పహల్గామ్ ఉగ్రదాడి తర్వాత, దేశంలో ఉగ్రవాదులను ఏరిపారేసేందుకు భద్రతా దళాలు 'ఆపరేషన్ సింధూర్'ను ముమ్మరం చేశాయి. ఈ నేపథ్యంలో, తెలుగు రాష్ట్రాల్లో కూడా టెర్రరిస్టుల స్లీపర్ సెల్స్‌పై పోలీసులు దృష్టి సారించారు. 'ఆపరేషన్ స్లీపర్ సెల్' పేరుతో ఉగ్రవాద మూకల వేట షురూ అయింది.
విశ్వనగరం హైదరాబాద్‌లో ఉగ్రవాద జాడలు కలకలం రేపుతున్నాయి. మన పక్కనే, మనతోనే నివసిస్తున్న ఓ యువకుడు బాంబు పేలుళ్లకు కుట్ర పన్నినట్లు తెలియగానే బోయగూడ బస్తీవాసులు తీవ్ర ఆందోళనకు గురయ్యారు. విజయనగరంలో బాంబు పేలుళ్లకు రిహార్సల్స్ కోసం సరంజామా సిద్ధం చేసిన సిరాజ్, బోయగూడకు చెందిన సయ్యద్ సమీర్‌లను పోలీసులు అదుపులోకి తీసుకున్నారు. ప్రస్తుతం ఈ కేసును NIA డీల్ చేస్తోంది.
ఆరంభంలోనే ఉగ్ర కుట్ర విచ్ఛిన్నం, స్లీపర్ సెల్స్‌పై పోలీసుల నిఘా
తెలంగాణ డీజీపీ జితేందర్ తాజాగా చేసిన ప్రకటన హైదరాబాద్‌లో భారీ సంఖ్యలో ఉగ్రవాద స్లీపర్ సెల్స్ ఉన్నాయా అన్న అనుమానాలకు తావిస్తోంది. హైదరాబాద్‌లో స్లీపర్ సెల్స్‌ను గుర్తిస్తున్నామని, వారికి కౌన్సిలింగ్ నిర్వహిస్తామని డీజీపీ తెలిపారు. నగరంలో ఇంటెలిజెన్స్ ఏజెన్సీలు పూర్తి అప్రమత్తంగా ఉన్నాయని, నిఘా వర్గాల హెచ్చరికలతో స్లీపర్ సెల్స్ కదలికలపై ఆరా తీస్తున్నామని ఆయన చెప్పారు. స్లీపర్ సెల్స్ జాడ పసిగట్టి, వారి ఆట కట్టించేందుకు ప్రత్యేక యూనిట్లను ఏర్పాటు చేస్తామని డీజీపీ ప్రకటించారు. ఉగ్రవాదుల కదలికలను ముందుగానే గమనించి అనేక మంది నిందితులను అరెస్టు చేశామని ఆయన తెలిపారు. సమీర్, సిరాజ్‌లు ఉగ్రకుట్రకు ఒక గ్రూప్‌ ఏర్పాటు చేసే ప్రయత్నం చేశారని, ఆరంభ దశలోనే ఆ గ్రూపును కనిపెట్టి విచ్ఛిన్నం చేశామని డీజీపీ జితేందర్ వివరించారు.
టెర్రర్ స్లీపర్ సెల్స్
టెర్రర్ స్లీపర్ సెల్స్ అంటే, ప్రజల మధ్య గుట్టుచప్పుడు కాకుండా పనిచేసే ఉగ్రవాదుల గ్రూపులు లేదా ఉగ్రవాద సానుభూతిపరులు. వీళ్లు చాప కింద నీరులా పనిచేస్తారు. టెర్రర్ గ్రూపు కమాండర్లు ఆదేశించిన వెంటనే, ఈ స్లీపర్ సెల్స్ యాక్టివేట్ అవుతాయి. వీళ్లు గోప్యంగా పనిచేస్తూ, నిఘా వ్యవస్థల కంట పడకుండా ఉండటానికి ప్రయత్నిస్తారు. స్లీపర్ సెల్స్‌పై నిఘా ఉంచడం ద్వారా, హైదరాబాద్ నగరాన్ని సురక్షితంగా ఉంచేందుకు పోలీసులు నిరంతరం కృషి చేస్తున్నారు. అనుమానాస్పద వ్యక్తులపై నిఘా పెంచుతున్నారు. నగరంలో టెర్రరిస్టు స్లీపర్ సెల్స్ పడగ విప్పేందుకు ప్రయత్నిస్తే... వారి ఆట కట్టించేందుకు, ముందుగానే వారి ఖేల్ ఖతమ్ చేసేందుకు పోలీసు యాక్షన్ మొదలైంది.
