ఢిల్లీ వేదికగా సాగిన భీకర మంతనాలకు ముగింపు పలుకుతూ.. కేరళ తదుపరి ముఖ్యమంత్రిగా వీడీ సతీశన్ను కాంగ్రెస్ అధిష్టానం ఖరారు చేసింది. సీఎం రేసులో చివరి నిమిషం వరకు ఏఐసీసీ ప్రధాన కార్యదర్శి కేసీ వేణుగోపాల్ గట్టి పోటీనిచ్చినప్పటికీ.. ఎమ్మెల్యేల మద్దతు సతీశన్కే అండగా నిలవడంతో ఆయనకే ఆ కిరీటం దక్కింది. గురువారం మధ్యాహ్నం ఢిల్లీలో జరిగిన తుది విడత చర్చల అనంతరం కాంగ్రెస్ జాతీయ అధ్యక్షుడు మల్లికార్జున ఖర్గే ఈ సంచలన నిర్ణయాన్ని అధికారికంగా ప్రకటించారు. దీంతో అటు ఢిల్లీ నుంచి ఇటు తిరువనంతపురం వరకు కాంగ్రెస్ శ్రేణుల్లో సంబరాలు అంబరాన్నంటాయి.
అధిష్టానం కసరత్తు.. ఎమ్మెల్యేల ఓటే శ్రీరామరక్ష!
మే 4న వెలువడిన అసెంబ్లీ ఎన్నికల ఫలితాల్లో యూడీఎఫ్ అఖండ విజయం సాధించింది. కానీ, సీఎం కుర్చీ ఎవరికి దక్కాలన్న విషయంలో ఏకాభిప్రాయం కుదరకపోవడంతో గత వారం రోజులుగా పార్టీలో ముమ్మర కసరత్తు సాగింది.
పరిస్థితిని చక్కదిద్దేందుకు ఏఐసీసీ పరిశీలకులు అజయ్ మాకెన్, ముకుల్ వాస్నిక్, రాష్ట్ర ఇన్చార్జ్ దీపా దాస్ మున్షీ రంగంలోకి దిగారు. కొత్తగా ఎన్నికైన ఎమ్మెల్యేలందరితో ఒక్కొక్కరిగా రహస్యంగా మాట్లాడి వారి నాడి పట్టారు. మెజారిటీ ఎమ్మెల్యేలు వీడీ సతీశన్ వైపే మొగ్గు చూపడంతో, అధిష్టానం ఆయనకే జై కొట్టక తప్పలేదు.
తెరవెనుక రాహుల్ చక్రం.. పోరాటానికి దక్కిన ప్రతిఫలం
ఈ కీలక ఎంపికలో కాంగ్రెస్ అగ్రనేత రాహుల్ గాంధీ పాత్ర అత్యంత కీలకంగా మారింది. బుధవారం సాయంత్రం మల్లికార్జున ఖర్గేతో అరగంట పాటు మంతనాలు జరిపిన రాహుల్.. గురువారం ఉదయం రేసులో ఉన్న కేసీ వేణుగోపాల్తో కూడా ప్రత్యేకంగా భేటీ అయ్యారు.
ఒకవైపు అధిష్టానం పెద్దలతో సత్సంబంధాలు ఉన్న వేణుగోపాల్ పోటీలో ఉన్నా, 61 ఏళ్ల వీడీ సతీశన్ను అదృష్టం వరించడానికి ప్రధాన కారణం ఆయన పోరాట పటిమే! గత ఐదేళ్లుగా ప్రతిపక్ష నేతగా వామపక్ష ప్రభుత్వంపై ఆయన చేసిన అలుపెరగని పోరాటం, క్షేత్రస్థాయిలో పార్టీ క్యాడర్తో ఆయన పెనవేసుకున్న బంధమే ఆయనను ఈ స్థాయికి చేర్చింది.
పదేళ్ల తర్వాత పవర్.. తిరువనంతపురంలో క్లైమాక్స్
పదేళ్ల సుదీర్ఘ నిరీక్షణ తర్వాత కేరళలో తిరిగి అధికారాన్ని చేజిక్కించుకున్న కాంగ్రెస్.. సతీశన్ నాయకత్వంలో సుస్థిర పాలన అందించాలని వ్యూహరచన చేస్తోంది. కేసీ వేణుగోపాల్ను ముఖ్యమంత్రిగా చూడాలనుకున్న ఓ వర్గం నేతలు అధిష్టానం నిర్ణయంతో కాస్త నిరాశలో ఉన్నప్పటికీ.. పార్టీ ప్రయోజనాల కోసం అంతా ఏకతాటిపైకి రావాలని హైకమాండ్ గట్టిగా సూచించింది.
మరికాసేపట్లో తిరువనంతపురంలో జరగనున్న కేరళ కాంగ్రెస్ శాసనసభాపక్ష సమావేశంలో పరిశీలకులు అధికారికంగా వీడీ సతీశన్ పేరును ప్రతిపాదించి ఈ మహా ఘట్టానికి ముగింపు పలకనున్నారు.
దశాబ్దపు నిరీక్షణ తర్వాత కాంగ్రెస్కు దక్కిన అధికారం.. కత్తుల వంతెన లాంటి సీఎం కుర్చీ! గ్రూపు రాజకీయాలకు అతీతంగా వీడీ సతీశన్ ప్రస్థానం కేరళ రాజకీయాల్లో ఒక సరికొత్త, సుస్థిర అధ్యాయానికి నాంది పలకబోతోంది!
