గత 40 రోజులుగా పశ్చిమాసియాను రక్తం కళ్లజూసిన మహా సంగ్రామం అనూహ్యంగా ఆగిపోయింది! నిత్యం బాంబుల మోతతో దద్దరిల్లిన ఆకాశంలో ఇప్పుడు శాంతి పావురాలు ఎగురుతున్నాయి. ఎవరూ ఊహించని విధంగా, అగ్రరాజ్యం అమెరికాకు, అగ్నిపర్వతంలా రగులుతున్న ఇరాన్కు మధ్య పాకిస్థాన్ ఒక శాంతి వారధిగా నిలిచి ప్రపంచాన్ని ఆశ్చర్యపరిచింది. ఇరు దేశాల మధ్య 14 రోజుల పాటు కుదిరిన ఈ కాల్పుల విరమణ ఒప్పందం వెనుక దాగిన ఆసక్తికరమైన మంత్రాంగం ఇప్పుడు గ్లోబల్ పాలిటిక్స్లో పెను సంచలనంగా మారింది.
ఇరాన్, అమెరికాల ముక్తకంఠం.. థ్యాంక్స్ టు పాకిస్థాన్!
రెండు వారాల కాల్పుల విరమణను ఇరాన్ విదేశాంగ మంత్రి సయ్యద్ అబ్బాస్ అరఘ్చి అధికారికంగా ధ్రువీకరించారు. సోషల్ మీడియా వేదికగా ఆయన స్పందిస్తూ.. ఈ సంక్షోభ నివారణకు మధ్యవర్తిత్వం వహించిన పాకిస్థాన్కు ప్రత్యేక కృతజ్ఞతలు తెలిపారు. పశ్చిమాసియాలో యుద్ధాన్ని ముగించడానికి రాత్రింబవళ్లు శ్రమిస్తున్న తన ప్రియ సోదరులు, పాకిస్థాన్ ప్రధాన మంత్రి షెహబాజ్ షరీఫ్, ఫీల్డ్ మార్షల్ అసిమ్ మునీర్ల అవిశ్రాంత కృషి ప్రశంసనీయమని ఆయన కొనియాడారు.
ఇదే పోస్ట్ను అమెరికా అధ్యక్షుడు డొనాల్డ్ ట్రంప్ తన సొంత సోషల్ మీడియా ప్లాట్ఫామ్ 'ట్రూత్ సోషల్'లో షేర్ చేయడం విశేషం. ఈ అద్భుతమైన శాంతి చర్చల్లో ఇస్లామాబాద్ పోషించిన కీలక పాత్రను వాషింగ్టన్ కూడా మనస్ఫూర్తిగా అంగీకరిస్తోందని ట్రంప్ ఈ చర్య ద్వారా ప్రపంచానికి స్పష్టం చేశారు.
ఏప్రిల్ 10న ఇస్లామాబాద్కు రండి.. పాక్ ప్రధాని పిలుపు!
అమెరికా, ఇరాన్ ప్రకటనల వెనువెంటనే పాక్ ప్రధాని షెహబాజ్ షరీఫ్ 'ఎక్స్' (ట్విట్టర్) వేదికగా తన ఆనందాన్ని పంచుకున్నారు. అమెరికా, దాని మిత్రదేశాలు, ఇరాన్ తక్షణ కాల్పుల విరమణకు అంగీకరించడం అత్యంత సంతోషకరమైన పరిణామమని ఆయన అన్నారు. లెబనాన్, ఇతర ప్రాంతాలతో సహా పశ్చిమాసియా అంతటా ఈ విరమణ తక్షణమే అమల్లోకి వస్తుందని స్పష్టం చేశారు.
ఈ వివేకవంతమైన నిర్ణయాన్ని తాను హృదయపూర్వకంగా స్వాగతిస్తున్నానని, ఇరు దేశాల నాయకత్వాలకు తన కృతజ్ఞతలు చెబుతున్నానని షరీఫ్ తెలిపారు. అన్ని వివాదాలకు శాశ్వత ముగింపు పలికే ఒక నిర్ణయాత్మక ఒప్పందం కోసం ఏప్రిల్ 10న జరిగే చరిత్రాత్మక చర్చలకు.. ఇరు దేశాల ప్రతినిధి బృందాలను ఇస్లామాబాద్కు ఆయన సాదరంగా ఆహ్వానించారు. ఈ చర్చలు సుస్థిర శాంతిని సాధించడంలో విజయం సాధిస్తాయని మనస్ఫూర్తిగా ఆశిస్తున్నామని, రాబోయే రోజుల్లో మరిన్ని శుభవార్తలు పంచుకోవాలని కోరుకుంటున్నట్లు ఆయన ఆశాభావం వ్యక్తం చేశారు.
నిద్రలేని రాత్రులు.. తెరవెనుక నడిచిన థ్రిల్లర్ కథ!
