మధ్యప్రాచ్యంలో రగులుతున్న యుద్ధం చల్లారకముందే.. అగ్రరాజ్యం అమెరికా మరో మహా వినాశనానికి తెరతీస్తోందా? ప్రపంచ పటంలో ఒక చిన్న ద్వీపమైన క్యూబాపై అమెరికా అధ్యక్షుడు డొనాల్డ్ ట్రంప్ ప్రకటించిన తాజా సైనిక ఆపరేషన్.. సగటు మనిషి జీవితాన్ని ఎలా కుదిపేయబోతోందో తెలుసా? ఇరాన్ యుద్ధం నుంచి వెనుదిరుగుతున్న అమెరికా సైన్యం.. దారిలోనే క్యూబాను ఆక్రమించబోతోందన్న ట్రంప్ ప్రకటన ఇప్పుడు ప్రపంచవ్యాప్తంగా మూడో ప్రపంచ యుద్ధపు భయాలను రేకెత్తిస్తోంది. ప్రపంచ శాంతిని బలిపీఠం ఎక్కిస్తున్న ఈ ఆధిపత్య పోరు వెనుక ఉన్న అసలు రహస్యాలివే!
ఫ్లోరిడా వేదికగా రణభేరి.. 'ఆపరేషన్ క్యూబా' షురూ!
ఫ్లోరిడాలో జరిగిన ఒక భారీ బహిరంగ సభలో ట్రంప్ తన భయంకరమైన వ్యూహాన్ని ప్రపంచానికి కుండబద్దలు కొట్టారు. "మేము ఆపరేషన్ క్యూబాను ప్రారంభిస్తున్నాం.. క్షణాల్లో ఆ దేశాన్ని మా ఆధీనంలోకి తీసుకుంటాం" అంటూ ఆయన చేసిన గర్జన అంతర్జాతీయ సమాజాన్ని ఉలిక్కిపడేలా చేసింది.
ఇరాన్ గడ్డపై నుంచి వెనుదిరుగుతున్న తమ శక్తివంతమైన సైన్యం.. మార్గమధ్యంలోనే ఈ ఆక్రమణను అత్యంత సునాయాసంగా పూర్తి చేస్తుందని ట్రంప్ అపారమైన ధీమా వ్యక్తం చేశారు. క్యూబాపై పూర్తిస్థాయి సైనిక నియంత్రణ సాధించడమే తమ తదుపరి లక్ష్యమని ఆయన బహిరంగంగానే తేల్చి చెప్పారు.
వంద గజాల దూరంలో 'అబ్రహం లింకన్'.. లొంగుబాటుకు స్కెచ్!
శత్రువుల గుండెల్లో రైళ్లు పరిగెత్తించే అమెరికా అత్యాధునిక యుద్ధనౌక 'అబ్రహం లింకన్' (USS Abraham Lincoln) క్యూబా తీరానికి కేవలం వంద గజాల దూరంలో మోహరించబోతోందని ట్రంప్ తీవ్రంగా హెచ్చరించారు.
ఆ భీకరమైన నౌకను చూసి క్యూబా పాలకులే భయంతో వణికిపోతూ.. "మేము లొంగిపోతున్నాం" అని స్వయంగా ప్రకటించే స్థాయికి వారిని దిగజారుస్తామని ఆయన శపథం చేశారు. క్యూబాను తమ చెప్పుచేతల్లోకి తెచ్చుకోవడానికి అమెరికా ప్రయోగించనున్న అత్యంత తీవ్రమైన, కర్కశమైన సైనిక చర్యలకు ఇది స్పష్టమైన సంకేతం.
దశాబ్దాల పగ.. ఒబామా స్నేహం నుంచి ట్రంప్ ఉగ్రరూపం వరకు!
వాస్తవానికి అమెరికా, క్యూబాల మధ్య ఈ ఆధిపత్య పోరు ఈనాటిది కాదు. ఇది 19వ శతాబ్దం నుంచి రగులుతున్న బద్ధ శత్రుత్వం. ఫిడెల్ కాస్ట్రో నాయకత్వంలో క్యూబాలో వచ్చిన చారిత్రాత్మక విప్లవం తర్వాత ఈ వైరం అగ్నిపర్వతంలా బద్దలైంది.
అమెరికా వ్యాపార ప్రయోజనాలకు గండిపడటం, క్యూబాలో కమ్యూనిస్టు సిద్ధాంతాలు బలంగా వేళ్లూనుకోవడం, దానికి తోడు సోవియట్ యూనియన్తో క్యూబా అంటకాగడం ఈ పచ్చగడ్డి వేస్తే భగ్గుమనే శత్రుత్వానికి మరింత ఆజ్యం పోశాయి. ఒక దశలో బరాక్ ఒబామా అమెరికా అధ్యక్షుడిగా ఉన్న సమయంలో, దశాబ్దాల శత్రుత్వాన్ని పక్కనపెట్టి ఇరు దేశాల మధ్య ఒక ఆహ్లాదకరమైన, స్నేహపూర్వక వాతావరణం చిగురించింది. కానీ, ఎప్పుడైతే డొనాల్డ్ ట్రంప్ అధికార పీఠం ఎక్కారో.. ఆ స్నేహ బంధాలు మళ్లీ కుప్పకూలిపోయి ఇప్పుడు యుద్ధ వాతావరణం నెలకొంది.
