ఆన్‌లైన్ వ్యాపారులకు ఫ్లిప్‌కార్ట్ బంపర్ గిఫ్ట్!

 ఆన్‌లైన్ వ్యాపారులకు ఇది బంపర్ ఆఫర్! ఫ్లిప్‌కార్ట్ తీసుకున్న ఆ ఒక్క నిర్ణయంతో.. ఇక వారి లాభాలు ఆకాశాన్నంటడమే!

ప్రముఖ ఈ-కామర్స్ దిగ్గజం ఫ్లిప్‌కార్ట్, తమ ప్లాట్‌ఫామ్‌లోని విక్రయదారులకు (Sellers) భారీ ఊరట కల్పిస్తూ కీలక నిర్ణయం తీసుకుంది. రూ.1,000 కంటే తక్కువ ధర కలిగిన అన్ని ఉత్పత్తులపై 'జీరో కమిషన్' విధానాన్ని అమలు చేస్తున్నట్లు సంచలన ప్రకటన చేసింది.

'జీరో కమిషన్'.. షాప్సీలో మొత్తం ఫ్రీ!

ఈ కొత్త విధానం ఫ్లిప్‌కార్ట్‌కే కాకుండా, దాని అనుబంధ సంస్థ అయిన 'షాప్సీ' (Shopsy)కి కూడా వర్తిస్తుందని కంపెనీ తేల్చి చెప్పింది. షాప్సీ ప్లాట్‌ఫామ్‌లో అయితే, ధరతో సంబంధం లేకుండా ఏ ఉత్పత్తిపైనా ఎటువంటి కమిషన్ ఉండదని స్పష్టం చేసింది.

30% తగ్గుతున్న ఖర్చులు.. ధరలు కూడా!

ఈ అనూహ్యమైన మార్పుల వల్ల విక్రయదారుల వ్యాపార నిర్వహణ ఖర్చులు (Operating Costs) సుమారు 30 శాతం వరకు తగ్గుతాయని ఫ్లిప్‌కార్ట్ అంచనా వేస్తోంది. కమీషన్ భారం పూర్తిగా తొలగిపోవడంతో, ఆ ప్రయోజనాన్ని విక్రయదారులు వినియోగదారులకు బదిలీ చేస్తారని, తద్వారా వస్తువుల ధరలు మరింత సరసమైనవిగా మారుతాయని కంపెనీ భావిస్తోంది.

MSMEల ప్రోత్సాహమే లక్ష్యం

దేశీయ సూక్ష్మ, చిన్న, మధ్య తరహా పరిశ్రమలను (MSME) ప్రోత్సహించే లక్ష్యంతోనే ఈ నిర్ణయం తీసుకున్నట్లు ఫ్లిప్‌కార్ట్ తెలిపింది. ప్రస్తుతం దేశ జీడీపీలో ఈ రంగం వాటా దాదాపు 30 శాతంగా ఉందని కంపెనీ గుర్తు చేసింది.

ఫ్లిప్‌కార్ట్ సీనియర్ వైస్ ప్రెసిడెంట్ సాకేత్ చౌదరి మాట్లాడుతూ, "ఈ కొత్త విధానం స్థానికంగా అభివృద్ధి చెందుతున్న బ్రాండ్లు డిజిటల్ ఆర్థిక వ్యవస్థలోకి మరింత ఆత్మవిశ్వాసంతో అడుగుపెట్టేందుకు దోహదపడుతుంది. అదే సమయంలో వినియోగదారులకు కూడా తక్కువ ధరలకే ఉత్పత్తులు అందుబాటులోకి వస్తాయి" అని వివరించారు.

ఫ్లిప్‌కార్ట్ తీసుకున్న ఈ నిర్ణయంతో వేలాది మంది చిన్న వ్యాపారులపై ఆర్థిక భారం గణనీయంగా తగ్గనుంది. ఇది ఆన్‌లైన్ వ్యాపారంలోకి కొత్తగా అడుగుపెట్టాలనుకునే వారికి గొప్ప ప్రోత్సాహంగా నిలుస్తుంది.