నివురుగప్పిన నిప్పులా ఉన్న మధ్యప్రాచ్యం ఏ క్షణంలోనైనా అగ్నిపర్వతంలా బద్దలయ్యేలా ఉంది. అగ్రరాజ్యం అమెరికా, ఇరాన్ మధ్య రగులుతున్న యుద్ధ మేఘాలు ఇప్పట్లో చల్లారేలా కనిపించడం లేదు. పచ్చగడ్డి వేస్తే భగ్గుమంటున్న ఈ రెండు దేశాల పంతాలు.. ఇప్పుడు ఒక కొత్త మలుపు తీసుకున్నాయి.
ఇరాన్ 14 సూత్రాల వ్యూహం.. ట్రంప్ ససేమిరా!
యుద్ధాన్ని ముగించాలన్న లక్ష్యంతో ఇరాన్ ప్రభుత్వం తాజాగా అమెరికా ముందు ఒక కీలకమైన 14 సూత్రాల శాంతి ప్రతిపాదనను ఉంచింది. కేవలం తాత్కాలిక కాల్పుల విరమణతో సరిపెట్టుకోకుండా, యుద్ధానికి శాశ్వత ముగింపు పలకాలని ఇరాన్ పట్టుబడుతోంది. కానీ, అమెరికా అధ్యక్షుడు డొనాల్డ్ ట్రంప్ మాత్రం ఈ ప్రతిపాదనపై ఏమాత్రం సానుకూలంగా స్పందించలేదు. ఇరాన్ కోరుతున్న కొన్ని డిమాండ్లకు తాను అంగీకరించే ప్రసక్తే లేదని ఆయన కుండబద్దలు కొట్టారు.
ఆంక్షలు ఎత్తేయాలి.. దళాలు వెనక్కి మళ్లాలి!
ఇరాన్ పంపిన ఆ 14 పాయింట్ల ప్రణాళికలో సంచలన డిమాండ్లు ఉన్నాయి. తమ దేశంపై అమెరికా విధించిన కఠినమైన ఆంక్షలను పూర్తిగా ఎత్తివేయాలని, ఎక్కడికక్కడ నిలిపివేసిన తమ నిధులను తక్షణం విడుదల చేయాలని ఇరాన్ డిమాండ్ చేస్తోంది. అంతేకాదు, తమ దేశ సరిహద్దుల సమీపంలో మోహరించిన అమెరికా సైనిక దళాలను వెంటనే ఉపసంహరించుకోవాలని, నౌకాదళ దిగ్బంధాన్ని సైతం పూర్తిగా తొలగించాలని షరతు విధించింది.
కేవలం తమ దేశంతోనే కాకుండా, లెబనాన్ సహా అన్ని రంగాలు, ప్రాంతాల్లో ఉన్న ఉద్రిక్తతలకు ముగింపు పలకాలన్నది టెహ్రాన్ ప్రధాన వాదన. ఈ డిమాండ్లన్నింటిపై కేవలం ఒక నెల రోజుల్లోనే అమెరికా తేల్చి చెప్పాలని ఇరాన్ పట్టుబడుతోంది. కానీ, అమెరికా మాత్రం కనీసం మరో రెండు నెలల పాటు కాల్పుల విరమణ యథాతథంగా కొనసాగాలని కోరుకుంటోంది.
రాజీ పడేది లేదు.. చట్టాలపై ట్రంప్ ధిక్కారం
"ప్రస్తుతం ఇరు దేశాల మధ్య చర్చలు జరుగుతున్నాయి. కానీ అవి ఏమాత్రం కొలిక్కి రావడం లేదు. నేను అసలు అంగీకరించలేని విషయాలను ఇరాన్ కోరుతోంది" అంటూ ట్రంప్ తన మొండి వైఖరిని స్పష్టం చేశారు.
