[FEATURED_IMAGE]
వైజాగ్తో తనకు విడదీయరాని అనుబంధం ఉందని వరుణ్ గుర్తుచేసుకున్నారు. సత్యానంద్ మాస్టర్ వద్ద నటనలో ఓనమాలు నేర్చుకున్న ఈ నగరంలోనే, ఇప్పుడు తన కెరీర్ బెస్ట్ సక్సెస్ వేడుకలు జరుపుకోవడం ఎంతో ఆనందంగా ఉందన్నారు. గత కొన్నేళ్లుగా సరైన హిట్స్ లేకపోవడంతో తనలో మొదలైన ఆత్మసందేహాన్ని పారద్రోలి, వెన్నంటే ఉండి ధైర్యం చెప్పిన తన భార్య లావణ్యకు, నిరంతరం ప్రోత్సహించిన తల్లిదండ్రులకు ఆయన వేదికపై నుంచి ప్రత్యేక కృతజ్ఞతలు తెలిపారు.
ఒడిదొడుకులు ఎదురైనా పనిని నిజాయితీగా చేసుకుంటూ పోవాలన్నది తన పెదనాన్న, మెగాస్టార్ చిరంజీవి గారి నుంచి నేర్చుకున్నానని వరుణ్ గర్వంగా చెప్పారు. ఇక దర్శకుడు మేర్లపాక గాంధీతో హీరో-డైరెక్టర్లా కాకుండా ఇద్దరు మంచి స్నేహితుల్లా పనిచేశానని, ఆ బంధమే ఈ అవుట్పుట్కు కారణమని వివరించారు. తమ విజన్ను నమ్మి సపోర్ట్ చేసిన నిర్మాతలు యూవీ క్రియేషన్స్, ఫస్ట్ ఫ్రేమ్ ఎంటర్టైన్మెంట్స్ సంస్థలకు ఆయన ధన్యవాదాలు తెలిపారు.
సినిమా విజయం వెనుక టెక్నికల్ టీమ్ కృషి ఎంతో ఉందని, ముఖ్యంగా మ్యూజిక్ డైరెక్టర్ తమన్ ఈ ప్రాజెక్ట్కు అతిపెద్ద పిల్లర్ అని వరుణ్ ప్రశంసించారు. ఎడిటర్ సత్య, ఫైట్ మాస్టర్ సతీష్, కొరియోగ్రాఫర్లు, ఆర్ట్ డైరెక్టర్ల కష్టాన్ని ఆయన ప్రత్యేకంగా గుర్తించారు. కమెడియన్ సత్య అంకితభావం సినిమాకు ప్రధాన బలంగా నిలిచిందని చెబుతూనే, హీరోయిన్ రితిక నాయక్ టాలీవుడ్లో మరిన్ని ఉన్నత శిఖరాలు అధిరోహించాలని మనస్ఫూర్తిగా కోరుకున్నారు.
సక్సెస్ వచ్చినప్పుడు క్రెడిట్ మొత్తం తన ఖాతాలోనే వేసుకోకుండా, టెక్నీషియన్స్ నుంచి కమెడియన్ వరకు ప్రతి ఒక్కరినీ పేరుపేరునా అభినందించడం వరుణ్ తేజ్ హుందాతనానికి నిదర్శనం. 'కొరియన్ కనకరాజు 2'పై తొందరపడకుండా, సరైన స్క్రిప్ట్ కుదిరితేనే సీక్వెల్ చేస్తానని ఆయన ఇచ్చిన క్లారిటీ ఒక పర్ఫెక్ట్ డెసిషన్. ఫ్రాంచైజీల మోజులో పడి ఆగం కాకుండా, ఇలా కంటెంట్ మీదే దృష్టి పెడితే భవిష్యత్తులో వరుణ్ తన బాక్సాఫీస్ రికార్డులను తానే బ్రేక్ చేయడం ఖాయం.
