ఉసిరి సీజన్ వచ్చేసింది! చలికాలం ప్రారంభం కావడంతోనే, మార్కెట్‌లో ఈ 'ఆరోగ్యసిరి' విరివిగా కనిపిస్తోంది. ఉసిరికాయను ఆరోగ్యానికి వరం అని పిలవడానికి కారణం.. అందులో ఉన్న అపారమైన ప్రయోజనాలే.
ముఖ్యంగా చర్మం, జుట్టు సమస్యలకు ఉసిరి ఒక తిరుగులేని రామబాణంగా పనిచేస్తుందని ఆయుర్వేద నిపుణులు చెబుతున్నారు.
జుట్టు కుదుళ్లకు సంపూర్ణ బలం
ఉసిరికాయలో విటమిన్ సి సమృద్ధిగా ఉంటుంది. ఇది జుట్టు కుదుళ్లను లోపలి నుంచి బలోపేతం చేస్తుంది. తద్వారా జుట్టు రాలడాన్ని తగ్గించి, కొత్త జుట్టు పెరుగుదలను ప్రోత్సహిస్తుంది.
ఉసిరిలోని యాంటీ ఆక్సిడెంట్లు తలకు రక్త ప్రసరణను మెరుగుపరుస్తాయి. ఇది జుట్టు పెరుగుదల ఆరోగ్యంగా ఉండటానికి సహాయపడుతుంది.
చుండ్రు, తెల్ల జుట్టుకు చెక్
ఉసిరిలో యాంటీ ఫంగల్, యాంటీ బాక్టీరియల్ లక్షణాలు పుష్కలంగా ఉన్నాయి. ఇవి చుండ్రు సమస్యను సమర్థవంతంగా నివారిస్తాయి.
అంతేకాదు, ఉసిరికాయ జుట్టుకు సహజమైన కండీషనర్‌గా పనిచేస్తుంది. జుట్టును మృదువుగా, మెరిసేలా చేస్తుంది. జుట్టు సహజ రంగును కాపాడుతూ, తెల్ల జుట్టును నివారిస్తుంది.
ఒత్తుగా పెరగాలంటే.. ఈ నూనె వాడండి!
జుట్టు ఒత్తుగా, పొడవుగా పెరగాలంటే ఈ చిట్కా పాటించండి. ఉసిరికాయలను ఎండలో బాగా ఆరబెట్టి, మెత్తగా పొడి చేసుకోవాలి. ఈ పొడిని కొబ్బరి నూనెలో కలిపి, ఆ నూనెను వాడాలి.
ముఖ్యంగా జుట్టు పల్చగా ఉన్నవారు, రాలిపోతున్న వారు ఈ నూనెను రోజూ రాత్రిపూట తలకు బాగా పట్టించి, ఉదయం తలస్నానం చేయాలి.
నేరుగా తిన్నా ఎంతో మేలు
కేవలం నూనె రాయడమే కాదు, ఉసిరికాయలను నేరుగా తినడం వల్ల కూడా జుట్టు రాలడం, తెల్ల జుట్టు సమస్యలు అదుపులోకి వస్తాయి. ఇది మొత్తం ఆరోగ్యాన్ని కూడా మెరుగుపరుస్తుంది.
క్రమం తప్పకుండా ఈ చిట్కాలు పాటిస్తే, కొద్ది రోజుల్లోనే మీ జుట్టు పొడవుగా, దట్టంగా పెరుగుతుంది. జుట్టు రాలిపోవడం, చివర్లు చిట్లిపోవడం వంటి సమస్యలు కూడా దూరమవుతాయి.
