ప్రజలు ఓటేస్తే వ్యవస్థ మారుతుందని మీరు నమ్ముతున్నారా? రాత్రికి రాత్రే పాత రాజకీయాలన్నీ కూలిపోయి సామాన్యుడి రాజ్యం వస్తుందని ఆశపడుతున్నారా? అయితే తమిళనాడులో జరుగుతున్న ఈ పొలిటికల్ మైండ్ గేమ్ చూస్తే మీరు కచ్చితంగా షాక్ అవుతారు. దళపతి విజయ్ సీఎం కుర్చీ దాకా వెళ్లి ఎందుకు వెనక్కి వస్తున్నాడు? కోట్లాది మంది ఓట్లతో అతిపెద్ద పార్టీగా అవతరించినా.. ఆయన రిమోట్ కంట్రోల్ ఎవరి చేతిలో ఉందో చెప్పే పచ్చి నిజం ఇది!
సీఎం కుర్చీకి మూడు అడుగుల దూరం.. దళపతికి గవర్నర్ బ్రేక్!
తమిళనాట రాజకీయాలు క్షణక్షణం రసవత్తరంగా మారుతున్నాయి. ఏ క్షణానికి ఎలాంటి ఊహించని ట్విస్ట్ తెర మీదకు వస్తుందో తెలియని ఉత్కంఠ నెలకొంది. సాక్షాత్తూ సీఎం సీటుకు అడుగు దూరంలోకి వెళ్లి దళపతి విజయ్ వెనక్కి వచ్చేస్తున్నారు. ఇప్పటికి ఏకంగా మూడు సార్లు గవర్నర్ నుంచి ఆయనకు తీవ్ర నిరాశే ఎదురైంది. అయితే, రాష్ట్ర రాజకీయాలను లోతుగా పరిశీలిస్తున్న వారిని అడిగితే అసలు నిజం వేరేలా ఉంది. టీవీకే (TVK) 107 సీట్లతో అతిపెద్ద పార్టీగా అవతరించి ఉండొచ్చు, డీఎంకే (DMK) 59 సీట్లతో రెండో స్థానానికే పరిమితమై ఉండొచ్చు. కానీ, విజయ్ సీఎం సీటులో కూర్చోవాలా వద్దా అన్నది మాజీ సీఎం స్టాలిన్ డిసైడ్ చేస్తున్నారన్న సంచలన నిజం ఇప్పుడు బయటపడుతోంది.
స్టాలిన్ మైండ్ గేమ్.. కాంగ్రెస్కు కటీఫ్, కమ్యూనిస్టులకు గ్రీన్ సిగ్నల్!
ఎన్నికల ఫలితాలు వచ్చిన వెంటనే స్టాలిన్ ఆడిన పొలిటికల్ మైండ్ గేమ్ అంతా ఇంతా కాదు. ముందే పొత్తు పెట్టుకున్న పార్టీలతో సమావేశమైన ఆయన.. ఎన్నికల తర్వాత పొత్తుల మీద మీకు నచ్చిన దారిలో వెళ్లవచ్చని వారికి పూర్తి ఫ్రీడమ్ ఇచ్చారు. ఈ క్రమంలో కాంగ్రెస్ కోయిల కొంచెం ముందే కూయడంతో, ఆ పార్టీతో స్టాలిన్ నిర్దాక్షిణ్యంగా కటీఫ్ చెప్పేశారు. మరోవైపు విజయ్ పార్టీకి మద్దతిస్తున్న కమ్యూనిస్ట్ పార్టీలు (సీపీఐ, సీపీఎం) కూడా టీవీకేకి సపోర్ట్ చేయడానికి ముందే రహస్యంగా స్టాలిన్తో సమావేశమయ్యాయి.
సరిగ్గా స్టాలిన్ నిర్ణయం మేరకే ఆ రెండు పార్టీలు ప్రభుత్వంలో చేరకుండా కేవలం 'బయట నుంచి మాత్రమే మద్దతు' ఇస్తున్నట్లు ప్రకటించాయి. అదే సమయంలో తమిళనాట బీజేపీని అడ్డుకోవడానికి డీఎంకేతో కలిసి పనిచేస్తామని కూడా స్పష్టం చేశాయి. దీన్నిబట్టి చూస్తే సీపీఐ, సీపీఎం రెండూ పరోక్షంగా స్టాలిన్ చెప్పుచేతల్లోనే ఉన్నాయని ఇట్టే అర్థమవుతోంది.
రెండు సీట్ల వీసీకే హైడ్రామా.. డిమాండ్లు చూస్తే మైండ్ బ్లాక్!
