"ఈ రాత్రికే ఒక దేశ నాగరికత అంతం అవుతుంది, ఇరాన్ను రాతి యుగంలోకి నెట్టేస్తాం" అని గర్జించిన అమెరికా అధ్యక్షుడు డొనాల్డ్ ట్రంప్.. ఆఖరి నిమిషంలో అనూహ్యంగా తన మనసు మార్చుకున్నారు. ఇరాన్పై దాడులను రెండు వారాల పాటు నిలిపివేస్తూ, ఆర్థిక సంక్షోభం అంచున నిలబడ్డ ప్రపంచానికి ఓ పెద్ద ఊపిరిపోశారు. ఇంతకీ, బాంబుల వర్షం కురిపించాల్సిన అగ్రరాజ్యం ఆకస్మాత్తుగా వెనక్కి ఎందుకు తగ్గింది? ట్రంప్ మనసు మార్చుకోవడానికి దారితీసిన ఆ అసలు కారణాలేంటి?
డెడ్లైన్కు ముందే దిగివచ్చిన టెహ్రాన్
అమెరికా తన భీకర ఆయుధ సంపదతో దాడులకు సమాయత్తం అవుతున్న వేళ.. ఇరాన్ అగ్రనాయకత్వం తీవ్ర ఆలోచనలో పడింది. అప్పటి వరకు తమ శక్తికి మించి అగ్రరాజ్యంతో పోరాడినప్పటికీ, అమెరికా గనక పూర్తిస్థాయి యుద్ధంలోకి దిగితే దేశానికి తీరని అపార నష్టం వాటిల్లుతుందని వారికి స్పష్టంగా అర్థమైంది.
దీంతో, ట్రంప్ విధించిన డెడ్లైన్ ముగియడానికి సరిగ్గా రెండు గంటల ముందు ఇరాన్ ఒక మాస్టర్ స్ట్రోక్ వేసింది. పది అంశాలతో కూడిన ఒక కీలక ప్రతిపాదనను అమెరికా ముందు ఉంచింది. ప్రపంచ చమురు రవాణాకు అత్యంత కీలకమైన 'హోర్ముజ్ జలసంధి'ని తిరిగి తెరిచి ఉంచేందుకు టెహ్రాన్ సమ్మతించింది. అమెరికా డిమాండ్ చేసిన షరతులపై చర్చించడానికి ఇరాన్ సుముఖత వ్యక్తం చేయడంతో, ఆ దేశానికి మరో అవకాశం ఇవ్వాలని ట్రంప్ నిర్ణయించుకున్నారు.
ప్రపంచ ఆర్థిక ముప్పు.. భయపెట్టిన చమురు సెగ
ఇరాన్ యుద్ధం మొదలైన నాటి నుంచి ప్రపంచ దేశాలు చమురు, వంట గ్యాస్ కొరతతో తీవ్ర ఇబ్బందులు పడుతున్నాయి. ఈ కొరత ప్రభావం అన్ని రంగాలపైనా పడుతుండటంతో చాలా దేశాలు పెట్రోల్ ధరలను భారీగా పెంచేశాయి. మన పొరుగు దేశం పాకిస్థాన్ అయితే ఈ ఇంధన సంక్షోభాన్ని తట్టుకోలేక ఏకంగా 'స్మార్ట్ లాక్ డౌన్' విధిస్తున్నట్లు ప్రకటించింది.
ఒకవేళ అమెరికా మరింత తీవ్రంగా ఇరాన్పై దాడులు చేస్తే.. దాని ప్రభావంతో చమురు ధరలు ఊహించని రీతిలో ఆకాశాన్ని తాకి, ప్రపంచ ఆర్థిక వ్యవస్థ కుప్పకూలే ప్రమాదం పొంచి ఉంది. దీని వల్ల ప్రపంచవ్యాప్తంగా తనపై తీవ్ర వ్యతిరేకత వస్తుందని ట్రంప్ పసిగట్టారు. అందుకే యుద్ధం మొదలైనప్పటి నుంచి చమురు ధరలు పెరగకుండా ట్రంప్ చాలా జాగ్రత్త పడ్డారు. ఇటీవల ఇరాన్ చమురు కేంద్రాలపై ఇజ్రాయెల్ చేసిన దాడులను ఆయన బహిరంగంగానే తప్పుబట్టడానికి ప్రధాన కారణం కూడా ఇదే. అటు ప్రపంచ దేశాల నుంచి ఇరాన్పై పెరిగిన ఒత్తిడి కూడా ఈ నిర్ణయానికి దోహదపడింది.
