పేదరికం మీ గొంతు నొక్కేస్తోందని బాధపడుతున్నారా? డబ్బు, రాజకీయ వారసత్వం లేకపోతే ఈ సమాజంలో ఎదగలేమని నిరాశలో ఉన్నారా? అయితే, నెలకు కనీసం రెండున్నర వేల రూపాయలు కూడా సంపాదించలేని ఒక సామాన్య పనిమనిషి.. ఏకంగా కోటీశ్వరులైన రాజకీయ ఉద్దండులను మట్టికరిపించిన ఈ బెంగాల్ సంచలనం గురించి మీరు కచ్చితంగా తెలుసుకోవాలి. ఇది కేవలం ఒక మహిళ గెలుపు కాదు.. సామాన్యుడి ఓటు తలుచుకుంటే ఒకప్పుడు టీ అమ్ముకున్న వ్యక్తిని ప్రధానిగా, ప్రపంచ దిక్సూచిగా చేయగలదు.. అలాగే ఇళ్లలో గిన్నెలు కడిగే చేతులతో చట్టాలు రాయించగలదు అని నిరూపించిన అతిపెద్ద ప్రజాస్వామ్య విజయం!
కూలిన అహంకారం.. గెలిచిన ఆత్మగౌరవం
ఇటీవల పశ్చిమ బెంగాల్ అసెంబ్లీ ఎన్నికల్లో భారతీయ జనతా పార్టీ (బీజేపీ) ఘన విజయం సాధించిన విషయం యావత్ దేశాన్ని కుదిపేసింది. కానీ, అదే గడ్డపై నమోదైన ఈ అసాధారణ గెలుపు ఇప్పుడు మరింత సంచలనంగా మారింది. తూర్పు భారతం నుంచి ఒక సామాన్య మహిళ గొంతుక ఇప్పుడు దేశవ్యాప్త చర్చకు దారితీసింది. ఆమే 37 ఏళ్ల కలితా మాఝీ. గత రెండు దశాబ్దాలుగా ఆమె జీవన పోరాటం అత్యంత కఠినంగా సాగింది. రోజుకు మూడు నాలుగు ఇళ్లలో పనిమనిషిగా.. గిన్నెలు కడుగుతూ, వంట చేస్తూ రెక్కాడితే గానీ డొక్కాడని స్థితిలో ఆమె జీవితాన్ని నెట్టుకొచ్చారు. రాజకీయాల్లోకి రావడమే ఒక ఎత్తైతే, ఏకంగా ఘన విజయం సాధించడం మరో ఎత్తు.
12 వేల మెజారిటీ.. 1.07 లక్షల ఓట్ల సునామీ
ఎస్సీ (SC) రిజర్వ్ స్థానమైన ఆస్గ్రామ్ (Ausgram) నియోజకవర్గం నుంచి బీజేపీ అభ్యర్థిగా కలితా మాఝీ బరిలోకి దిగారు. డబ్బు, కండబలంతో విర్రవీగే అధికార తృణమూల్ కాంగ్రెస్ (టీఎంసీ) అభ్యర్థిపై ఆమె పోటీకి నిలబడటమే ఒక పెద్ద సాహసం. కానీ, సామాన్యుడి సత్తా ముందు ఆ అధికార గర్వం తలవంచింది. రాజకీయ ఉద్దండులను పక్కకు నెడుతూ, టీఎంసీ అభ్యర్థిపై కలితా ఏకంగా 12,000 ఓట్ల భారీ మెజారిటీతో అఖండ విజయం సాధించి అందరినీ విస్మయానికి గురిచేశారు. ఏకంగా 1,07,692 ఓట్లు సాధించి ప్రజాస్వామ్యానికే గర్వకారణంగా నిలిచారు. ఈ అద్భుత విజయవార్త తెలియగానే బెంగాల్లోనే కాదు, యావత్ భారతావని ఆమె గురించి ఆరా తీయడం మొదలుపెట్టింది.
ఉదయం గిన్నెలు కడిగింది.. సాయంత్రం ప్రచారం చేసింది!
కలితా మాఝీ నిబద్ధత గురించి వింటే ఎవరైనా ఆశ్చర్యంతో ముక్కున వేలేసుకోవాల్సిందే. సాక్షాత్తూ జాతీయ పార్టీ ఆమెను ఎమ్మెల్యే అభ్యర్థిగా ప్రకటించిన తర్వాత కూడా ఆమె తన వృత్తిని ఏమాత్రం వీడలేదు. ఉదయం పూట యథావిధిగా ఇళ్లలో పాత్రలు కడగడం, వంట పనులు పూర్తి చేయడం.. ఆ తర్వాతే ఎన్నికల ప్రచారంలోకి వెళ్లడం దినచర్యగా మార్చుకున్నారు. "నేను మీలో ఒకరిని" అని ఆమె మైకుల్లో అరుచుకుంటూ చెప్పాల్సిన అవసరం రాలేదు. తన పని పట్ల ఆమెకున్న గౌరవం, బాధ్యత, ఆమె జీవనశైలే ప్రజల్లో అమితమైన నమ్మకాన్ని కలిగించింది. ఎన్నికల్లో గెలిచి ఎమ్మెల్యే అయిన తర్వాత కూడా ఆమెలో అదే వినయం కనిపించడం ఆమె నిజమైన నాయకత్వానికి నిదర్శనం.
సాధారణ జీవితం నుంచి అసాధారణ విజయాలు సాధించిన వారే చరిత్రలో నిలిచిపోతారు. కలితా మాఝీ కథ కేవలం ఒక రాజకీయ సంచలనం మాత్రమే కాదు.. అది కష్టపడి తన కాళ్లపై తాను నిలబడే ప్రతి సామాన్యుడి ఆత్మవిశ్వాసానికి సజీవ ప్రతీక. పేదరికం, కష్టాలు తెలిసిన వారు చట్టసభల్లో అడుగుపెట్టినప్పుడే అట్టడుగు వర్గాలకు నిజమైన న్యాయం, అభివృద్ధి అందుతాయి. సామాన్యుడా.. డబ్బు లేదని, బ్యాక్గ్రౌండ్ లేదని భయపడకు. నిరంతర శ్రమ, నిజాయితీ ఉంటే భారతదేశం లాంటి ప్రజాస్వామ్య దేశంలో ఆకాశమే నీకు హద్దు. ఒక పనిమనిషి చట్టసభలో అడుగుపెట్టిన ఈ అద్భుతం.. రేపు నీ జీవితంలోనూ సాధ్యమే అన్నది రాబోయే తరాలకు ఒక గొప్ప పాఠం!
