అప్పుల కోసం ఏకంగా దేశ విమానయాన సంస్థనే అమ్మేస్తోంది పాకిస్తాన్! కానీ, దాన్ని కొనడానికి పోటీపడుతున్నది ఎవరో తెలిస్తే.. అక్కడి రాజకీయాలు ఎంత దారుణంగా ఉన్నాయో అర్థమవుతుంది.
ఆర్థిక సంక్షోభంలో కూరుకుపోయిన పాకిస్తాన్, గట్టెక్కేందుకు ఆఖరి అస్త్రం ప్రయోగించింది. అంతర్జాతీయ ద్రవ్య నిధి (IMF) నుంచి $7 బిలియన్ల (సుమారు రూ. 63,220 కోట్లు) రుణం పొందడం కోసం, తన జాతీయ విమానయాన సంస్థ 'పాకిస్తాన్ ఇంటర్నేషనల్ ఎయిర్లైన్స్' (PIA)ను అమ్మకానికి పెట్టింది. దశాబ్దాలుగా నష్టాల్లో ఉన్న ఈ సంస్థను వదిలించుకోవడం, అందులో 51-100 శాతం వాటాను విక్రయించడం ఐఎంఎఫ్ పెట్టిన ప్రధాన షరతు కావడంతో పాక్ ప్రభుత్వం తప్పనిసరి పరిస్థితుల్లో ఈ నిర్ణయం తీసుకుంది. గత రెండు దశాబ్దాల్లో పాకిస్తాన్ చేస్తున్న అతిపెద్ద ప్రైవేటీకరణ ఇదే.
సైన్యాధ్యక్షుడే ఓనర్ అవుతారా?
ప్రధాని షెహబాజ్ షరీఫ్ ప్రకటన ప్రకారం, డిసెంబర్ 23, 2025న ఈ బిడ్డింగ్ ప్రక్రియ జరగనుంది. అయితే, దీనిని దక్కించుకోవడానికి అర్హత సాధించిన నలుగురు బిడ్డర్లలో 'ఫౌజీ ఫెర్టిలైజర్ కంపెనీ' ఉండటం ఇప్పుడు పెద్ద చర్చకు దారితీసింది. ఇది పాక్ సైన్యం నియంత్రణలో ఉండే 'ఫౌజీ ఫౌండేషన్'లో భాగం. పరోక్షంగా పాక్ సైన్యాధిపతి అసిమ్ మునీర్కు దీనిపై ఆధిపత్యం ఉంటుంది. దీంతో, ఈ అమ్మకం డ్రామా అంతా మునీర్ కోసమే జరుగుతోందా అనే అనుమానాలు వ్యక్తమవుతున్నాయి. ఇమ్రాన్ ఖాన్ వంటి నేతలు మునీర్ తీరుపై తీవ్ర స్థాయిలో మండిపడుతున్నారు.
పీఐఏ పతనానికి అసలు కారణాలివే..
ఒకప్పుడు ఘనకీర్తి ఉన్న పీఐఏ, ఇప్పుడు ఇలా దివాలా తీయడానికి ప్రధాన కారణాలు ఇవే:
నకిలీ పైలట్లు: 2020లో బయటపడిన కుంభకోణంలో ఏకంగా 30% మంది పైలట్లకు నకిలీ లైసెన్సులు ఉన్నాయని తేలింది. దీంతో 262 మందిని ఇంటికి పంపారు.
అంతర్జాతీయ నిషేధం: భద్రతా వైఫల్యాల కారణంగా యూరోపియన్ యూనియన్, యూకే, అమెరికా దేశాలు పీఐఏ విమానాలపై నిషేధం విధించాయి.
అవినీతి & నిర్వహణ లోపం: ఇష్టారాజ్యంగా నియామకాలు, అధిక జీతాలు, 2020 నాటి విమాన ప్రమాదం (Flight 8303) సంస్థను కోలుకోలేని దెబ్బ తీశాయి.
ఈ ప్రైవేటీకరణ ద్వారా సుమారు రూ. 8,600 కోట్ల ఆదాయాన్ని పాక్ ప్రభుత్వం ఆశిస్తోంది. ఇందులో 15 శాతం ప్రభుత్వ ఖజానాకు వెళ్తుండగా, మిగిలిన మొత్తాన్ని సంస్థ అప్పులు తీర్చడానికి, పునరుద్ధరణకు వాడనున్నారు.
