పెళ్లికి ముందే వార్నింగ్.. అయినా వినలేదు!
తన మొదటి భర్త, వ్యాపారవేత్త బంటీ నేగీతో ఎదుర్కొన్న నరకాన్ని కామ్యా పంజాబీ తాజాగా పంచుకున్నారు. పెళ్లికి ముందే వారిద్దరి మధ్య తరచూ గొడవలు జరిగేవట. ఆ సమయంలోనే బంటీ తనకు సరైన వ్యక్తి కాదని, ఈ బంధం సెట్ కాదని తల్లిదండ్రులు హెచ్చరించినా ఆమె పట్టించుకోలేదు. తొలిప్రేమ కావడంతో అతనే కరెక్ట్ అని బలంగా నమ్మి పెళ్లి చేసుకున్నారు. కానీ ఆ నిర్ణయమే ఆమె జీవితంలో పెద్ద శాపంగా మారింది.
ప్రతి పది నిమిషాలకు ఫోన్.. భరించలేని టార్చర్
పెళ్లి జరిగిన తర్వాత కామ్యాను పని మానేయాలని బంటీ కండిషన్ పెట్టాడు. తన తల్లిదండ్రులను, కుటుంబాన్ని పోషించుకోవాల్సిన బాధ్యత ఉందని ఆమె ఆ కండిషన్ను తిరస్కరించింది. అప్పటినుంచి అతనిలో అనుమానం పెరిగిపోయి ప్రతి పది నిమిషాలకు ఫోన్ చేయడం మొదలుపెట్టాడు. ఎందుకు ఫోన్ ఎత్తలేదు? ఎవరితో ఉన్నావు? అని నిరంతరం ప్రశ్నలతో టార్చర్ చేసేవాడని ఆమె గుర్తుచేసుకుంది. ఈ మానసిక క్షోభ తట్టుకోలేక బాత్రూంలో తనను తాను బంధించుకుని గంటల తరబడి ఏడ్చేదాన్నని, ఎన్నో రాత్రులు కన్నీళ్లతోనే గడిపానని కామ్యా ఆవేదన వ్యక్తం చేసింది.
కూతురి కోసమే ఆ నిర్ణయం.. 13 ఏళ్ల బంధానికి ఎండ్ కార్డు
శారీరక హింసను భరిస్తూ, ఆ గాయాలను మేకప్తో దాచుకుంటూ ఎన్నో రోజులు నెట్టుకొచ్చింది. కానీ, ఒకరోజు వారిద్దరి మధ్య జరుగుతున్న భయంకరమైన గొడవను తన కూతురు ఆరా చూడటంతో కామ్యా ఆలోచన మారింది. ఇకపై ఆ టాక్సిక్ బంధంలో ఉంటే కూతురిపై తీవ్ర ప్రభావం పడుతుందని డిసైడ్ అయి, అతడితో జీవించకూడదని నిర్ణయించుకుంది. అలా 13 ఏళ్ల వివాహ బంధానికి ముగింపు పలికి బంటీ నేగీ నుంచి విడిపోయింది. ఆ తర్వాత 2020లో శలభ్ డాంగ్ అనే వ్యక్తిని వివాహం చేసుకుని ఆమె కొత్త జీవితాన్ని ప్రారంభించింది.
పెళ్లికి ముందు కనిపించే 'రెడ్ ఫ్లాగ్స్'ను (ప్రమాద సంకేతాలను) విస్మరిస్తే భవిష్యత్తు ఎంత దారుణంగా ఉంటుందో కామ్యా పంజాబీ జీవితం స్పష్టం చేస్తోంది. గృహ హింసను భరిస్తూ, సమాజం ఏమనుకుంటుందో అన్న భయంతో సర్దుకుపోవడం ఎవరికీ మేలు చేయదు. ముఖ్యంగా పిల్లలు అలాంటి టాక్సిక్ వాతావరణంలో పెరగడం వారిపై తీవ్ర ప్రభావం చూపుతుంది. ఎంతటి సెలబ్రిటీ అయినా సరే, సరైన సమయంలో ఒక కఠినమైన నిర్ణయం తీసుకుంటేనే కొత్త జీవితం మొదలవుతుందనడానికి ఈమె ప్రయాణం ఒక బెస్ట్ ఎగ్జాంపుల్.
