పవన్ కళ్యాణ్ సినిమా కూడా కాపాడలేకపోయింది.. ఇప్పుడు ఈ హీరోయిన్ ఆశలన్నీ ప్రభాస్ మీదే! ఒక్క హిట్టు కొడితే కెరీర్ మారుతుంది, లేదంటే అంతే సంగతులు.
'మున్నా మైఖేల్'తో బాలీవుడ్లో అదృష్టం పరీక్షించుకున్న నిధి అగర్వాల్ (Nidhi Agerwal), అక్కడ వర్కౌట్ కాక టాలీవుడ్ బాట పట్టింది. 'సవ్యసాచి', 'మిస్టర్ మజ్ను' వంటి సినిమాలు చేసినా, ఈ అమ్మడికి సరైన బ్రేక్ రాలేదు. అందం, అభినయం, డ్యాన్స్ అన్నీ ఉన్నా.. అదృష్టం మాత్రం దోబూచులాడుతూనే ఉంది.
ఇస్మార్ట్ హిట్టు.. కానీ క్రెడిట్ రాలేదు!
రామ్ పోతినేనితో చేసిన 'ఇస్మార్ట్ శంకర్' కమర్షియల్గా భారీ హిట్ కొట్టినా, అందులో క్రెడిట్, పెర్ఫార్మెన్స్ స్కోప్ మొత్తం నభా నటేష్ ఖాతాలో పడింది. దీంతో నిధి ఖాతాలో చెప్పుకోవడానికి ఒక్క సోలో హిట్ కూడా లేకుండా పోయింది. ఆ తర్వాత తమిళంలో చేసిన 'ఈశ్వరన్', 'భూమి' సినిమాలు కూడా బాక్సాఫీస్ వద్ద ఆశించిన ఫలితాన్ని ఇవ్వలేదు.
పవన్ సినిమా నిరాశ..
పవన్ కళ్యాణ్ సరసన పాన్ ఇండియా ప్రాజెక్ట్ 'హరి హర వీరమల్లు'పై నిధి కొండంత ఆశలు పెట్టుకుంది. కానీ షూటింగ్ ఆలస్యం, వాయిదాలు, కంటెంట్ ప్రేక్షకులకు కనెక్ట్ కాకపోవడంతో ఆ సినిమా బాక్సాఫీస్ ముందు నిలబడలేకపోయింది. దీంతో ఆశించిన స్టార్డమ్ ఆమెకు దక్కలేదు.
ప్రభాసే దిక్కు.. తేడా కొడితే కెరీర్ ఖతం?
ప్రస్తుతం నిధి భవిష్యత్తు మొత్తం ప్రభాస్ చేతిలోనే ఉంది. మారుతి దర్శకత్వంలో వస్తున్న 'ది రాజాసాబ్' (The Raja Saab) మీదే ఆమె ఆశలన్నీ ఉన్నాయి. ఇందులో కూడా ముగ్గురు హీరోయిన్లు ఉండటం గమనార్హం. ఈ సినిమాలో నిధి పాత్ర క్లిక్ అయ్యి, సినిమా హిట్టయితే టాలీవుడ్లో ఆమె కెరీర్ మళ్లీ ఊపందుకుంటుంది. లేదంటే మాత్రం, ఈ అమ్మడి కెరీర్కు ఇక్కడితో ఫుల్ స్టాప్ పడినట్లేనని సినీ విశ్లేషకులు అంటున్నారు.

