108 కోట్లతో మొదలై 75 కోట్లకు.. రిటర్నబుల్ డీల్!
యశ్ క్రేజ్ దృష్టిలో పెట్టుకుని 'టాక్సిక్' తెలుగు రాష్ట్రాల థియేట్రికల్ రైట్స్ కోసం ముందుగా ఏకంగా రూ.108 కోట్లకు కమిట్మెంట్ జరిగినట్లు ట్రేడ్ వర్గాల్లో టాక్ వినిపించింది. అయితే మారుతున్న సమీకరణాల నేపథ్యంలో ఆ మొత్తాన్ని రూ.80 కోట్లకు సవరించారు. ఫైనల్ గా సినిమా రిలీజ్ నాటికి కొనుగోలుదారులు సుమారు రూ.75 కోట్లు చెల్లించినట్లు సమాచారం.
ఈ 75 కోట్లలో ఆంధ్రా ప్రాంతం నుంచి రూ.35 కోట్లు, సీడెడ్ నుంచి రూ.10 కోట్లు, తెలంగాణ (నైజాం) నుంచి మరో రూ.30 కోట్లు వచ్చినట్లు లెక్కలు చెబుతున్నాయి. ఈ డీల్ మొత్తాన్ని దిల్ రాజు 'రిటర్నబుల్ బేసిస్' మీద క్లోజ్ చేయడం ఇక్కడ గమనించాల్సిన విషయం.
యశ్ మెజారిటీ వాటా.. 45 రోజుల్లో రిఫండ్ గ్యారెంటీ!
ఈ ప్రాజెక్టులో నిర్మాణ సంస్థ కేవీఎన్ ప్రొడక్షన్స్ వాటా సగానికి కూడా తక్కువేనట. మిగిలిన మెజారిటీ వాటా మొత్తం హీరో యశ్ దేనని తెలుస్తోంది. ఈ నేపథ్యంలో డిస్ట్రిబ్యూటర్లకు భరోసా ఇవ్వడానికి యశ్ ఒక కీలక ఒప్పందంపై సంతకం చేశారట. సినిమా వసూళ్లలో ఏదైనా తేడా జరిగి నష్టాలు వస్తే.. కేవలం 45 రోజుల్లోనే ఆ లోటు మొత్తాన్ని తిరిగి చెల్లించేలా యశ్ అగ్రిమెంట్ చేసుకున్నట్లు తెలుస్తోంది. ఈ ఒక్క హామీతోనే దిల్ రాజు మరియు ఇతర కొనుగోలుదారులు ఎంతో ధైర్యంగా ఈ బిజినెస్లోకి అడుగుపెట్టారు.
భవిష్యత్తుకు భరోసా: యశ్ నెక్స్ట్ మూవీ, చిరు 'కాకా' రైట్స్
టాక్సిక్ సినిమాతో ఒకవేళ ఆర్థికంగా లోటు ఏర్పడితే, ఆ రిఫండ్ మొత్తాన్ని భవిష్యత్తులో దిల్ రాజు బ్యానర్ లో యశ్ చేయబోయే కొత్త సినిమాకు అడ్వాన్స్గా పరిగణించేలా మరో పక్కా ప్లాన్ రెడీ చేసుకున్నారట. అంటే యశ్, దిల్ రాజు కాంబినేషన్ లో మూవీ దాదాపు కన్ఫర్మ్ అయినట్లే. దీనికి తోడు, కేవీఎన్ సంస్థ నుంచి దిల్ రాజుకు మరో బంపర్ ఆఫర్ దక్కినట్లు ఇండస్ట్రీ టాక్. మెగాస్టార్ చిరంజీవి హీరోగా నటిస్తూ సంక్రాంతికి రాబోతున్న 'కాకా' సినిమా నైజాం హక్కులను దిల్ రాజుకు ఇచ్చేలా కేవీఎన్ సంస్థ సూత్రప్రాయంగా హామీ ఇచ్చిందట.
టాక్సిక్ సినిమా ఆడితే దిల్ రాజుకు లాభాల వర్షం కురుస్తుంది. ఒకవేళ ఆశించిన స్థాయిలో ఆడకపోయినా.. నష్టాల రికవరీకి గ్యారెంటీ, ప్యాన్ ఇండియా స్టార్ యశ్ తో భవిష్యత్తులో సినిమా, అలాగే చిరంజీవి 'కాకా' సినిమా రైట్స్ దక్కుతాయి. ఒక సినిమా పంపిణీ ద్వారా ఇన్ని విధాలుగా సేఫ్ గేమ్ ఆడుతూ భవిష్యత్తు ప్రాజెక్టులను లాక్ చేసుకోవడం దిల్ రాజు బిజినెస్ బ్రెయిన్ కు నిదర్శనం. సోషల్ మీడియాలో ఎవరు ఎన్ని చెప్పినా, ఈ గేమ్ లో అసలైన బిగ్ బెనిఫిషియరీ మాత్రం దిల్ రాజే అని ట్రేడ్ పండితులు స్పష్టం చేస్తున్నారు.
