వెండితెరపై ఒక వెలుగు వెలిగి, అకస్మాత్తుగా దూరమైన తారల జీవితాల్లో సామాన్యుడికి తెలియని ఎన్నో చీకటి కోణాలు ఉంటాయి. భారతదేశపు తొలి మహిళా సూపర్ స్టార్ శ్రీదేవి జీవితం కూడా అలాంటి ఎన్నో అంతుచిక్కని రహస్యాలకు నిలయం. ఆమె జయంతి సందర్భంగా గ్లోబల్ స్టార్ ప్రియాంక చోప్రా ప్రకటించిన 'ఎంప్రెస్' (Empress) అనే జీవిత చరిత్ర పుస్తకం ఇప్పుడు సినీ లోకంలో తీవ్ర ఆసక్తిని రేపుతోంది. కేవలం ఒక స్టార్ కథగా కాకుండా, పురుషాధిక్య ఇండస్ట్రీలో ఒక మహిళ ఎదురొడ్డి నిలిచిన విజయగాథగా ఈ పుస్తకం పాఠకుల ముందుకు రాబోతోంది.
[FEATURED_IMAGE]
అరుదైన ఫోటోలు.. దిగ్గజాల వ్యాసాలు
ప్రముఖ రచయిత ధీరజ్ యు. కుమార్ రచించిన ఈ సమగ్ర జీవిత చరిత్రను వెస్ట్ల్యాండ్ బుక్స్ ప్రచురిస్తోంది. శ్రీదేవితో ధీరజ్కు ఉన్న వ్యక్తిగత పరిచయం, ఆమె భర్త బోనీ కపూర్ పూర్తి సహకారం ఈ పుస్తకానికి మరింత ప్రామాణికతను తెచ్చిపెట్టాయి. 150కు పైగా అరుదైన ఛాయాచిత్రాలు, అమితాబ్ బచ్చన్, జావేద్ అక్తర్ లాంటి దిగ్గజాల ప్రత్యేక వ్యాసాలు ఇందులో ప్రధాన ఆకర్షణగా నిలవనున్నాయి.
తెర వెనుక దాగిన నిజాలు
నాలుగేళ్ల పసిప్రాయంలోనే కెమెరా ముందుకు వచ్చిన ఈ అందాల తార.. హిందీ, తెలుగు, తమిళం, కన్నడ, మలయాళ భాషల్లో దాదాపు 300కు పైగా చిత్రాల్లో నటించారు. ఐదు దశాబ్దాల పాటు సాగిన ఆమె ప్రయాణంలో ఎదుర్కొన్న ఒడిదొడుకులు, కెరీర్ను మలుపు తిప్పిన నిర్ణయాలను ఈ పుస్తకం సూక్ష్మంగా విశ్లేషించనుంది. ముఖ్యంగా ఇప్పటివరకు బయట ప్రపంచానికి పెద్దగా తెలియని ఆమె వ్యక్తిగత జీవితం, మానసిక సంఘర్షణలను ఇందులో పారదర్శకంగా పొందుపరిచారు.
బయోపిక్కు పడిన పునాది!
2026 చివరి నాటికి పాన్ ఇండియా స్థాయిలో ఈ 'ఎంప్రెస్ - ది డెఫినిటివ్ బయోగ్రఫీ ఆఫ్ శ్రీదేవి' పుస్తకం మార్కెట్లోకి రానుంది. కమర్షియల్ హంగులు దాటి, నిజమైన శ్రీదేవిని పరిచయం చేసే ఈ పుస్తకం ఆధారంగానే భవిష్యత్తులో ఆమె బయోపిక్ తెరకెక్కనుందనే బలమైన ఊహాగానాలు ఇండస్ట్రీలో మొదలయ్యాయి.
'మహానటి' సావిత్రి జీవిత చరిత్ర తెరపైకి వచ్చిన తర్వాత ఆమెను చూసే కోణం ఎలా మారిందో మనం చూశాం. ఇప్పుడు శ్రీదేవి బయోగ్రఫీ కూడా అదే స్థాయి సంచలనం సృష్టించే అవకాశం ఉంది. ఈ పుస్తకం విడుదలైన వెంటనే, దీని హక్కులు దక్కించుకుని ఒక భారీ పాన్ ఇండియా బయోపిక్ తీయడానికి అగ్ర నిర్మాణ సంస్థలు క్యూ కట్టడం ఖాయం. ఒక సామాన్య ప్రేక్షకుడికి శ్రీదేవి అసలు జీవితాన్ని పరిచయం చేయడానికి ఈ బయోగ్రఫీ ఒక సరైన వారధిగా నిలుస్తుంది.
