బీహార్ 'రివెంజ్ మ్యారేజ్': ప్రియుడి భార్యనే పెళ్లాడిన భర్త!

 తన భార్య ఎవరితో అయితే వెళ్లిపోయిందో.. సరిగ్గా ఆ వ్యక్తి భార్యనే ఇతను పెళ్లి చేసుకున్నాడు! ఈ వింత 'ప్రతీకారపు పెళ్లి' కథ ఇప్పుడు దేశవ్యాప్తంగా సంచలనం రేపుతోంది.

వివాహ వ్యవస్థ, నమ్మకం, నైతికతలపై ప్రశ్నలు రేకెత్తిస్తున్న ఈ వింత సంఘటన బీహార్‌లోని ఖగారియా జిల్లాలో చోటుచేసుకుంది. ఈ మొత్తం వ్యవహారం సోషల్ మీడియాలో 'రివేంజ్ మ్యారేజ్' (ప్రతీకారపు పెళ్లి) పేరుతో వైరల్ అవుతోంది.

భార్యల పేర్లు కూడా ఒకటే.. అసలు కథ ఇదే!

ఖగారియా జిల్లాలోని హార్డియా గ్రామానికి చెందిన నీరజ్ కుమార్ సింగ్ (35) కు, పస్రాహా గ్రామానికి చెందిన రూబీ దేవి అనే మహిళకు 2009లో వివాహమైంది. వీరికి నలుగురు పిల్లలు.

ఇదే క్రమంలో, రూబీ దేవి తన పుట్టింటి గ్రామమైన మైకేల్‌కు చెందిన ముఖేష్ కుమార్ సింగ్‌తో వివాహేతర సంబంధం పెట్టుకుంది. విచిత్రం ఏమిటంటే, ముఖేష్‌కు కూడా అప్పటికే వివాహమై, ఇద్దరు పిల్లలు ఉన్నారు. అతని భార్య పేరు కూడా రూబీ దేవి కావడం ఈ కథలో అసలు ట్విస్ట్!

ప్రియుడితో భార్య పరార్..

వివాహేతర బంధం విషయం తెలుసుకున్న నీరజ్, తన భార్య రూబీ దేవి(1)ని ఎంత హెచ్చరించినా ఫలితం లేకపోయింది. చివరికి 2022 ఫిబ్రవరి 6న, నీరజ్ భార్య రూబీ దేవి.. తన ముగ్గురు పిల్లలతో (ఒక కుమార్తెను నీరజ్ వద్ద వదిలేసి) ప్రియుడు ముఖేష్‌తో కలిసి ఇంటి నుంచి పారిపోయింది.

భార్య కనిపించకపోవడంతో షాక్‌కు గురైన నీరజ్, ఆమెను ముఖేష్ కిడ్నాప్ చేశాడంటూ పోలీసులకు ఫిర్యాదు చేశాడు. ముఖేష్, రూబీ దేవి(1) వేరే ప్రాంతానికి వెళ్లి సహజీవనం చేయడం ప్రారంభించారు.

ఒకే బాధ.. కొత్త బంధం!

ఒకవైపు నలుగురు పిల్లలతో ఒంటరిగా మిగిలిపోయిన నీరజ్.. మరోవైపు భర్త పారిపోవడంతో ఇద్దరు పిల్లలతో ఒంటరిగా మిగిలిపోయిన ముఖేష్ భార్య రూబీ దేవి(2).. ఇద్దరి బాధా ఒకటే అయ్యింది.

తన భార్యతో పారిపోయిన ముఖేష్ భార్య పేరు కూడా రూబీ దేవి అని తెలుసుకున్న నీరజ్, ఎలాగోలా ఆమె ఫోన్ నంబర్ సంపాదించాడు. ఇద్దరూ తమ జీవితాల్లో జరిగిన అన్యాయం గురించి మాట్లాడుకోవడం మొదలుపెట్టారు.

"మనం ఒక్కటవుదాం".. ప్రతీకారపు పెళ్లి!

పరస్పర సహకారం కోసం మొదలైన సంభాషణ క్రమంగా ప్రేమగా మారింది. "మన జీవిత భాగస్వాములు మోసం చేసి వెళ్లిపోయారు. మనం ఒక్కటై మన పిల్లలకు తల్లిదండ్రుల ప్రేమను ఇద్దాం" అని నీరజ్ చేసిన ప్రతిపాదనకు, ముఖేష్ భార్య రూబీ దేవి(2) అంగీకరించింది.

నీరజ్, రూబీ దేవి(2)లు 2023 ఫిబ్రవరి 18న స్థానిక ఆలయంలో వివాహం చేసుకున్నారు. ఈ పెళ్లికి వధువు కుటుంబ సభ్యుల అంగీకారం కూడా ఉంది. తన భార్య ఎవరితో పారిపోయిందో, ఆ వ్యక్తి భార్యనే పెళ్లి చేసుకుని నీరజ్ ప్రతీకారం తీర్చుకున్నాడని స్థానికులు చర్చించుకుంటున్నారు.

ఇది రివెంజా? అడ్జస్ట్‌మెంటా?

ఈ అనూహ్యమైన కథాంశం బాలీవుడ్ చిత్రం 'అజ్ఞాతీ' ని పోలి ఉందని ఇంటర్నెట్‌లో చర్చ జరుగుతోంది. "ఇది రివేంజ్ కాదు, జీవితాలను అడ్జస్ట్ చేసుకోవడం" అని కొందరు వ్యాఖ్యానిస్తుండగా, "సమాజం ఎటు పోతోందో" అని మరికొందరు ఆందోళన చెందుతున్నారు.