మరోవైపు సొంత దేశంలోనూ ఆయన చట్టాలను బేఖాతరు చేస్తున్నారు. 60 రోజులకు మించి విదేశాల్లో సైనిక చర్య కొనసాగించాలంటే చట్టసభ (కాంగ్రెస్) ఆమోదం తప్పనిసరి చేసే 'యుద్ధ అధికారాల తీర్మానం' గడువును ట్రంప్ తోసిపుచ్చారు. కాల్పుల విరమణ ఒప్పందంతో ఆ కాలపరిమితి సమర్థవంతంగా ఆగిపోయిందని చట్టసభ సభ్యులకు రాసిన లేఖలో ట్రంప్ పేర్కొన్నారు. అయితే అమెరికా అధ్యక్షుడి ఈ వాదనను అక్కడి న్యాయ నిపుణులు తీవ్రంగా వ్యతిరేకిస్తున్నారు.
గాలి, నీరు అయిపోయింది.. ఇప్పుడు నేల వంతు!
ఇస్లామాబాద్ వేదికగా సాగిన ఈ శాంతి చర్చలు ఒక దశలో సక్సెస్ అవుతాయని ప్రపంచం భావించింది. కానీ, అమెరికా అకస్మాత్తుగా వెనక్కి తగ్గడంతో ఇప్పుడు మళ్లీ భయంకరమైన అనిశ్చితి నెలకొంది. ఈ చర్చలు గనుక పూర్తిగా విఫలమైతే, మళ్లీ భీకర సైనిక చర్యకు దిగుతామని అమెరికా అధికారులు బహిరంగంగా హెచ్చరిస్తున్నారు.
దీనిపై ఇరాన్ రివల్యూషనరీ గార్డ్స్ అత్యంత దీటుగా, ఘాటుగా స్పందించారు. "అమెరికా మరో చారిత్రక పొరపాటు చేయాలని మేము ఆశిస్తున్నాం. ఇప్పటికే సముద్రంలో, గాలిలో ఘోరంగా ఓడిపోయిన అమెరికా.. ఇప్పుడు భూమిపై కూడా తన అదృష్టాన్ని పరీక్షించుకోవాలని మేము కోరుకుంటున్నాం" అంటూ ఇరాన్ దళాలు విసిరిన సవాల్ తీవ్ర ఉత్కంఠ రేపుతోంది.
ఆధిపత్య పోరులో అగ్రరాజ్యం అహంకారం ఒకవైపు.. వెనక్కి తగ్గేది లేదంటున్న ఇరాన్ తెగింపు మరోవైపు! ఈ ఇరు దేశాల పంతాలు ఇలాగే కొనసాగితే.. అది కేవలం ఆ రెండు దేశాలనే కాదు, యావత్ ప్రపంచ శాంతిని బూడిద చేయడం ఖాయం. ఆయుధాలు, ఆంక్షలతో శాంతిని సాధించలేమని అమెరికా ఎప్పుడు గ్రహిస్తుందో కానీ.. చర్చలు విఫలమైతే మాత్రం మూడో ప్రపంచ యుద్ధానికి మధ్యప్రాచ్యం మరోసారి రణరంగంగా మారడం ఖాయం!
Also Read:
ముగిసిన ఇరాన్ యుద్ధం: కాంగ్రెస్కు వైట్హౌస్ కీలక ప్రకటన, ముప్పు తప్పలేదన్న ట్రంప్!హర్మూజ్ జలసంధిలో టెన్షన్: నౌకల రాకపోకలపై ఇరాన్ సంచలన నిర్ణయం
US Cuba Tensions: క్యూబాపై అమెరికా యుద్ధ ప్రకటన!
287 మందితో మహా సంగ్రామం.. ఈసారైనా ట్రంప్కు నోబెల్ దక్కేనా?
అమెరికాలో రాజ్యాంగ సంక్షోభం.. ట్రంప్కు డెడ్లైన్ విధించిన చట్టం!
