"ఆ రోజు నాన్న టైమ్కు వచ్చి ఉంటే.. ఈరోజు నేను హీరోయిన్ అయ్యేదాన్ని కాదు!" ఉప్పెన బ్యూటీ కృతి శెట్టి సినిమా ఎంట్రీ వెనుక ఉన్న ఆ విచిత్రమైన స్టోరీ ఏంటో తెలుసా?
సినీ పరిశ్రమలో కొందరు పక్కా ప్లాన్తో వస్తారు, కానీ కృతి శెట్టికి మాత్రం అదృష్టం తలుపు తట్టింది. ఇటీవల 'వా వాద్దియార్' సినిమా ప్రమోషన్స్లో పాల్గొన్న ఈ భామ, తన హీరోయిన్ జర్నీ ఎలా మొదలైందో ఆసక్తికరంగా వివరించింది. ముంబైలో పుట్టి, బెంగళూరులో పెరిగిన కృతి, చిన్నప్పటి నుంచి వాణిజ్య ప్రకటనల్లో నటించేది.
నాన్న ఆలస్యం.. అదే నా అదృష్టం!
అసలు విషయం ఏంటంటే.. కృతి ఒక కమర్షియల్ యాడ్ ఆడిషన్ కోసం వెళ్ళిందట. ఆ పని అయ్యాక వాళ్ళ నాన్న కోసం వెయిట్ చేస్తోంది. అయితే, ఆ రోజు ఆయన రావడం కాస్త ఆలస్యమైంది. టైమ్ పాస్ కోసం ఎదురుగా కనిపిస్తున్న స్టూడియోలోకి వెళ్లగా, అక్కడ సినిమా ఆడిషన్స్ జరుగుతున్నాయి.
ఆమెను చూడగానే ఆ టీమ్ పిలిచి, సినిమాలో నటిస్తారా అని అడిగారట. ఏం చెప్పాలో తెలియక కృతి తన తల్లి ఫోన్ నంబర్ ఇచ్చి వచ్చేసింది. కొద్ది రోజులకే దర్శకుడు బుచ్చిబాబు సానా కాల్ చేయడంతో, కేవలం 17 ఏళ్ల వయసులోనే 'ఉప్పెన'తో బేబమ్మగా ఎంట్రీ ఇచ్చింది.
టాలీవుడ్ టు కోలీవుడ్.. వరుస సినిమాలు
మొదటి సినిమాతోనే ఓవర్ నైట్ స్టార్ అయిన కృతి.. ఆ తర్వాత శ్యామ్ సింగరాయ్, బంగార్రాజు వంటి హిట్స్ కొట్టినా, మధ్యలో కొన్ని ప్లాప్స్ పలకరించాయి. దీంతో ఇప్పుడు రూట్ మార్చి తమిళ, మలయాళ ఇండస్ట్రీలపై ఫోకస్ పెట్టింది.
ప్రస్తుతం కృతి చేతిలో ఉన్న క్రేజీ ప్రాజెక్టులు ఇవే:
కార్తీతో కలిసి నటిస్తున్న 'వా వాద్దియార్'.
జయం రవితో భారీ బడ్జెట్ చిత్రం 'జీనీ'.
ప్రదీప్ రంగనాథన్ సరసన 'లవ్ ఇన్సూరెన్స్ కంపెనీ'.
ఈ సినిమాలు తన కెరీర్ను మళ్లీ గాడిలో పెడతాయని కృతి నమ్మకంగా ఉంది. భవిష్యత్తులో మంచి కథలు ఎంచుకుంటూ ముందుకెళ్తానని, కార్తీ వంటి స్టార్లతో నటించడం సంతోషంగా ఉందని ఆమె వెల్లడించింది.
