‘వైరాగ్యం’ అనే పదం జీవితాన్ని తప్పుగా అర్థం చేసుకున్న వారి నుండి పుట్టింది. దురదృష్టవశాత్తు, వీరి అభిప్రాయాల కారణంగానే చాలామందికి ఆధ్యాత్మికత పట్ల ఒక విధమైన అయిష్టత ఏర్పడింది. అసలు, ఆధ్యాత్మికత అంటే ఏమిటి? ‘ఆధ్యాత్మికత’ అంటే ‘జీవితం పట్ల ఎటువంటి ఆసక్తి లేని వారికి మాత్రమే’ అన్నది నేడు చాలామందిలో ఉన్న తప్పుడు భావన.
ఆధ్యాత్మికతకు అసలైన అర్థం
నిజానికి, ఆధ్యాత్మికత అంటే ఈ సృష్టిలోని ప్రతి కోణాన్ని తెలుసుకోవాలని మీరు కోరుకుంటున్నారని అర్థం. మీ ఆసక్తి కేవలం భౌతిక జీవితానికే పరిమితం కాదని, జీవితంలోని అన్ని పార్శ్వాల గురించీ తెలుసుకోవాలనే తపన అని దీని భావం.
అయితే, కొందరు దీన్ని వేరే రకంగా అర్థం చేసుకుంటారు. వారి అభిప్రాయం ప్రకారం, ఒక వ్యక్తి ఆధ్యాత్మిక మార్గంలో ఉండాలంటే ‘సరిగ్గా తినకూడదు, సరిగ్గా బట్టలు కట్టుకోకూడదు, సరిగ్గా జీవించకూడదు, అణగిపోయి ఉండాలి లేదా కనీసం అలా కనిపించాలి’ అని. మీరు ఆనందంగా, సంతోషంగా ఉంటే, జీవితాన్ని ఆస్వాదిస్తుంటే, మీరు ఆధ్యాత్మికవాదులు కారని వారు భావిస్తారు. ఎప్పుడూ చిరునవ్వు ఎరుగని మేకపోతు గాంభీర్యంతో ఉంటేనే మీరు ఆధ్యాత్మిక వ్యక్తులని వారి ఆలోచన. ఇదంతా వైరాగ్య సిద్ధాంతాల నుండి వచ్చిన ఆలోచనల పర్యవసానం.
మనుషులు ఈ భూమిపైకి వచ్చింది జీవించడానికి, తప్పించుకోవడానికి కాదు. ‘ఆధ్యాత్మికత’ అంటే, ‘మీరు జీవితంలోని పైపై మెరుగులతో సరిపెట్టుకునేవారు కాదని, జీవిత మూలాల్లోకి వెళ్లి తెలుసుకోవాలనే నిజమైన ఆసక్తి ఉన్నవారని’ సరికొత్తగా అర్థం చేసుకోవాలి. వైరాగ్యంతో మీరు జీవితాన్ని తెలుసుకోలేరు. పూర్తి ఆసక్తి చూపితేనే జీవిత సారాన్ని అనుభవంలోకి తెచ్చుకోగలరు. జీవితంపై మీ ఆసక్తి ప్రస్తుతం ఉన్నదానికంటే చాలా ఎక్కువ కావాలి. అప్పుడే అసలైన ఆధ్యాత్మికతకు మార్గం సుగమం అవుతుంది. అంతేకానీ, జీవితాన్ని తప్పించుకుందామనుకుంటే మాత్రం మీరు తప్పు దారిలో ఉన్నట్లే లెక్క.
రవీంద్రనాథ్ ఠాగూర్ దృక్పథం
కవి, తత్వవేత్త రవీంద్రనాథ్ ఠాగూర్కు ప్రకృతి అన్నా, జీవితం అన్నా చాలా ఇష్టం. ఆయన ముసలితనంతో మంచం పట్టినప్పుడు, కొందరు స్నేహితులు ఆయన చుట్టూ చేరి, ‘అవసాన కాలం సమీపించింది కాబట్టి, భగవన్నామ స్మరణ చేసి ముక్తి కావాలని కోరుకోండి’ అన్నారు. అప్పుడు ఆయన ఇలా అన్నారు: “ముక్తిని నేనేం చేసుకోను. నాకు మళ్లీ మళ్లీ ఇక్కడకు రావాలని ఉంది. మీరే చూడండి, ఈ ప్రపంచమెంత అద్భుతంగా ఉందో. ఈ ప్రకృతి ఎంత దయకలదో చూడండి, నిజంగానే భగవంతుడుంటే ఈ ప్రకృతితో ఉండటానికి నన్ను మళ్లీ మళ్లీ ఇక్కడకే పంపమని అడుగుతాను.” అంతలా జీవితంతో మమేకమైన వారికే జీవిత పరమార్థం తెలుస్తుంది, మిగతా వారికి కాదు.
న్యూటన్ అనుభవం
ప్రఖ్యాత శాస్త్రవేత్త ఐజాక్ న్యూటన్కు కూడా ఇలానే జరిగింది. మృత్యువు సమీపించినప్పుడు ఆయన- “నాకు ఈ సైన్స్ అంటే ఏమీ తెలియదు. నేను సముద్రపు ఒడ్డున గవ్వలు ఏరుకోవటంతోనే నా జీవితాన్ని వ్యర్థం చేశాను. అసలైన సముద్రాన్ని ఇంకా అన్వేషించనే లేదు. నాకు సముద్రాన్ని అన్వేషించే అవకాశం మళ్లీ వస్తే బాగుండు...” అన్నాడు. ఇలాంటివారంతా జీవితాన్ని బాగా ఆస్వాదించినవారు. అంతేకానీ, జీవితంపై నిరాసక్తతతో ఉన్నవారు కాదు. కనుక, నిజమైన ఆధ్యాత్మికతలోకి వెళ్లాలంటే, ముందు లభించిన ఈ జీవితాన్ని సంపూర్ణంగా ఆస్వాదించండి, అప్పుడు ‘సత్యాన్వేషణ’ తేలికవుతుంది!