వెనెజువెలా తర్వాత 'క్యూబా నెక్స్ట్'.. ఆక్రమణే లక్ష్యం!
పొరుగు దేశాలపై ఆధిపత్యం చెలాయించడంలో ట్రంప్ తీరు ఎప్పుడూ అత్యంత దూకుడుగానే ఉంటుంది. గతంలో వెనెజువెలా అధ్యక్షుడు మదురోను సైనిక చర్య ద్వారా అమెరికా ఉక్కుపాదంతో అణిచివేసిన సమయంలోనే.. ట్రంప్ 'క్యూబా నెక్ట్స్' అంటూ పరోక్ష హెచ్చరికలు జారీ చేశారు.
"క్యూబా ఒక విఫల దేశం.. అక్కడ డబ్బు లేదు, చమురు లేదు. కానీ ప్రకృతి రమణీయత ఉట్టిపడే అదొక అందమైన ద్వీపం. ఆ నేలను స్వాధీనం చేసుకోవడాన్ని నేను చాలా గొప్ప గౌరవంగా భావిస్తాను" అని ట్రంప్ సంచలన వ్యాఖ్యలు చేశారు. చిన్న దేశాల సార్వభౌమత్వాన్ని అమెరికా ఎంత చులకనగా చూస్తుందో చెప్పడానికి ఈ వ్యాఖ్యలే పచ్చి నిదర్శనం.
ఆంక్షల అంధకారం.. అగ్రరాజ్యానికి క్యూబా మాస్ కౌంటర్!
ఇప్పటికే అమెరికా విధించిన అత్యంత కఠినమైన ఆర్థిక ఆంక్షలతో క్యూబా ప్రజలు పిట్టల్లా రాలిపోతున్నారు. చమురు దిగుమతులపై ఆంక్షలు విధించడంతో ఆ దేశం అంధకారంలో మగ్గుతోంది. ఇంధన సంక్షోభం, గంటల తరబడి విద్యుత్ కోతలు, గుక్కెడు నీటికి, ప్రాణాలు నిలిపే ఔషధాలకు కటకటలాడుతూ క్యూబా ప్రజలు నరకయాతన అనుభవిస్తున్నారు.
ఇన్ని కష్టాలు ఉన్నా.. ప్రపంచమంతా అమెరికాకు భయపడినా, క్యూబా అధ్యక్షుడు మిగెల్ డియాజ్ కానెల్ (Miguel Diaz-Canel) మాత్రం ట్రంప్ అల్టిమేటంపై సింహంలా గర్జించారు. "మాది ఒక స్వతంత్ర సార్వభౌమ దేశం.. అలాంటి మా గడ్డపై అమెరికా ఆదేశాలు జారీ చేయడం ఏంటి?" అంటూ ఆయన నిప్పులు చెరిగారు. "నేను ఎవరికీ లొంగిపోను, నా పదవికి రాజీనామా చేయను. మా దేశానికి నాయకుడు ఎవరో నిర్ణయించేది మా క్యూబా ప్రజలు మాత్రమే, అమెరికా కాదు" అని ఆయన అగ్రరాజ్యానికి అత్యంత ఘాటుగా బదులిచ్చారు.
అగ్రరాజ్యాల అహంకారం ఎప్పుడూ అమాయక దేశాల ప్రజల నెత్తుటితోనే చరిత్రను రాస్తుంది! ట్రంప్ ఆడుతున్న ఈ డేంజరస్ జియోపాలిటికల్ గేమ్ కేవలం క్యూబాను మాత్రమే కాదు, యావత్ లాటిన్ అమెరికాను ఒక అగ్నిగుండంగా మార్చబోతోంది. ఇరాన్ నుంచి క్యూబా వరకు అమెరికా ఎక్కుపెడుతున్న ఈ తుపాకుల వల్ల.. రాబోయే రోజుల్లో ప్రపంచ వాణిజ్యం స్తంభించి, ద్రవ్యోల్బణం పెరిగి సగటు మనిషి జేబుకు చిల్లులు పడటం ఖాయం. అహంకారపు యుద్ధాలు ఎప్పుడూ శాంతిని తీసుకురావు, అవి కేవలం పేదరికపు స్మశానాలనే మిగులుస్తాయి!
Also Read:
287 మందితో మహా సంగ్రామం.. ఈసారైనా ట్రంప్కు నోబెల్ దక్కేనా?అమెరికాలో రాజ్యాంగ సంక్షోభం.. ట్రంప్కు డెడ్లైన్ విధించిన చట్టం!
అమెరికా లేని భవిష్యత్తు కోసం సిద్ధంకండి! ఇరాన్ సుప్రీం లీడర్ ఖమేనీ సంచలన వ్యాఖ్యలు
Healthcare Under Attack : ఆసుపత్రులే లక్ష్యంగా దాడులు: WHO సంచలన నివేదిక!
US Iran War: అమెరికా గుండెల్లో ఇరాన్ సరికొత్త ఆయుధం