ఇక దళిత భావజాలం ఉన్న వీసీకే (VCK) పార్టీ కూడా టీవీకేకు మద్దతు ఇచ్చే విషయంలో పెద్ద హైడ్రామానే క్రియేట్ చేస్తోంది. కేవలం రెండు అసెంబ్లీ సీట్లు ఉన్న ఆ పార్టీ ఏకంగా డిప్యూటీ సీఎం (ఉప ముఖ్యమంత్రి) పదవి కావాలని భారీ డిమాండ్ పెడుతోంది. అంతటితో ఆగకుండా, తిరుచ్చి తూర్పు నుంచి విజయ్ గనక రాజీనామా చేస్తే.. ఆ సీటు కూడా తమకే ఇవ్వాలని కఠినమైన కండిషన్లు పెడుతోంది. అత్యంత కీలకమైన పట్టణాభివృద్ధి శాఖ ఇస్తామని హామీ ఇచ్చినా సరే.. మద్దతు ఇస్తున్న ఈ పార్టీల కండిషన్లు మాత్రం కొండవీటి చాంతాడంత ఉండటం విజయ్కు ప్రాణసంకటంగా మారింది.
ఆరు నెలల గడువు వెనుక మాస్టర్ ప్లాన్!
రాబోయే ఆరు నెలల కాలం పాటు విజయ్కి ఎలాంటి ఇబ్బందులు రానీయబోమని స్టాలిన్ ప్రకటించడం వెనుక అతిపెద్ద వ్యూహం దాగి ఉంది. ఆరు నెలల తర్వాత ఏం జరిగినా ఎవరూ ఆశ్చర్యపోవాల్సిన పనిలేదు. ఒకవేళ కేంద్ర ప్రభుత్వం తీసుకొచ్చే విధానాల విషయంలో విజయ్ గనక ప్రధాని మోదీకి అనుకూలంగా వ్యవహరిస్తే.. అప్పుడు లెఫ్ట్ పార్టీలు ఠకీమని తమ మద్దతు ఉపసంహరించుకునే ప్రమాదం పొంచి ఉంది. అంటే, విజయ్ ముఖ్యమంత్రి అయినా.. అసలు చక్రం తిప్పేది మాత్రం స్టాలిన్ అన్నది ఖాయంగా కనిపిస్తోంది.
ప్రజాస్వామ్యంలో సొంత మెజారిటీ లేకపోతే ఒక స్టార్ హీరో అయినా సరే రాజకీయ చదరంగంలో ఎలా పావుగా మారిపోతాడో చెప్పేందుకు దళపతి విజయ్ పరిస్థితే ప్రత్యక్ష ఉదాహరణ. ప్రజలు పాత పాలనపై విరక్తితో కొత్త నాయకుడిని గెలిపిస్తే.. ఆ పాత నాయకులే మళ్లీ తెరవెనుక నుంచి ప్రభుత్వాన్ని శాసించడం సామాన్యుడి ఓటును అవమానించడమే! విజయ్ ఈ ఆరు నెలల 'హనీమూన్ పిరియడ్'ను దాటుకుని స్వతంత్రంగా నిలబడతాడా, లేక స్టాలిన్ గీసిన గీతలోనే నడిచే కీలుబొమ్మ ముఖ్యమంత్రిగా మిగిలిపోతాడా అన్నదే ఇప్పుడు అసలు సవాల్. ఈ రాజకీయ ఉచ్చులో నుంచి బయటపడకపోతే, ఏ మార్పు కోసమైతే ప్రజలు ఓటేశారో ఆ మార్పు చరిత్రలోనే ఒక పెద్ద జోక్గా మిగిలిపోవడం ఖాయం!
Also Read:
బెంగాల్ సీఎంగా సువేందు: 30 లక్షల ఓట్లు గల్లంతు చేశారన్న అభిషేక్ బెనర్జీ!దళపతికి కొత్త టెన్షన్: గవర్నర్ భేటీలో సినీ నిర్మాత ఎంట్రీ వెనుక మతలబు ఏంటి?
దశాబ్దాల కమ్యూనిస్టు, దీదీ కోట బద్దలు.. బెంగాల్ సీఎంగా సువేందు అట్టహాసంగా ప్రమాణం!
తమిళనాట రిసార్ట్ పాలిటిక్స్: 40 మంది అన్నాడీఎంకే ఎమ్మెల్యేల తరలింపు
కాంగ్రెస్కు అఖిలేష్ యాదవ్ చురకలు.. సోషల్ మీడియాలో సెగలు
