[FEATURED_IMAGE]
టాలీవుడ్లో మెగా ఫ్యామిలీకి ఉన్న క్రేజ్ గురించి ప్రత్యేకంగా చెప్పాల్సిన పనిలేదు. అయితే స్టార్ కిడ్గా ఇండస్ట్రీలోకి అడుగుపెట్టడం వెనుక ఉన్న కష్టాన్ని, బాధ్యతను తాజాగా వరుణ్ తేజ్ వివరించారు. ఒక చానెల్ కి ఇచ్చిన పాడ్కాస్ట్లో పాల్గొన్న ఆయన తన కెరీర్ ప్రారంభపు రోజుల్లోని అనుభవాలను కుండబద్దలు కొట్టారు.
తన మొదటి సినిమా ఇంకా సెట్స్పైకి వెళ్లకముందే అభిమానులు ఎంతో ప్రేమతో 'మెగా ప్రిన్స్' అనే బిరుదు ఇచ్చారని వరుణ్ గుర్తు చేసుకున్నారు. ఆ ప్రేమ ఎంత సంతోషాన్ని ఇచ్చిందో, అదే స్థాయిలో ఫ్యామిలీ పరువు నిలబెట్టాలనే ఒత్తిడిని కూడా పెంచిందన్నారు. ఇండస్ట్రీలో ఏ స్థాయి వ్యక్తికైనా ఎవరి స్పేస్ వారిది ఉంటుందని, మన బలం ఏంటో తెలుసుకుని అడుగులు వేయాలని ఆయన చెప్పుకొచ్చారు.
ఇంట్లో తమపై ఎప్పుడూ ప్రెజర్ తీసుకురాలేదని, కానీ కొన్ని ముఖ్యమైన విలువలని మాత్రం పెద్దలు నూరిపోశారని వరుణ్ వెల్లడించారు. నమ్మి అవకాశం ఇచ్చిన నిర్మాత రూపాయికి న్యాయం చేయాలని, సమయానికి షూటింగ్కు వెళ్లాలని తమ ఇంట్లో నేర్పించిన క్రమశిక్షణ గురించి వివరించారు. ఈ రోజుల్లో ఏ రంగంలో ఉన్నవారైనా టైమ్ మేనేజ్మెంట్, అంకితభావం పాటిస్తేనే పైకి ఎదుగుతారనే దానికి వరుణ్ మాటలే ఉదాహరణ.
తానెవరికీ ఫోన్ చేసి అవకాశాలు అడగలేదని, తనలో యాక్టింగ్ టాలెంట్ ఉందని నమ్మిన తర్వాతే సినిమా ఆఫర్లు వచ్చాయని ఆయన క్లారిటీ ఇచ్చారు. బ్యాక్గ్రౌండ్ ఉంటే ఒక అవకాశం రావచ్చేమో కానీ, టాలెంట్ లేకపోతే ఎంతటి స్టార్ డైరెక్టర్ అయినా మనల్ని ఎంపిక చేయరని స్పష్టం చేశారు. ప్రేక్షకుల ఫీడ్బ్యాక్, సీనియర్ల సలహాలతోనే తన నటనను మెరుగుపరుచుకున్నానని వరుణ్ వివరించారు.
నెపోటిజం గురించి చర్చలు జరుగుతున్న ఈ కాలంలో వరుణ్ తేజ్ చేసిన ఈ వ్యాఖ్యలు ఆలోచింపజేసేలా ఉన్నాయి. అవకాశం రావడం వరకే అదృష్టం.. ఆ తర్వాత కష్టపడే తత్వం ఉంటేనే మనుగడ సాధ్యం అనేది నూటికి నూరు శాతం నిజం. రాబోయే రోజుల్లో కూడా కేవలం కుటుంబ బలాన్ని నమ్ముకునే కంటే, తనలోని నటుడికి మరింత పదును పెట్టి కొత్త తరహా సినిమాలతో వరుణ్ బాక్సాఫీస్ వద్ద సందడి చేయడం ఖాయంగా కనిపిస్తోంది.