ఈ రెండు వారాల కాల్పుల విరమణ వెనుక ఒక ఉత్కంఠభరితమైన పొలిటికల్ మంత్రాంగం నడిచింది. ఈ శాంతి నిర్ణయం ప్రకటించడానికి ముందు అమెరికా అధ్యక్షుడు డొనాల్డ్ ట్రంప్.. ఇజ్రాయెల్ ప్రధాన మంత్రి బెంజమిన్ నెతన్యాహుతో, అలాగే పాక్ ఆర్మీ చీఫ్ అసిమ్ మునీర్తో సుదీర్ఘంగా ఫోన్లో మాట్లాడినట్లు సీబీఎస్ (CBS) న్యూస్ సంచలన నివేదిక వెలువరించింది.
ఆ నివేదికల ప్రకారం.. మంగళవారం రాత్రంతా అమెరికా ఉపాధ్యక్షుడు జేడీ వాన్స్, ప్రత్యేక దూత స్టీవ్ విట్కాఫ్, ఇరాన్ విదేశాంగ మంత్రి అరాఘ్చీలతో పాక్ ఆర్మీ చీఫ్ అసిమ్ మునీర్ ఏకధాటిగా అత్యంత రహస్య సంప్రదింపులు జరుపుతూనే ఉన్నారు.
పాకిస్థాన్నే ఇరాన్ ఎందుకు గుడ్డిగా నమ్మింది?
యుద్ధాన్ని ముగించే మధ్యవర్తిగా ఒక దేశం ఉండాలంటే ముందుగా రెండు పక్షాల సంపూర్ణ విశ్వాసాన్ని చూరగొనాలి. ఇరాన్ దృక్కోణంలో చూస్తే, అమెరికాతో అరబ్ దేశాలకు ఉన్న లోతైన సంబంధాల కారణంగా ఆ దేశాలను ఇరాన్ ఏమాత్రం నమ్మడం లేదు. పైగా అమెరికా-ఇజ్రాయెల్ వైమానిక దాడులకు ప్రతీకారంగా ఇటీవల గల్ఫ్ దేశాలపై ఇరాన్ భీకర దాడులు కూడా చేసింది.
కానీ, తనతో సరిహద్దును పంచుకునే పాకిస్థాన్తో ఇరాన్కు ఎంతో సన్నిహితమైన, బలమైన దౌత్య సంబంధాలు ఉన్నాయి. షరీఫ్, మునీర్లను అరఘ్చి స్వయంగా 'ప్రియమైన సోదరులు' అని సంబోధించడమే ఈ బంధానికి సజీవ సాక్ష్యం. వీటన్నింటికీ మించి, పాలస్తీనా సమస్య కారణంగా పాకిస్థాన్కు ఇజ్రాయెల్తో కనీస దౌత్య సంబంధాలు కూడా లేవు. టెహ్రాన్ పాకిస్థాన్ను గుడ్డిగా విశ్వసించడానికి ఇది ఒక అత్యంత బలమైన కారణం.
ట్రంప్ ఫేవరెట్ జనరల్.. అమెరికాకు పాక్ పాచిక!
మరోవైపు అమెరికా వ్యూహం కూడా పక్కాగా పనిచేసింది. గతేడాది డొనాల్డ్ ట్రంప్ రెండోసారి అధ్యక్షుడైన తర్వాత పాకిస్థాన్తో అమెరికా సంబంధాలు అనూహ్యంగా మెరుగుపడ్డాయి. గాజాలో శాంతిని నెలకొల్పడమే లక్ష్యంగా ట్రంప్ ప్రతిపాదించిన ప్రత్యేక శాంతి మండలిలో ఇస్లామాబాద్ కూడా చేరింది.
అంతేకాదు, పాక్ ఆర్మీ చీఫ్ మునీర్ను తనకు 'అత్యంత ఇష్టమైన ఫీల్డ్ మార్షల్' అని ట్రంప్ స్వయంగా కితాబిచ్చారు. నివేదికల ప్రకారం.. జనరల్ మునీర్కు అటు అమెరికా, ఇటు ఇరాన్ రక్షణ సంస్థలతో అత్యంత లోతైన సంబంధాలు ఉన్నాయి. ఈ అరుదైన అనుబంధం శాంతి చర్చల్లో పాకిస్థాన్కు ఒక బ్రహ్మాస్త్రంలా పనిచేసి ఒక అదనపు ప్రయోజనాన్ని అందించింది. దీనికి తోడు ఇతర గల్ఫ్ దేశాలతో కూడా పాకిస్థాన్కు మంచి సంబంధాలు ఉండటంతో.. ఈ ఘర్షణ నుంచి బయటపడటానికి అందరినీ కలుపుకొని వెళ్లగలిగే ఏకైక మార్గదర్శిగా ఇస్లామాబాద్ నిలిచింది.
నిన్నటి వరకు అంతర్జాతీయ వేదికలపై ఆర్థిక సంక్షోభాలతో సతమతమైన పాకిస్థాన్.. నేడు ప్రపంచాన్నే వణికిస్తున్న ఒక మహా సంగ్రామాన్ని ఆపే శాంతి దూతగా మారడం భౌగోళిక రాజకీయాల్లో ఒక అతిపెద్ద విచిత్రం. ఏప్రిల్ 10న ఇస్లామాబాద్లో జరిగే చర్చలు గనక సఫలమైతే.. గ్లోబల్ పాలిటిక్స్లో పాకిస్థాన్ పేరు సరికొత్త సువర్ణాక్షరాలతో లిఖించబడటం ఖాయం!
