పశ్చిమాసియాలో రగులుతున్న యుద్ధ జ్వాలలు ఏ క్షణమైనా ప్రపంచ ఆర్థిక వ్యవస్థను దహించివేసేలా ఉన్నాయి. "అమెరికా-ఇరాన్ మధ్య గొడవ జరిగితే సామాన్యుడికెంటి సంబంధం?" అని మీరు నిర్లక్ష్యంగా అనుకుంటున్నారా? ఆ రెండు దేశాల మధ్య మహా యుద్ధమే జరిగితే.. రేపు మీరు బంకులో కొట్టించే పెట్రోల్ ధర, మార్కెట్లో కొనే నిత్యావసరాల రేట్లు ఆకాశాన్ని తాకడం ఖాయం! శాంతి కోసం పాకిస్థాన్ చేస్తున్న మధ్యవర్తిత్వ ప్రయత్నాలు ఫలిస్తాయా? లేక అమెరికా పంతం, ఇరాన్ ప్రతీకారం మధ్య ప్రపంచం బలికానుందా? తెరవెనుక సాగుతున్న ఉత్కంఠభరిత దౌత్య యుద్ధం మీకోసం..
ట్రంప్కు పాక్ ఆర్మీ చీఫ్ విజ్ఞప్తి.. దిగ్బంధనం ఎత్తివేయండి!
పాకిస్థాన్ ఆర్మీ చీఫ్ జనరల్ అసిమ్ మునీర్.. అమెరికా అధ్యక్షుడు డొనాల్డ్ ట్రంప్తో అత్యంత కీలకమైన సంభాషణ జరిపారు. ఇరాన్ పోర్టులపై అమెరికా నిర్దాక్షిణ్యంగా విధించిన కఠినమైన దిగ్బంధనాన్ని వెంటనే పునరాలోచించాలని ఆయన కోరారు.
రాయిటర్స్ వార్తా సంస్థ నివేదిక ప్రకారం.. ఈ దిగ్బంధనమే అమెరికా, ఇరాన్ మధ్య శాంతి చర్చలు పునఃప్రారంభం కావడానికి అతిపెద్ద అవరోధంగా మారిందని ట్రంప్కు మునీర్ తేల్చిచెప్పారు. దీనివల్ల దౌత్యపరమైన పురోగతి పూర్తిగా ఆగిపోయిందని, టెహ్రాన్ను మళ్లీ చర్చల టేబుల్ వద్దకు తీసుకురావడం అత్యంత కష్టంగా మారిందని పాక్ భద్రతా వర్గాలు వెల్లడించాయి.
దీనిపై స్పందించిన ట్రంప్.. మునీర్ సలహాను తాను కచ్చితంగా పరిశీలిస్తానని హామీ ఇవ్వడం గమనార్హం. వాషింగ్టన్, టెహ్రాన్ మధ్య ఉన్న సున్నితమైన కాల్పుల విరమణ ఒప్పందం అత్యంత అనిశ్చితిలో పడిన ప్రస్తుత తరుణంలో ఈ సంభాషణ జరగడం తీవ్ర ప్రాధాన్యత సంతరించుకుంది.
పాక్ ప్రధాని ఆహ్వానం.. నిర్మొహమాటంగా తిరస్కరించిన ఇరాన్!
ఈ మహా సంక్షోభాన్ని నివారించేందుకు పాకిస్థాన్ ప్రధాని షెహబాజ్ షరీఫ్ నేరుగా ఇరాన్ అధ్యక్షుడు మసూద్ పెజెష్కియాన్ను సంప్రదించారు. పాకిస్థాన్ వేదికగా జరిగే శాంతి చర్చల కోసం ఇరాన్ ప్రతినిధి బృందాన్ని పంపాలని ఆయన విజ్ఞప్తి చేశారు. కానీ, పెజెష్కియాన్ ఈ ప్రతిపాదనను నిర్మొహమాటంగా తిరస్కరించారు.
తమ పోర్టులపై అమెరికా దిగ్బంధనాన్ని పూర్తిగా ఎత్తివేసేంత వరకు, తాము ఎలాంటి చర్చల్లో పాల్గొనే ప్రసక్తే లేదని కుండబద్దలు కొట్టారు. సోమవారం నాడు పెజెష్కియాన్ మాట్లాడుతూ.. అమెరికాతో ఉద్రిక్తతలను తగ్గించుకోవడానికి ప్రతి హేతుబద్ధమైన, దౌత్యపరమైన మార్గాన్ని ఉపయోగించుకోవాలని చెప్పారు. అదే సమయంలో వాషింగ్టన్తో వ్యవహరించేటప్పుడు అత్యంత అప్రమత్తంగా ఉండాలని, వారిపై అపనమ్మకం అనేది కాదనలేని అవసరమని ఆయన ఇరాన్ అధికారిక వార్తా సంస్థ 'ఐఆర్ఎన్ఏ' (IRNA) వేదికగా స్పష్టం చేశారు.