పాకిస్థాన్ ఎంట్రీ.. దారికొచ్చిన అగ్రరాజ్యం
అగ్రరాజ్యం దాడులు ఆపడానికి తెరవెనుక మరో కీలక పరిణామం జరిగింది. పాకిస్థాన్ చేసిన మధ్యవర్తిత్వంతోనే ఇరాన్పై దాడులు నిలిపేస్తున్నట్లు ట్రంప్ స్వయంగా ప్రకటించడం గమనార్హం.
పాక్ ప్రధాని షెహబాజ్ షరీఫ్, ఆర్మీ చీఫ్ అసిమ్ మునీర్లతో ఫోన్లో మాట్లాడిన తర్వాత ట్రంప్ కాస్త మెత్తబడ్డారు. ఈ యుద్ధం ఇలాగే కొనసాగితే ఇరాన్తో పాటు దాని పొరుగు దేశాలు, పశ్చిమాసియా మొత్తం అగ్నిగుండంలా మారి అతలాకుతలం అవుతాయని వారు ట్రంప్కు సవివరంగా చెప్పారు. ఇదే సమయంలో ఇరాన్ కూడా పంతం వీడి చర్చలకు సిద్ధంగా ఉందనే గుడ్ న్యూస్ను ట్రంప్ చెవిన వేసి ఆయన్ని శాంతింపజేశారు.
ఇంటా బయటా వత్తిడి.. ఖజానాకు చిల్లు!
ఇరాన్తో యుద్ధం మొదలుపెట్టిన ట్రంప్.. ఆ దేశ అగ్రనాయకత్వాన్ని మట్టుబెడితే పని సులువుగా పూర్తవుతుందని అంచనా వేశారు. కానీ, ఆ దేశం నుంచి అమెరికాకు ఊహించని రీతిలో కఠినమైన ప్రతిఘటన ఎదురైంది. దీంతో ఈ యుద్ధాన్ని ఎలా ముగించాలో ట్రంప్కు సైతం అంతుబట్టలేదు. కొద్ది రోజుల్లోనే ఈ యుద్ధం నుంచి అమెరికా తప్పుకుంటుందని ఆయన గతంలోనే సంకేతాలు ఇచ్చారు.
మరోవైపు, ఇరాన్తో కయ్యానికి దిగిన ట్రంప్కు సొంత దేశంలోనే అమెరికన్ల నుంచి తీవ్ర వ్యతిరేకత వ్యక్తమైంది. అంతేకాకుండా, ఈ మహా సంగ్రామం కోసం బిలియన్ల కొద్దీ డాలర్లు ప్రజాధనం ఖర్చు చేయాల్సి రావడం కూడా ఆయనకు ప్రతికూలంగా మారింది. పైకి కఠినమైన హెచ్చరికలు చేస్తున్నట్లు కనిపించినా, అటు ఇంటా ఇటు బయటా తీవ్ర ఒత్తిళ్లు రావడంతో.. యుద్ధాన్ని నిలిపేయడానికి సరైన సమయం కోసం ఎదురు చూసి ట్రంప్ ఈ నిర్ణయం తీసుకున్నారు.
యుద్ధాన్ని ప్రారంభించడం ఎంత సులువో, దాన్ని ముగించడం అంత కష్టం అనడానికి డొనాల్డ్ ట్రంప్ తీసుకున్న ఈ సడెన్ యూ-టర్న్ ఒక సజీవ నిదర్శనం. అమెరికా వెనక్కి తగ్గడం వెనుక శాంతి కాముకత కంటే, ప్రపంచ ఆర్థిక మాంద్యం భయం, స్వదేశంలో రాజకీయ ఒత్తిళ్లే ఎక్కువగా కనిపిస్తున్నాయి. ఏది ఏమైనా, ట్రంప్ తీసుకున్న ఈ రెండు వారాల విరామ నిర్ణయం.. నిత్యావసరాలు, పెట్రోల్ ధరల భయంతో బతుకుతున్న సామాన్యుడి జేబుకు మాత్రం కొండంత ఊరటనిచ్చింది. ఈ 14 రోజుల్లో శాంతి ఒప్పందం కుదిరితేనే ప్రపంచానికి భవిష్యత్తు.. లేదంటే మళ్లీ ఆర్థిక విధ్వంసమే!
Also Read:
US Iran Ceasefire | యుద్ధానికి బ్రేక్: ట్రంప్, ఇరాన్ 14 రోజుల సంధి!మ్యాక్ 15 హైపర్ సోనిక్ క్షిపణులు: రంగంలోకి దిగిన ఇరాన్ సైన్యం
హర్మూజ్ జలసంధిపై ఇరాన్ పట్టు.. భారత్లో పెట్రోల్ మంటలు ఖాయం!
పెట్రోల్ దెబ్బకు పాక్ విలవిల.. ఇంధన కొరతతో స్మార్ట్ లాక్డౌన్!
ఈ రాత్రితో ఇరాన్ బూడిద కానుందా? ట్రంప్ సంచలన పోస్ట్
