తెలుగు రాష్ట్రాల్లో వాతావరణం ఒక్కసారిగా మారిపోయింది, నెల్లూరు, చిత్తూరు జిల్లాలకు ఆకస్మిక వరద ముప్పు పొంచి ఉంది. వర్షాలు తగ్గాక తెలంగాణను మరో కొత్త గండం భయపెట్టబోతోందని వాతావరణ శాఖ హెచ్చరించింది.
అల్పపీడన ప్రభావంతో ఆంధ్రప్రదేశ్, తెలంగాణ రాష్ట్రాల్లో వాతావరణం చల్లబడింది. అయితే, ఏపీలోని నెల్లూరు, చిత్తూరు జిల్లాలకు మాత్రం వాతావరణ శాఖ 'ఫ్లాష్ ఫ్లడ్' (ఆకస్మిక వరదలు) హెచ్చరికలు జారీ చేసింది. ఎగువన కురుస్తున్న వర్షాలకు నదులు, వాగులు ఏ క్షణమైనా ఉప్పొంగే ప్రమాదం ఉండటంతో లోతట్టు ప్రాంతాల ప్రజలు అప్రమత్తంగా ఉండాలని అధికారులు రెడ్ అలర్ట్ ప్రకటించారు.
గూడూరు జలదిగ్బంధం.. స్తంభించిన రాకపోకలు!
నెల్లూరు జిల్లాలో వర్ష బీభత్సం కొనసాగుతోంది. గూడూరులో భారీ వర్షాల ధాటికి నాలుగు కాలనీల్లోకి వరద నీరు చేరింది. చిల్లకూరు జాతీయ రహదారిపై వరద ప్రవాహం కారణంగా వాహనాల రాకపోకలకు తీవ్ర అంతరాయం ఏర్పడింది. గూడూరు, విందూరు గ్రామాల మధ్య రాకపోకలు పూర్తిగా నిలిచిపోయాయి. పంబలేరు, ఉప్పుటేరు వాగులు ఉగ్రరూపం దాల్చడంతో, వాకాడు బ్యారేజీ 8 గేట్లు ఎత్తివేసి నీటిని కిందకు విడుదల చేస్తున్నారు.
తెలంగాణకు డబుల్ ట్రబుల్: వర్షం తర్వాత చలిపులి!
ఇటు తెలంగాణలోనూ హైదరాబాద్తో సహా పలు జిల్లాల్లో మోస్తరు నుంచి భారీ వర్షాలు కురిసే అవకాశం ఉంది. అయితే, వర్షం తగ్గుముఖం పట్టగానే రాష్ట్రంపై చలి పంజా విసరనుంది.
వాతావరణ శాఖ కీలక హెచ్చరికలు ఇవే:
వర్ష సూచన: రైతులు తమ పంటలు తడిసిపోకుండా టార్పాలిన్లతో కప్పి ఉంచాలి.
చలి తీవ్రత: ఈ నెల 9వ తేదీ తర్వాత రాష్ట్రవ్యాప్తంగా ఉష్ణోగ్రతలు గణనీయంగా పడిపోతాయి.
ఆరోగ్య జాగ్రత్తలు: రాబోయే చలిగాలుల దృష్ట్యా శ్వాసకోశ సమస్యలు ఉన్నవారు, వృద్ధులు, చిన్నపిల్లలు అత్యంత అప్రమత్తంగా ఉండాలి.
ప్రస్తుతానికి అత్యవసరమైతే తప్ప ప్రజలు బయటకు రావొద్దని, విద్యుత్ సరఫరాలో అంతరాయాలు ఉండవచ్చని అధికారులు సూచించారు.