నౌక హైజాక్.. భగ్గుమంటున్న టెహ్రాన్, ప్రతీకార జ్వాలలు!
ఒకవైపు శాంతి చర్చల ప్రయత్నాలు జరుగుతుండగానే.. అమెరికా చేసిన ఒక రెచ్చగొట్టే చర్య ఈ ఉద్రిక్తతలను మళ్లీ పతాక స్థాయికి చేర్చింది. కఠిన దిగ్బంధనాన్ని లెక్కచేయకుండా బందర్ అబ్బాస్ పోర్టు వైపు వెళ్తున్న ఒక ఇరాన్ కార్గో (సరుకు రవాణా) నౌకను అమెరికా బలగాలు అత్యంత నాటకీయంగా తమ ఆధీనంలోకి (సీజ్) తీసుకున్నాయి.
దీంతో రెండు దేశాల మధ్య ఉన్న కాల్పుల విరమణ ఒప్పందం తీవ్ర ఒత్తిడికి గురైంది. ఈ దాడిపై ఇరాన్ ఉగ్రరూపం దాల్చింది. అమెరికా చర్యకు కచ్చితంగా ప్రతీకారం తీర్చుకుంటామని భీకర శపథం చేసింది. అందుకే పాకిస్థాన్లో ప్లాన్ చేసిన కొత్త శాంతి చర్చలకు వెళ్లేందుకు ససేమిరా అంది.
అమెరికా తీరుపై ఇరాన్ ఫైర్.. డెడ్లైన్లకు భయపడం!
ఈ పరిణామాలపై ఇరాన్ ప్రభుత్వ మీడియా అమెరికాపై తీవ్ర విమర్శలు గుప్పించింది. అమెరికా కొనసాగిస్తున్న దిగ్బంధనం, వాషింగ్టన్ నుంచి వస్తున్న బెదిరింపులు, పూటకో మాట మారుస్తున్న వారి వైఖరి, మితిమీరిన డిమాండ్ల కారణంగానే తాము తాజా శాంతి చర్చలను తిరస్కరించామని స్పష్టం చేసింది.
ఇరాన్ విదేశాంగ శాఖ ప్రతినిధి ఇస్మాయిల్ బఘాయీ ఏకంగా అమెరికా దౌత్యాన్ని దెబ్బతీస్తోందని ఆరోపించారు. దౌత్యపరమైన ప్రక్రియను కొనసాగించడంలో వాషింగ్టన్కు ఏమాత్రం చిత్తశుద్ధి లేదని ఆయన తేల్చిచెప్పారు. తాము స్పష్టంగా చెప్పిన డిమాండ్ల నుంచి వెనక్కి తగ్గే ప్రసక్తే లేదన్నారు.
జాతీయ ప్రయోజనాలను కాపాడుకునే విషయంలో తాము ఎలాంటి "డెడ్లైన్లు లేదా అల్టిమేటమ్స్"ను ఏమాత్రం విశ్వసించబోమని బఘాయీ సంచలన వ్యాఖ్యలు చేశారు. వాస్తవానికి, ప్రస్తుతం అమల్లో ఉన్న రెండు వారాల కాల్పుల విరమణ గడువు ముగిసేలోపే పాకిస్థాన్లో మరో దఫా చర్చలు ప్రారంభించాలని అమెరికా ఎంతో ఆశగా ఎదురుచూడటం గమనార్హం.
అమెరికా అహంకారం, ఇరాన్ ఆత్మగౌరవం మధ్య ఇప్పుడు ప్రపంచ శాంతి నలిగిపోతోంది. రెండు వారాల కాల్పుల విరమణ గడువు ముగిసేలోపు ఈ డెడ్లాక్ వీడకపోతే.. ఇరాన్ ప్రతీకార దాడులకు దిగడం, పశ్చిమాసియా మళ్లీ భయంకరమైన రణరంగంగా మారడం ఖాయం. ఒకవేళ అదే జరిగితే, దెబ్బతిన్న సప్లై చెయిన్తో చమురు ధరలు మండిపోయి సామాన్యుడి బతుకు మరింత భారంగా మారడం తథ్యం. శాంతి పావురం ఎగురుతుందా లేక క్షిపణుల వర్షం కురుస్తుందా అన్నది పాలకుల తదుపరి నిర్ణయాలపైనే ఆధారపడి ఉంది!
Also Read:
ట్రంప్ అంచనాలు తలకిందులు.. అమెరికాలో భగ్గుమంటున్న పెట్రోల్Iran Arms Smuggling: అమెరికాకు చిక్కిన లేడీ స్మగ్లర్
జపాన్లో సముద్రపు అడుగున మహా భూకంపం.. 3 మీటర్ల ఎత్తున సునామీ ముప్పు!
అమెరికాకు ఇరాన్ బిగ్ షాక్: ఇస్లామాబాద్ చర్చలు అవాస్తవం!
రెండు నెలలైనా ఖమేనీకి దక్కని ఆరడుగుల నేల.. ఇరాన్ ఎందుకు భయపడుతోంది?
