చెప్పారని నాటి ఘటనను కళ్లకు కట్టారు. ఆ తర్వాత వైఎస్ పాదయాత్ర పూర్తి చేసుకుని మొక్కు తీర్చుకునేందుకు తిరుమలకు నడిచి వెళ్లారని.. ఆయన కుమారుడు జగన్ కూడా సరిగ్గా అలాగే కాలి నడకన వెళ్లారని గుర్తు చేసుకున్నారు.
తనకు కేవీపీ రామచంద్రరావు ద్వారానే వైఎస్సార్ పరిచయం అయ్యారని ఉండవల్లి తెలిపారు. తాను రాజమండ్రిలో రెండుసార్లు ఓడిపోయి, రెండుసార్లు గెలిచానన్నారు. గెలిస్తే పార్టీ గెలిచింది.. ఓడిపోతే పార్టీ ఓడిపోయింది అని తాము అనుకునేవాళ్లమని.. రాజమండ్రి ఎంపీగా గెలిచినప్పుడు తన ముఖం చూసి ప్రజలు ఓట్లు వేయలేదని, అదంతా వైఎస్సార్ చరిష్మానే అని ఆయన ముగించారు.
కాలగర్భంలో దాగిన 2029 ఎన్నికల రహస్యం కూటమి చేతిలో ఉందో, ప్రధాని మోదీ నిర్ణయంపై ఉందో కాలమే తేల్చాలి. కానీ ఉండవల్లి వేసిన ఈ పొలిటికల్ బాంబు మాత్రం ప్రస్తుత రాజకీయాల్లో పెను ప్రకంపనలు సృష్టిస్తోంది అనడంలో ఎలాంటి సందేహం లేదు!
Also Read:
AP Weather Report: ఏపీ వాతావరణం.. పిడుగులు, వడగాలులతో ముప్పు!AP Capital Issue : ఏపీలో జగన్ 'మావిగన్' సెగలు!
TTD Temple in Netherlands: నెదర్లాండ్స్లో శ్రీవారి ఆలయం
AP High Court : గర్భగుడి పవిత్రతపై ఏపీ హైకోర్టు సంచలన తీర్పు.. పూజారులకు షాక్!
Thalliki Vandanam Scheme: తల్లికి వందనం నిధులపై సీఎం గుడ్న్యూస్!
